35

1. 喺諗點去做一件事之前，先搞清楚係咪應該做。
2. 因為人生無 controlled experiment，所以唔會知道決定「啱唔啱」。
3. 每個人情況唔同，應該做嘅嘢都唔同。最緊要知道自己做緊咩。
4. 無需要嘅嘢，就算平都唔應該買。
5. 即場反駁多數都唔係最好嘅回應。
6. 值得做嘅嘢太多，時間太少，只可以做好最想做嘅幾件事。
7. 散步可以平靜心情。
8. 人嘅資源除咗錢，仲有時間同精力。而後兩者好多時比錢更重要。
9. 可以簡化嘅事就盡量簡化。
10. 食得健康啲，訓多啲，做多啲運動。
11. 與其定啲好遠大嘅目標，不如定好多個小目標。
12. 為咗做一啲想做嘅嘢，就要做一啲唔想做嘅嘢。
13. 無嘢做嘅時候，可以選擇咩都唔做。
14. 無咩嘢係完美，學習欣賞他人嘅付出。
15. 獨立思考嘅過程比結論更重要。
16. 呢一刻覺得好重要嘅事，之後睇番感覺就會好唔同。This too shall pass。
17. 有無AI 都好，工作嘅內容只會不斷轉變。最緊要嘅係持續學習嘅能力。
18. 珍惜真誠嘅人。
19. 保養一件物件嘅成本，有時比售價貴好多。
20. 易啲滿足，個人會開心啲。
21. 成功通常唔係基於一個原因，係好多個互不相關嘅原因。
22. 旅行嘅時候拎少啲行李，去少啲景點，每個景點花多啲時間。
23. 唔好將負面嘅情緒發洩喺唔關事嘅人身上。
24. 寫作係送俾將來自己嘅一份禮物。
25. 不可理喻嘅事太多，將時間同精力放喺值得嘅人同事。
26. 用好多時間去諗如果件事出錯會點，都要諗下如果成功咗又點。
27. 去到一個新環境，遠少少咁觀察，對之前嘅環境會有新嘅體會。
28. 自怨自艾無咩用，要諗下有咩可以做。
29. 有啲人步伐好快，不過唔緊要，跟番自己嘅步伐走。
30. 有時好難下決定唔係因為唔知想點，係要付嘅代價好大。
31. 如果無嘢可以做到，就唔使擔心。如果有嘢可以做到，就唔使擔心。
32. 唔單止要聽講咗啲咩，仲要留意無講啲咩。
33. 要記住應該記住嘅嘢。
34. 如果一直想要更多，就永遠唔會足夠。
35. 唔好忘記世上仲有好多好人好事。