風景都係遠望靚啲

時間總係唔經唔覺咁過去，已經好耐無寫過近況。之前以為新嘅地方生活會慢好多，仲諗緊好啊慢活我不嬲都唔介意，點知個步伐都唔係想像中咁慢。

工作方面都只係番咗幾個月，已經有好大嘅轉變。而家做嘅嘢同幾個月前幾乎完全唔同，成 team 都差唔多換咗一半人。好彩啱啱入職嗰陣個老闆好好，俾咗好多時間同空間我去學唔同嘅嘢，先至可以應付到宜家嘅工作。做做下又發現咗好多人都係喺我舊公司度過嚟，連舊公司 CEO 都過埋嚟做，我之前有日仲喺公司同佢傾咗陣計。去到咁遠都仲係跟同一個大大老闆，都真係好有緣。

雖然理論上都係做番以前嗰行，但係宜家好似去咗另一個部門咁。要做嘅嘢都好唔同，要學嘅嘢好似一路都學唔完。唔會話呢度番工辛苦過之前﹐不過工作量唔係真係差咁遠。有啲人成日話啲人做嘢好慢，又話咩都唔做就收工，唔知點解我想搵咁嘅工都搵唔到。每個地方都有人或者公司做嘢慢，睇下咁啱遇到咩人啫。

宜家嘅工作，大家做嘢速度都算幾快。簡單嘅工作都係一兩日內做完，複雜嘅都唔會拖太耐。有啲嘢做得慢少少，都係因為太多人參與，要做決定都要啲時間。我用番以前番工嘅步伐，都只係僅僅跟得上。我都想知係我咁好彩，定係其他人都係咁。

宜家同以前仲有一樣好唔同，就係 face time 特別多。雖然有 work from home policy，好少所有人同時喺 office，但係對內對外都好多會開，日日 video call。有時一日開三四個鐘會，開會前又要準備，開完會又要打記錄同跟進，搞到一早 plan 咗要做嘅嘢都係人地收工先開始做。

講到開會又同以前唔同，以前高層講哂，我呢啲基層員工坐定定聽就得。而家開會唔分等級，個個都要參與發表下意見。無得放空真係好唔慣，不過聽多啲講多啲，對融入都有幫助嘅。同埋經過訓練之後，都慢慢多咗嘢講。

之前見到有人傾去新地方生活最緊要係咩。有人話係決心，有人話錢，有人話識人，有人話適應交通天氣語言等等。我就覺得 why not all，呢啲嘢全部都緊要。是但一樣差啲，適應都比較難。

之前見到有人喺英國生活唔習慣，喺 YouTube 喊哂咁。睇完令我諗起前排上網睇到篇文，話原來人嘅壓力主要有四個原因：novelty, unpredictability, lack of control, threat of ego。一個新嘅生活，好似四樣都中哂。離開咗熟悉嘅人同環境，好多嘢都好新未經歷過。以前嘅生活好多嘢都估到，但係而家由天氣、交通、同人交流，好多嘢都估唔到又控制唔到。至於一向嘅人設都唔同哂，都有少少無所適從。所以壓力比較大，可能都係正常？

之前有個朋友話覺得我適應得好好，我即刻講番其實唔係，有好多嘢都覺得幾難。好似之前睇到嘅一個比喻：湖入邊有隻鴨仔，好似好 chill 好舒服 。但係其實隻鴨仔對係喺水底係好落力咁撥蹼，先至勉強浮得起。

離遠睇嘅風景通常都好睇啲，到近睇又好似有啲唔同。雖然仲未過到我想過嘅慢活生活，但係有時又會諗，只要生活上嘅挑戰唔係難到癲嘅 level，試下解決唔同嘅問題都幾有意思嘅。