波斯電影的第一次接觸

伊朗三面戲劇人生 (3 Faces) — 業餘觀後感

電影基本資料:

名稱: 伊朗三面戲劇人生 (3 Faces)

導演: 約化巴納希(Jafar Panahi)

主演: 貝納絲扎法里(Behnaz Jafari), 約化巴納希(Jafar Panahi), 瑪思耶雷薩伊(Marziyeh Rezaei)

語言: 波斯語及土耳其語

片長: 1小時41分

預告傳送門: https://www.youtube.com/watch?v=2Aq2a8AMtvg

伊朗,一個國際新聞版經常出現係既國家,大家對佢既印象都幾兩極,負面既通常會將佢穆斯林政教合一背景同極權或者恐怖主義畫上等號,亦有啲人會被佢波斯古國形象或粉紅清真寺等名勝所深深迷住。而我係朋友分享親身經歷中同不同旅遊作家既文筆下,對伊朗民風質樸而好客身風評,同伊朗由極其西化親美既世俗化時期到現今政教合一狀態既轉變,產生巨大興趣,終有一日要到訪依個國家。

但事情邊有咁美好,伊朗就仲未去過,但伊朗電影既身影近年係國際愈見頻繁,唯有睇住伊朗電影望梅止渴。但對於戲齡尚淺既我,伊朗導演阿斯加法哈迪 (Asghar Farhadi) 執導一系列電影《伊朗式分居》、《伊朗式離婚》1及《伊朗式遷居》其實已經係我可以數得出口既全部伊朗電影,仲要只係響飛機上面睇過不到三分一齣《伊朗式離婚》。

所謂一不做就二不休,處男下海寫文就梗係寫啲偏門野啦,今次要講既電影比上述三部電影更加小眾,由被伊朗官方禁拍電影20年既導演約化巴納希(Jafar Panahi) 執導,喺本年度康城影展最佳劇本獲獎電影 — 《伊朗三面戲劇人生》(3 faces)。當中,導演同埋知名伊朗女演員貝納絲扎法里(Behnaz Jafari) 更會喺電影中飾演現實中既身份,做一場徹底既自嘲。

劇情主要講述一名擁有成為演員夢想的伊朗少女瑪思耶雷薩伊(Marziyeh Rezaei),喺重重困難下靠住自身努力得到德黑蘭戲劇學院錄取,但因為家庭壓力被迫放棄,走投無路之下,將一段自殺短片發予知名女演員及導演後,而展開既一系列事件。

如果大家本著睇劇情片既心態或者期待電影會營造到緊湊既懸疑氣氛,我會奉勸閣下要綁好安全帶,做好期望管理。如果自問係一個好似我咁對伊朗文化歷史既觀眾,要有心理準備你可能真係會睇到一頭冒水。但自問睇完套戲做返啲功課之後,有啲莫名其妙既情節又突然豁然開朗,仲會因為導演既鋪排、自嘲或者小心思會心微笑。

而下面係幾個資訊個人覺得對享受成套戲會有唔少幫助,但無可避免會牽涉到一啲電影情節,所以睇定唔睇就悉隨尊便啦!

註:

  1. 伊朗式離婚於2013年首映,以巴黎作故事背景的法國電影

/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\

— — — — — — — — — — — — — — 有雷 — — — — — — — — — — — — — —

\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/

1. 戲名《伊朗三面戲劇人生》既三面其實係指戲中三名提及到既三代女演員,代表過去既雪赫拉莎德(Shahrzad)、象徵現在既貝納絲扎法里及未來既瑪思耶雷薩伊,從而折射出「女賣藝者」係不同時代既待遇

2. 伊朗伊斯蘭革命,泛指由前伊朗最高精神領袖霍梅尼領導,於七零年代後期開展,推例親美世俗化巴列維王朝,建立伊斯蘭教國家既群眾運動

3. 約化巴納希曾於2010年,因嘗試整作有關具爭議性既2009年伊朗總統大選既紀錄片,並被官方禁止參與電影製作至2030年(姐係話依部電影都係非法作品),至今仍被禁止出國

