資訊碎片化 — 點樣睇文好？
脫離平台的枷鎖
Medium 愈搞愈衰，係事實。
呢一兩年好多人轉場，一係去 Patreon 搵真銀，一係就 Facebook 儲人氣，或者因為種種原因唔再寫文。以前我仲會幫 Medium 講好話，解釋佢無廣告、重視文字、寫文介面簡單易用。但係呢一兩個月嘅 iOS 介面係完全用唔到。作為讀者，睇開嘅文友成日見唔到，推介嘅係我無興趣嘅英文文章，過幾個鐘開 App 又係推介同一堆文，有時甚至咩文都無。作為作者，愈黎愈少人睇文。雖然好有可能係因為自己寫嘢唔好睇，不過對住空氣講嘢始終感覺好差。
前幾日諗諗下，突然間諗起要睇 Medium 文，都唔一定要用 Medium 個 App 啫。好耐以前用過 RSS，不如試下仲用唔用到？
RSS 全名係 Really Simple Syndication，中文係簡易資訊聚合。技術嘢唔使理，簡單黎講就係可以用黎訂閱個人網站，有新文章嘅時候就會收到通知。用 RSS reader 就可以一次過睇哂訂閱咗嘅網站出嘅新文章。
RSS readers 有好多選擇，最多人用嗰個應該係 Feedly，有網頁版又有 App。登記個戶口，就可以訂閱番想睇嘅 Medium 作者。就咁入番文友 profile 嘅網址，後面加 “/feed” 就係條 RSS feed 。例如我條feed 就係 awwg.medium.com/feed。之後揀番 Follow 就得。
一口氣加番睇開嘅廿幾個文友，呢幾日一開 Feedly 就知道邊個有新文，唔使驚錯過任何文，易用過 Medium 個 App 好多。有需要嘅話仲可以將作者分番類。
試試下仲發現樣趣事。Feedly 可以睇到有幾多人 subscribe 左條 feed，好似史兄同華田呢啲大戶原來已經有幾十人subscribe 左。睇黎都有唔少人用RSS黎睇 Medium。
用 Feedly 睇 Medium 文嘅經驗都唔錯，排版正常，圖同字都無走位。無星星文就全篇出，星星文就出 preview，可以㩒番條 link 入 Medium App/網頁睇。唯一要留意就係希望大家用左 Feedly 之後都記住入番篇文 clap 啦（笑）。
用 RSS 仲有一個好處，就係可以睇埋 Medium 之外嘅文，好似 Blogger 同 Wordpress 都得。我試過甚至連立場新聞博客都得（例如呢版），做法都係大同小異。咁就可以將唔同平台嘅文章一齊睇喇。
不過，宜家好多人寫文都只係用 Facebook 同 Instagram，唔會用個人網頁，咁樣就無 RSS feed。我其實一向都唔中意一定要登入 Facebook 或者 Twitter 先睇到文，覺得好無私隱，而演算法派文章都令人唔舒服。搵左一陣，又竟然俾我搵到個方法將 Facebook public pages 轉去 RSS，例如用呢個網站。免費版只係整到五條 feed，同埋一日先會更新一次，不過都夠用住先。
希望可以幫到覺得 Medium 新介面好難用嘅人。Medium 係唔抵幫嘅，我都唔知有無一日我又去跳船，但係只係唔想文友因為咁樣而唔寫文啫。就算大家轉場都好，不如用番個有 RSS feed 嘅平台做備份，等大家都可以追蹤番你丫。
