關於跑步
終於睇完《公司冇逼我跑馬拉松》，好耐無試過睇電視睇到眼濕濕。節目入面好多練習都喺沙田同大埔，勾起好多回憶。特別係沙田運動場，由細到大都喺嗰度跑步，好似有一兩年中學陸運會都喺個度搞。都有一段時間無去，不過睇落都無咩變。
中學陸運會都會跑下短跑同埋接力。雖然因為比較少做運動，每次跑完都攰幾日，不過嗰時嘅我仲係覺得陸運會比賽幾好玩同刺激。入咗大學之後都好少跑步，好似直到番工嗰陣，唔知點解代表公司跑渣打馬拉松十公里，先至開始長少少嘅跑步。嗰時覺得完成到十公里都好厲害，後來仲加入咗跑會一排，星期五放工之後去跑馬地練跑，2017年仲完成咗一次半馬。宜家跑五公里都好勉強，諗番起以前真係覺得好不可思議。
有好多嘢只要無努力 keep 落去，就會慢慢會放低。後來因為忙、攰、少少受傷、覺得無意思等等愈嚟愈少跑步，身體慢慢就差咗。去到近幾個月先至開始試下每星期跑四五公里，又重拾番以前跑步嘅感覺。跑步對我嚟講，除咗係（少少）挑戰自己，更加係一個好好嘅機會比個腦放空。日常生活入面，好似每分每秒個腦都轉緊，唔係諗緊點樣應對工作嘅嘢，就係碌 Facebook 同 IG，好少時間係咩都唔諗比個腦休息下。有人跑步鐘意聽音樂，我通常咩都唔會聽，一步一步咁跑，跑完之後都會覺得離開下日常嘅煩惱係好舒服嘅一件事。
《公司冇逼我跑馬拉松》入面，五個藝人都好厲害。第一集見到好多藝人都無咩運動經驗，仲以為有啲藝人會跑半馬，點知個個都係跑全馬。好似睇到一半仲係練習唔齊人，又有好多甩漏，點知突然間就好似大家都準備好全馬，仲個個都跑得好好。有時轉變就係不知不覺咁發生。
保錡喺節目入面係大佬，成日講只要有心就做到，係睇下你有幾多決心嗰啲。但係呢套真係唔係好啱我。令我最感動嘅係阿神，見到有集佢話膊頭受傷跑唔到，之後比其他藝人（友善咁）話佢，連 YouTube 留言好多都話佢多多藉口。到之後睇治療師，先發現阿神膊頭原來真係就嚟甩骹。睇到呢度覺得好多時做人做事，解釋其實都無咩用，唔明或者唔想明嘅人點講都唔會明。
有時人需要嘅唔係滿滿嘅正能量，諒解同支持更加重要。「有心做就會做到」呢句嘢可能係啱，但係人生中總係有好多唔同嘅事要做或者想做。就算係放低跑步（或者任何其他興趣），都唔代表係失敗，因為每個人嘅取捨唔同。跑步唔放棄嘅精神，唔一定要用跑步嚟體現，生活好多方面都用到。
宜家去跑步，嘗試每次跑多少少，跑快少少。都唔係為咗證明啲咩，只係覺得跑步嘅過程，已經係好有意思嘅一件事。