4. 伊朗愈半人口為波斯族群用操波斯語,而依部電影既拍攝地則係伊朗西北部鄰近土耳其既山區(同時係導演母親、父親和祖父母既出生地),主要語言係土耳其語

5. 伊斯蘭中亦有亞當夏娃食禁果之典故,因此蛇於伊斯蘭中亦係邪惡既化身

6. 男性割禮係普及於中東穆斯林及猶太族群既習俗

7. 雪赫拉莎德及Behrouz Vossoughi 分別為伊斯蘭革命前伊朗家傳曉既女星及男星,而後者於革命後流亡美國

有咗上面一啲補充資料之後,應該會更容易理解導演喺電影裡面折射伊朗社會對女演員蔑視、偏遠地區揮之不去既古舊觀念等命題既企圖,或者導演對自身禁拍處境既自嘲會都變得明朗。

最後,亦想講下電影裡面我比較深刻既兩幕:

係電影開頭無耐,導演同佢媽媽傾左一個電話,媽媽追問佢究竟去左邊,甚或搬出好想導演去探佢等話題,即使導演聲稱經常去探佢。但我認為通通都只係媽媽為左試探導演係咪去拍電影既開場白,又或者為阻止導演去拍電影盡最後努力。戲裡面導演確實唔係去拍戲,但不難想像依一幕其實會係佢現實生活中發生。係禁拍令既影響下,導演究竟聽過幾次依類電話,又為左唔令家人擔心講左幾次大話呢?

有時能令堅持故我既人動搖既,並唔係來自旁人既猛烈抨擊,而係別人對你最真摯既擔心。

其次,少女返到屋企既同時,佢細佬比人趕出黎個幕,都令我感受幾深刻。毫無疑問,細佬暴躁唔講道理既形象,都幾唔討喜,我對佢都早早存有偏見。但從佢比人趕出門口後,係門外徘徊同隔牆偷望等行為舉止,我睇到既係佢無助不安。加上,係電影較早部分,佢比人困係小屋既片段抑或少女不斷指佢會燒屋但到頭來並未發生既種種,我開始諗佢係一個壓迫他人既存在定另有所指。

其實,少女母親對少女既溺愛顯然易見,尤其係明明唔支持佢做演員但都陪佢去德黑蘭面試。相反,對細佬既更多係厭惡,其實細佬對少女令一家人蒙羞既指控,對我地當然係無稽之至啦,但係佢身處既時空背景唔係最政治正確咩,其實佢又會唔會只係一個想循規蹈矩以換取被愛既弱小存在。

再忽發奇想,明明導演望住細佬好敵意咁拎起架車,佢大可以駛開架車,但佢偏偏咩都唔做,仲一個人走左去,比一個大好機會細佬破壞架車。定導演早早看穿佢既軟弱,比個宣洩渠道可憐既佢。

— — — — — — — — — — — — — — — — — — — — — — — — — — — — — — —

世界太大,自己見識太少,可以用雙腳雙眼感受多啲就已經好滿足

參考資料:

- 「伊斯蘭」&「共和國」:1979年的伊朗春天, 破土, 香港獨立媒體, http://www.inmediahk.net/node/1979

- 伊朗戲劇三面人生 — 還原戲劇人生, 動映地帶http://www.cinespot.com/newfilms/%E4%BC%8A%E6%9C%97%E6%88%B2%E5%8A%87%E4%B8%89%E9%9D%A2%E4%BA%BA%E7%94%9F

- A film by JAFAR PANAHI, The Kino Lobber, https://4f399d350e4882ff73b9-0f00c87f9e216dcd5acfbe5f7dfb64d7.ssl.cf2.rackcdn.com/production/documents/3%20Faces%20-%20Press%20Kit.pdf

- Fighting for the Palme d’Or, and the Right to Fly to Cannes, The New York Times, https://www.nytimes.com/2018/05/09/arts/banned-directors-cannes-kiril-serebrennikov-jafar-panahi.html?rref=collection%2Ftimestopic%2FPanahi%2C%20Jafar&action=click&contentCollection=timestopics&region=stream&module=stream_unit&version=latest&contentPlacement=2&pgtype=collection