加速時代
科技發展令好多嘢都更方便。以前寄信要好多日，宜家無論喺地球邊個角落，WhatsApp 即刻就收到（無死機嘅話）。交通網絡四通八達，去邊度都快咗好多。但係，多數人都無因為咁多咗時間。相反，要做嘅嘢總係做唔完，想睇嘅新聞同劇集睇極睇唔哂。科技到底係幫人慳咗時間，定係令人更加忙呢？
喺好耐之前人類生活唔係咁樣。好似中古時代嘅農夫，日出而作、日入而息，無咁多聚會同娛樂，應該唔會因為時間管理搞到好大壓力。宜家時代進步咗，人類多咗時間，無論係因為自己意願、定係比社會影響，好似一定要做多啲嘢，如果唔係就浪費哂啲時間，無得 get in front, not behind。聽好青年荼毒室 YouTube，先知道有哲學家都有講呢個現象，叫佢做加速時代。
喺呢個加速時代，幾時都有值得關注嘅嘢發生緊。無論係搭車、排隊，食飯等上菜甚至係食到一半，只要有部手機，就總係想碌下 Facebook, Instagram 同 Twitter，睇下最新資訊。咩都唔做嘅話，就好似好焦慮，浪費緊時間咁。
有啲人會話，要做時間管理達人（唔好諗錯隔離），有好多技巧可以用，咩番茄鐘工作法、Getting Things Done (GTD)、緊急／重要矩陣，好似用咗就有一日做得哂所有嘢，可以過番輕鬆平靜嘅人生。不過諗深一層並唔係咁樣，你慳到一兩個鐘，又會想睇多套劇。你番工做嘢快咗，老闆又可能會叫你做多幾樣嘢。咁樣用咩方法都無用，我哋變到好似隻倉鼠輪上面啲倉鼠，無論幾努力跑，結果都只係寸步難行。
Four Thousand Weeks: Time Management for Mortals 呢本書，正正就係講呢個問題。作者 Oliver Burkeman 係主打時間管理嘅專欄作家，不過佢重點講嘅唔係時間管理嘅技巧，而係心態。而本書最重要嘅訊息，就係要從呢個倉鼠輪走出嚟，唔係要咩時間管理技巧，係要接受時間有限呢個現實。呢個世界好多嘢都值得做。但係人嘅時間有限，只可以揀幾樣嘢嚟做，放棄其他嘢，然得接受根本唔會做得哂我哋想做，或者其他人想我哋做嘅所有嘢。有咗呢個體會，就可以唔使（又或者無咁）因為時間唔夠而感到壓力或者焦慮。
社交媒體花好多精力去搶用家嘅注意力。佢哋推嘅帖文，好多時都係最吸引眼球，令人好想一路睇落去。佢哋好似俾到好多最新資訊我哋，或者有好多抵死嘅評論。但係，好多時同自己最關心嘅議題之外嘅新聞都無咩用。一啲睇落好抵死搞笑嘅帖文，諗深一層，又會發現其實無咩內容。好似 Twitter 呢排比 Elon Musk 收購，發生好多事，花生一地都係，個個都上 Twitter 講 Twitter。不過如果唔係科技圈嘅人，就算咩都唔知，生活都唔會有咩分別。好多人氣劇集，其實都係咁。與其追得咁貼，我寧願花多啲時間喺睇書或者培養新嘅嗜好。
又或者，間中睇下風景發下呆都好。
