所有嘅嘢都係借番嚟

星期六上完 body combat 班，又攰又肚餓。諗住去之前去過一間幾好食嘅西班牙餐廳，點知原來無開。行過隔離街見到間成間綠色好有文青風嘅 cafe，就諗住入去試下。一入到去見到差唔多坐滿人，成大幅綠色嘅牆係手繪嘅社區街道圖，幾有心思。食客都同職員好好傾，成個氣氛好舒服。

職員問我哋有無訂枱，我心諗：下去 cafe 都要訂枱？同埋周圍餐廳都無咩人，係呢間特別多人嘅？好彩收銀隔離仲有張枱，坐低之後就叫咗個印度奶茶同一個 Lamb and egg。手打羊肉好鮮嫩，同流心蛋好夾，仲有自家制嘅醬汁同薯仔餅底，好有驚喜。食完之後好慶幸之後有多過地方 brunch。（註：有關食物描述由女友提供，叫我做 Foodie 介紹好西真係無咩可能…)

點知過咗兩日就喺新聞見到，原來啱啱週末就係佢地最後嘅營業日。之前都有好多餐廳頂唔順 cost of living crisis 執咗，但係一間咁高質素，咁多人食嘅 cafe 都要執，真係估唔到。知道咗呢單新聞之後，個腦即刻浮現咗之前睇過嘅一句話：所有嘅嘢都係借番嚟。

喺工作，喺日常生活，往往都會遇到一啲令人好想同佢哋多啲相處嘅人。可能係性格風趣，可能係個人好叻，又可能係性格同我都幾夾。但係好多時候，都未有機會再認識佢哋多啲，因為種種原因已經無機會再見到佢地。好似我啱啱先開始適應新工作，識到幾個好同事，點知佢哋又就嚟走。日常生活嘅朋友，更加多係好久不見，唔知佢哋到底發生了甚麼事。諗番都有啲若有所失。

幾個月前同一個好耐無見，見多識廣嘅朋友傾計。講起呢幾年好對佛教同 Stoicism 幾有興趣，睇多咗相關嘅書。朋友有少少驚訝，問我呢幾年係咪受過咩打擊。我諗番，好幸運，呢幾年我嘅生活算係好安穩。但係社會翻天覆地嘅轉變，睇到好多人嘅故事。有啲係素未謀面，都有啲係我識、一齊相處過嘅人。睇到佢哋嘅故事，好深刻咁感受到人所擁有嘅嘢，隨時都可以突然間無咗，就好似債主隨時收番欠債。

今日唔知聽日事，可能會好啲，又可能會差啲。記住呢樣嘢，會變得寬容啲，發現好多嘢都唔使太介懷。擁有嘅嘢，身邊嘅人，無人知道之後會點，所以開心嘅時光要好好珍惜。

我都好珍惜上個星期喺間新發現嘅 cafe 度過咗一個悠閒嘅下午。