Veraj sencoj de vortoj?

Do, mi kredas ke mi havas mojosan ideon, pri kio skribi, sed mi ne kredas, ke mi povas esprimi ĝin bone. Alivorte, bonvole, provu legi ĉi tion :)

Ekde mi estis malgranda knabineto, jam antaŭ iri al lernejo, mi scipovis legi kaj skribi. Mi ankaŭ estis rimarkanta aliajn lingvojn, ne nur la ĉeĥan (mian gepatran). Poiome mi eklernis (kaj ne plu studis) fremdajn lingvojn. La anglan, francan, rusan, germanan, latinan, hispanan kaj finfine esperanton… La listo verŝajne ne vere gravas, ĉar nun mi intense uzas nur kvar. Mi amas la ĉeĥan, mi povas esti plej kreativa uzante ĝin kaj esperanto estas ankaŭ en mia koro, ĉar estas tute logika kaj mi amas, kiam io estas regula…

Sedi volis priskribi, kion mi eksciis pro lerni kaj ĉefe uzi lingvojn dum la tuta tempo. Kelkfoje, kiam mi rankontas aŭ simple parolas aŭ skribas, mi sentas, ke uzi vorton de alia lingvo estus pli bona, ĉar la vorto en la lingvo, kiun mi parolas en tiu momento, ne estas ĝusta. La traduko jes, sed la senco ne tute… (Se mi estus pli lerta por skribi pli bone… ) Bedaŭrinde, mi faras nenion kun tiu ĉi senco. Estas pli da kialoj.

1, Tempo. Konversacio rapide daŭras kaj ne estas tempo por pripensi miajn hazardajn pensojn, estas pli gravaj (hazardaj) aferoj.

2, Mankas atento de aliaj. La dua (kaj tria, kvara, kvina…) homo simple ne estas tiel entuziasma pri fremdaj lingvoj kiel mi. Ne komprenas, kial uzi alian lingvon ol lian/ŝian unuan.

3, Mi ne pravas kaj mi serĉas problemojn ie, kie ne estas. Aŭ eble mi volas pripensi ĝin sole kaj trankvile. Ne sole, kun vortaroj :)

La kialoj evidente koneksas kaj oni povus uzi nur unu frazon eĉ unu vorton. Sed mi estas tro malaktiva (por?) fari ĝin. Kaj la artikolo estus mallonga :)

Do, sencoj kaj vortoj… Homoj jam scias, ke en kelkaj lingvoj estas multe da vortoj por unu afero kaj en alia estas neniu. Ekzemple oni diras (eble estas mito, sed samtempe bona ekzemplo) ke eskimoj havas 30 vortojn por neĝo. Laŭ lia formo, kiel ĝi aspektas… Kial havus tro da vortoj por nomi neĝon en norda Afriko, kie neĝo ne estas?

(Pardono, ŝajnas, ke ĝi ne estis tiel bona ekzemplo, kiel mi pensis, ke ĝi estos.)

Mi legis lingvistikan libron pri genezo de lingvoj. Kiel funkciis nomigi objektojn. Ke ie oni nomigis bestojn laŭ la sonoj, kiujn ili faras. Ankaŭ mi memoras ion pri ideografio, bildskribo.

Mi simple volus scii, kial kelkaj vortoj estas pli kaj malpli adekvataj. Kaj pli bona demando estus, kial mi devas pripensi ĉi tion?! :)