WhatsApp, Signal, Telegram — 到底用咩好？
轉會前要知道的事
過去幾日因為Whatsapp 改用戶條款令大家擔心私穩問題，好多人研究由WhatsApp 移民去Signal。其實Facebook 都真係好勇，美國大選又資訊審查又封戶口咁大件事，咁快WhatsApp又開多條戰線，仲叫人唔鐘意新條款就唔好用，睇死大家無左佢唔得。作為用家當然要響應，就算唔即時停用，都搵下其他Apps 分散投資先。
我唔係咩專家，不過 Apps 呢啲野不嬲都會搞清楚先用。有諗過下同搵左少少資料，就當拋磚引玉啦。歡迎指正。
首先，轉會嘅目的到底係咩？係避開政府監控，黑客入侵，定係脫離「萬惡嘅科技公司」？
無錯，WhatsApp 比起 Signal 同 Telegram 會攞多左個人資料，會收集位置、購物資訊等等，宜家仲話會同 Facebook 分享。不過，入面嘅對話始終係有點到點加密（end-to-end encryption），即係 WhatsApp 或者 Facebook 都唔會知你同其他人嘅私人對話內容，講安全方面其實唔算太差。如果手機無被解鎖，又無用雲端備份（例如 iCloud）嘅話，對話被執法機構或黑客睇到嘅機會不大。
個人黎講，轉場主要嘅目的係希望減少大型科企用個人資料去賣廣告同賺錢。雖然某程度上認同唔俾錢又用服務，點都要付出少少，但係比個人資料真係可免則免。有時 Google search 一次之後就不斷係 Facebook 見到同一個廣告都幾令人煩厭。
之後，係安全同方便之間，又應該點抉擇？
Signal 可能係最安全，斯諾登用就最啱，但係又係咪代表最適合所有人呢？我地平時閒話家常，講邊間餐廳好食、四大會計師樓唔俾同事收工等等，對政府或者黑客應該唔會有咩價值。如果係咁，係咪應該睇下安全同方便之間應該點取捨？
好多人都話轉 Signal，但係我就覺得對多數人黎講， Telegram 可能更加適合。Telegram 都有加密，不過唔係點對點（Secret chat 除外），係 Telegram自己嘅雲端有個 copy 。咁樣就會有政府要求交出資料、比黑客入侵、或者 Telegram 自己入侵用戶(!)嘅額外風險。不過 Telegram 講到明，解密嘅「鎖匙」放係好多個唔同國家，以避免單一政府要求資料。而且都唔見有咩專家能夠指出 Telegram有咩特別保安漏洞，所以泄漏資料嘅可能性都唔算大。
同時 Telegram呢種模式為用戶帶黎好多嘅好處。用戶可以唔用手機，只係用電腦黎登入，甚至手機同電腦一齊登入都得。個App 流暢啲，又唔使用電話咁多儲存空間。
Telegram 仲有樣野好，就係加朋友唔使比電話號碼，可以用 username。同唔係好熟嘅人傾下，又唔想比電話號碼人就最方便。仲有好重要嘅就係，Telegram 啲 stickers 最靚 lol
有啲人電話大把位，覺得好似 Signal 咁唔做雲端備份無所謂。不過咁就要留意手機無左就咩都無哂，而轉電話號碼個時都有啲煩。就睇下你覺得值唔值得，同埋你平時同朋友會傾啲咩啦。
咁即係用邊個好？
呢個問題，唔同人有唔同答案。除非好有決心，否則完全唔用 WhatsApp都唔係一朝一夕可以做到。我就打算想將部分對話轉去 Telegram 同 Signal ，減低對 WhatsApp 嘅依賴。WhatsApp 咁串，我地都好應該話俾啊 Mark 哥聽我地唔係無左你就唔得嫁。
而同時，我唔會覺得用左 Signal 或者 Telegram 就一天光哂。 WhatsApp 賣盤前都好重視私隱，而 Signal 同 Telegram 雖然目的唔係賺錢，但係都要維持佢地開發成本，到時又唔知會搞咩出黎。總之都要有再轉場嘅準備。
不過，最重要嘅反而唔係用咩 App，而係用嘅時候嘅心態同習慣。網上世界係唔會有絕對安全。就算你做哂所有安全措施，都難保你朋友無咩安全意識俾左部電話其他人睇。今時今日，無論現實生活定網上世界，都要萬事小心。
p.s. 新一年試下新野，用廣東話/口語/粵文寫文。我寫就快左好多。希望大家唔會睇得太辛苦啦。
