Well…一開頭，我覺得首先要做既係道歉同反省…小弟都好似好耐冇出過文啦…（唔係好似，係真係好耐…🤦🏻♂️）五月尾六月頭要考試…忙，六月尾到七月中放假翻歸出trip…忙。
真係要到我再次翻學之後先有時間 地方去寫嘢（其實有個適合既地方去寫嘢我真係覺得好緊要，真係重要過器材）
請大家見諒（雖然我都知應該冇乜人留意or期待㗎啦😑）
放完個寒假翻到南半球，氣候清涼，長夜流流既時候就睇到兩位前輩講自己寫作既因由，自己亦諗翻起自己點解會走黎寫嘢…
小弟因為家教問題，自細就唔俾睇卡通 漫畫or之類既嘢，我老母將佢哋定性為「無謂嘢」，所以我到而家啲fd問我咩高達 數碼暴龍果啲，我真係只能夠講句：「對唔住，我真係冇童年㗎…」
當年放學之後可以做既嘢就係即刻翻屋企，做功課，到六點半就食飯睇新聞（當年大台都未有咁PK既…）之後等住我既就係無窮無盡既補充練習…
我老母為防我睇電視，就將張飯檯搬去窗邊，我就望住街景，佢就係我背後睇無聲電視。係啊，真係無聲㗎，佢係做到咁絕㗎，聲都唔俾我聽㗎！（當然更加唔會有上網呢家嘢啦，因為屋企連部電腦都冇）
然後我就坐係度做補充做到訓覺，日日如是，直到Form 2…（當然細路仔係會有啲嘢去偷閒既）
Errrrrrr…好似有啲離題，sorry，講翻正題。
係咁既環境之下成長既「副作用」就係睇書變成唯一娛樂。我老母讀書唔多，所以佢認為只要本書冇乜公仔，果本書就可以睇㗎啦，所以小弟自小學開始就係學校圖書館搵果啲無人問津既小說黎睇，因為，冇 公 仔 吖 嘛 🤣
所以係小學同級啲人仲睇緊咩啊Q探案（當然係虛構啦，我都唔記得曬啲書名啦，淨係記得係啲成本夾埋唔夠1000字既故事書啦）既時候，我已經將金庸既所有武俠小說同埋衛斯理系列睇曬。
長篇小說其實真係有種魔力，你一攞起就放唔低，一定要睇曬佢為止。而後果就係我連上堂都係咁睇，唔知俾老師收書罰留堂幾多次，亦唔知捱左幾多鑊藤條炆豬肉啦…（當然呢個習慣到而家都係改唔到既，不過就唔會上堂睇，最多睇到唔記得做功課姐🤣）
而睇咁多書既結果就係當你作文既時候會知道人地寫文既content係點，結構係點而大概知道你篇文應該點寫。
小學中文要寫300字既文小弟經常寫到個老師叫我停低唔好再寫（其實當你有樣嘢好有靈感寫緊既時候俾人stop你係好冇癮㗎…而我既報復措施就係係考試既時候有幾多寫幾多，係咁加紙，因為考試老師冇得stop你😏）
上到中學既時候呢個skill就更加有用啦，因爲無論中英文堂，佢總會俾一堂時間你寫住先。咁小弟呢，通常就係果堂就會將成篇文寫好，多數會送多一兩百字出去，咁就可以慳翻啲時間做其他嘢吖嘛。但一開始老師都係會鬧到你PK，又話要用mind map，又話要起大綱剩剩剩咁。
Well，東方既教育制度就係咁㗎啦，就算你係天才都好（當然小弟唔係）佢都係要你按住佢果套佢行，格硬要將所有人整到一式一樣，連思想都係，我真係唔知果啲所謂多元教育究竟係乜春。
當然啲老師見到你真係做到嘢出黎又唔影響其他人既話多數都唔會再理你㗎啦，其實果種好似攞特權咁冇人針住你既感覺其實好爽（不過，上天係公平既，中英文既四份卷入面，小弟既聽 寫 講 永遠都好高分，而閱讀卷係次次都炒硬，因為我真係唔識揣摩份model answer既key word，我寫一大段嘢佢永遠都會話我錯既）
而且你寫既文有人會讚你既時候，你繼續寫落去既動力係真係大好多（其實所有嘢有人賞識就會繼續做㗎啦…廢話）後來亦有被老師半強制咁去參加一啲作文比賽之類既，都有攞獎，不過其實都幾不值一提，因為校際比賽攞獎最多咪有個頒獎典禮你上去行下咁大把，又冇街外人睇到既，真係冇乜謂。
但講到有冇興趣揸筆搵食…暫時又真係冇呢個念頭…始終…都真係搵唔到食…成到名既，唔係靠天時地利人和就係因為佢係其他方面有斬獲而帶到佢亦係作家呢個身分。
其實係灰既…啲人話香港係文化沙漠，我認同一半，因為香港仲有人為藝術係唔同領域掙扎緊（其實都包括小弟既…因為我其實都係做舞台劇既actor…雖然產量好少）但好多時候社會就將夢想 興趣扼殺係萌芽之中。
讀書既時候就為左所謂既興趣班打生打死，但對於個細路真正既有興趣既嘢卻萬般反對。從讀小學開始父母就開始灌輸做醫生 律師 OL坐係冷氣房先係理想工作，小學時候既我的志願我真係好肯定九成都係寫醫生 律師 老師 太空人之類既嘢。
就算係小弟出黎讀書，中介 老師一樣都係希望你去讀商科，課程亦係商科多，文科俾人既印象就係讀完出黎搵唔到工，搵到都唔慌高人工。咁又好難怪香港會變成一個淨係睇錢既地方，爭取啲嘢都肯定有廢老出黎鬧話阻住佢搵食。
半年前開始轉場黎Medium，的確係一個注重寫作，而唔係速食文化既地方，可以俾自己係呢個平台上寫下啲自己想寫既嘢，其實係一件值得慶幸既事。
起碼呢個地方既人係會尊重寫作，長文係呢個世代都仲有佢生存既地方，唔洗煩廣告，唔洗驚因為演算法而埋沒左係正方形短片之下，真係可以我手寫我心（Well…而家好似已經演變成我手 打 我心😂）
（其實篇文都好似都幾離題…不過，so what？就係想寫自己既諗法咋嘛，又唔係交稿，who fxxking care？😆）
Errrrr…按照慣例…
