用一堆問題換另一堆問題

前排有日一早起身，見到窗出面全部都係雪，成個人呆咗。雖然一路都幾凍，都無諗過一落雪就落咁多。靚係靚，但係都剷咗好耐雪先出到街。諗起之前有啲嚟咗無耐嘅人話呢個城市唔係太凍，最凍都係兩三度。好多時聽人講都未必可信，好多嘢親身經歷過先會知。

嚟咗一段時間，不過工作模式、天氣、交通、社交等等都仲適應緊。有啲嘢睇落幾難，第一次做花好多時間去摸索，但係試過幾次之後發現原來都唔算太難。所以都唔使諗太多，要學嘅嘢就慢慢學，做唔到先再諗辦法。

工作上嘅變化仲係好多，好似每幾個月身邊嘅同事同埋工作嘅性質都會唔同哂，如果番工係想「學嘢」就啱哂，大把嘢學。不過作為大機器嘅一個小齒輪，無論周圍嘅人事點變，都係繼續努力去做好本分。只係覺得好多時都無機會同新認識嘅同事了解多啲，已經無機會有啲可惜。

見到一個好有意思嘅講法，話另一個地方生活，就係用一堆問題去換另一堆問題。之後我諗，喺咩地方生活，都有唔同嘅問題要解決。只係喺熟悉嘅環境，已經有一套方法處理。喺新嘅地方，唔使處理一啲以前嘅問題，但係換嚟嘅係另一堆問題。其實生活嘅其他方面，好似工作、社交、興趣都係咁，唔同選擇有唔好嘅好壞，只係睇點樣取捨。

另一方面，都要提醒自己唔好太著重喺問題之上。唔同嘅選擇，都有唔同嘅得著，學咗一啲新嘅枝能好有滿足感。宜家嘅麻煩事，可能第日睇番會係珍貴嘅經歷。好似雖然剷雪有啲煩，不過雪景都幾靚嘅。

前兩日見到周凱旋講 Should Have、Could Have、Would Have，都幾有意思。佢講嘅應該係社會層面，不過我諗嘅係個人層面。做咗一啲比較大嘅決定之後，都會諗如果揀咗另一條路會點樣呢？但係大嘅決定牽涉嘅範圍往往好廣，仲未計人生往往有好多估唔到嘅事發生。到最後嘅答案都係：唔知，所以都無必要諗太多。

Should Have、Could Have、Could Have 固然值得去諗，不過我更加鐘意嘅係石黑一雄嘅一句話：”There was another life that I might have had, but I am having this one”。