香港人最鐘意番工 — 英國篇
喺新嘅地方生活，有好多嘢需要適應。衣食住行，樣樣都同之前唔同，有好多嘢值得分享。但係最多人關心嘅，始終都係番工。聽講話香港人嘅訴求就係番工，都真係講得幾啱。
之前一路都喺香港打工。雖然公司都有啲外國同事，不過都唔係成日講英文，只係做嘢嘅時候會寫（打）英文。再加上去到另一個國家嘅職場，除咗語言，文化嘅差異都好大，所以都有啲怕適應唔到。好彩做番一份算係同行嘅工作。就算係做另一個部門，對工作嘅內容總算有少少認識。
雖然只係番咗一段短時間，但係暫時嘅感覺係比起天氣（三月仲落雪！從來都唔鍾意落雪）、交通同新嘅生活圈子，適應工作仲無咁難。老闆同埋同事對新人好有耐性，好詳細咁解釋各樣工作，等我慢慢上手。雖然要處理嘅工作同之前好唔同，但係估唔到之前嘅經驗都有用得著嘅地方。可能喺香港都成日處理奇難雜症，所以適應新環境都易啲。
最有趣嘅地方係覺得有啲同事嘅性格有少少似曾相識咁。宜家嘅老闆，同一個我好敬佩嘅舊公司高層無論年齡、樣貌，同做嘢風格都幾相似。同 team 嘅兩個同事，又有啲似我之前嘅兩個同事 K 同 B 。可能做得呢行嘅性格都係會有少少似？同埋新公司都有唔少人喺我香港舊公司轉過嚟做，見番啲熟悉嘅面孔，個心都定啲。
有啲人話外國人做嘢好慢。可能喺日常生活啊政府服務嗰啲係，但係喺商業世界我覺得步伐算係正常。只係呢度嘅人好似比較尊重大家嘅私人時間，就算要加班都係自己做自己嘢，唔會迫其他人陪你加班。佢哋都比較少訂一啲擺明其他人唔加班就無可能趕得到嘅 deadline。通常 lunch 嘅時間都比較短，食個包就繼續做，所以都算係有效率。
聽講唔少嘅金融公司都有 work from home 政策。我公司都有唔少時間可以 work from home，所以同同事都係網上 video call 見面比較多。大家都好習慣呢種工作模式，去安排邊一啲嘅比較適合喺公司做（開會 brain storming 等等），邊一啲要專心啲諗就可以 work from home 嗰時做。同事慳番啲交通時間同車費，公司又可以全 hot desk 慳番啲租。仲有，呢度好似比較多靈活工作嘅安排，有啲人番 flexible hours，早番早收工，又有啲一星期番四日。我見過有個同事係一個星期番兩日半。唔知點樣申請嫁呢……
有別於大部分嘅香港人，我就一定唔係最鍾意番工。不過，有一份適合自己，又可以學到新嘢嘅工作都係一件好事。其實都仲有好多嘢可以分享下，不過睇下有無人有興趣啦。總之，暫時一切都好，人工除外。
