Discord – 社交媒體另一個可能
唔用Facebook 同 IG，仲可以用咩？
「世界末日喇！Facebook，IG同 WhatsApp 一齊死哂機喇！」
雖然幾個月前大家都仲係好討厭 Facebook 同 WhatsApp，但係好快佢地又成為番生活嘅一部分。雖然有鼓勵身邊朋友轉用 Telegram（MeWe 我真係麻麻），但係都幾難去推，同埋無可否認 Telegram 作為一個社交媒體，尤其當人數比較多嘅時候，係唔太適合。於是就喺度諗，仲有無其他選擇呢？
睇番iOS App Store， Social Networking App 嘅頭十位如下：
- Telegram
- Facebook Messenger
- 小红书
- Signal
- LINE
- Discord
睇完之後嘅開心大發現，係原來Instagram 係相片 App，唔係社交媒體 App，真係長知識。唔屬於 Facebook 而我有興趣得四個。Telegram、Signal 同 LINE （其實好多年無用）幾個人傾計唔錯，只係群組一多人就好混亂。咁睇睇下，得番 Discord，不過聽講好似係俾人打機用，所以初時都無興趣試。
咁啱近排 Wright Fu 大大係 Discord 搞左個 Medium 香港文友群，有機會試用下，又覺得幾好用，值得介紹下喎。
睇番維基，Discord 喺 2015年推出，一開始係俾人一路打機，一路同隊友一齊傾戰略，類似 Skype 咁。但係喺上年開始，佢地 rebrand 咗做個多用途嘅通訊軟件。唔單止打機，金融、加密貨幣，或都其他興趣小組，都可以開個 Discord server 玩下。
有別於 Facebook 以 Newsfeed 或者 Timeline 為中心，Discord 係以 Server 為中心。例如 Wright 大搞嘅文友群，就係比一個香港文友（其實台灣或者其他用中文嘅文友都歡迎嘅，我諗）嘅 Server，類似一個社群咁。
一個人可以加入好多個 Servers，而貼心嘅係，喺唔同 Servers 入面可以用唔同嘅 Nicknames。咁就可以喺網友群組用化名，朋友群組就用番真名喇。
我一向唔鐘意演算法，但係睇哂所有訊息都唔可行。Discord 好用嘅地方，就係可以根㯫唔同嘅主題，開唔同嘅頻道，而且可以有某啲頻道係唯讀，睇番管理員提供嘅資訊，其他就開放比大家傾計。用戶都可以根㯫個人嘅喜好，只接收某啲頻道嘅通知。
呢個設計我覺得好好。我加入咗唔同嘅 Telegram 群組，覺得有兩個問題。第一，大家加入嘅時間唔同，新入黎嘅好多時候都唔清楚社群嘅內容同規則，會問一啲好多人問過嘅問題。喺 Discord server 整幾個唯讀嘅資訊頻道比新手就方便到大家。第二，雖然入得一個社群大家都有啲共同興趣，但係每個人關注嘅嘢始終唔同。例如如果有啲人入 Medium 文友群係只係想發佈文章同睇文，唔想吹水，就可以關閉吹水頻道嘅通知，淨係睇文章策展條頻道喇。
另外由於 Discord 係俾人一齊傾計打機起家，所以除左文字，仲有語音頻道。呢個我就無試過了，唔知係咪同 Clubhouse 類似呢。
另外一個我每次用新 App 都會留意嘅嘢，就係個 App 嘅盈利模式。以廣告作為主要盈利，演算法通常走唔甩，廣告都會愈黎愈多。如果係好似 Medium 咁唔賣廣告，要用戶課金，又會改黎改去搞好多麻煩嘢出黎。Discord 用嘅係 freemium 嘅模式，基本服務免費，但係另外比錢就可以買啲增值服務，好似可以上載多啲相，同埋多啲表情符號等等。希望咁樣可以取得一個平衡，令 Discord 得以繼續發展落去啦。
有時想喺 Facebook post 嘢嘅時候我都會諗，係咪真係咁想同我所有Facebook 朋友分享呢樣嘢呢？可能只係得一小部分特定嘅朋友有興趣咋喎。最後都係變咗只係喺 WhatsApp 或者 Telegram 同幾個朋友分享。如果有社群為本嘅 server 同埋唔同嘅頻道，應該會方便到唔少人。
聽講都有好多唔同嘅 Discord servers，例如大學、樂器，又或者幾個朋友開個 server 傾計都得。我覺得舊同學，或者住喺同一個屋苑嘅居民開個 server 都唔錯，可以開唔同頻道傾下工作、金融、旅行等等，應該會比 Telegram 或者 WhatsApp 啲巨型群組方便得多。
其實，我唔係咁憎 Facebook，我只係唔鐘意無得選擇，迫住要用佢嘅產品。而且，我覺得喺連結一個社群上，的確有其他選擇比 Facebook 更好。
鐘意係 Medium 寫文睇文嘅，都歡迎加入下 Medium 香港文友群啊。
