重新開始

Photo by Adam Marikar on Unsplash

當生活無咩變化嘅時候無嘢好寫，但生活突然大變，又會 overwhelmed 到唔知點寫好。

過去呢兩年，身體同精神都好攰，工作上好多嘢已經唔識點去處理，好似花咗好多心機，但係又無咩成果咁。一時覺得「我仲捱到多一陣」，一時又覺得「我都係唔可以捱落去喇」。我諗轉變下環境都係件好事。

去新嘅地方過生活，好似將之前累積嘅經驗、知識、人脈一鋪清枱，有啲可惜。但係鋼之鍊金術師話齋，人唔作出犧牲，就唔會得到任何回報。同埋總係要相信，咁多年黎學識嘅嘢，去到另一個地方都會用得著。就算有好多新嘢學，都係件好事丫。

我成日覺得留唔留喺香港嘅爭論好無謂。每個人嘅自身、家庭、財政考慮都唔同，自然有唔同嘅決定。再加上人生無得再嚟過，呢啲決定永遠唔會証實到係「啱」定係「錯」。喺香港又好，外地又好，重要嘅都係你係一個點樣嘅人。心安就好。

如果要過新嘅生活，趁自己仲未係咁老去學可能好啲。嚟咗蘇格蘭幾個星期，去咗城市入面好多地方，仲去咗倫敦兩日，見咗好多老朋友同新朋友，香港人同蘇格蘭人都有。見到已經喺香港嚟一段時間嘅朋友神采飛揚，好似幾享受人生咁。鄧佢地開心之餘，都覺得我要加把勁了。

香港嘅節奏好快，倫敦都係差唔多，其實喺倫敦嘅時候我不時有個錯覺，覺得自己仲喺香港咁。蘇格蘭人做嘢無咁趕，有耐性，就算唔識嘅都會傾兩句。喺香港如果無啦啦同陌生人傾計，應該都會比人當做騙徒。但係喺呢度，同鄰居傾下計，或者同超市收銀員傾兩句好平常。一開始唔係好慣，但係宜家又覺得呢種人與人之間嘅連結都幾好。

聽蘇格蘭口音、學習新嘅生活模式、調整心態，都要慢慢習慣。再加上之前積積埋埋嘅疲累，可能都要啲時間先可以再出發。雖然有唔同嘅小問題，但係一日解決一個，一年就可以解決三百幾個了。好似係。