Wordle — 輕鬆字謎遊戲
近排好多令人心情沉重嘅新聞，有時都想搵啲小遊戲玩下放鬆下。前幾日喺Facebook 見到有朋友 post 啲類似咁嘅 status：
Wordle 215 4/6
⬜🟩⬜⬜⬜
🟨🟨⬜⬜⬜
⬜🟩🟨🟨⬜
🟩🟩🟩🟩🟩
有啲好奇所以就上網搵咗黎玩下。原來係一個叫做Wordle 嘅字謎遊戲，由一個英國人發明出黎，同佢鍾意玩字謎嘅伴侶玩，之後意外爆紅咗。
遊戲玩法簡單，每日有個五個字母嘅英文生字，比六次機會我地估，估完一次之後會有提示你邊個英文字母係（1）字母又啱位置又啱（綠色格）或者係（2）字母啱但係位置唔啱（黃色格）。雖然可以廿六個字母任揀，但係每次估嘅字都要係字典有嘅字，唔可以就咁估ABCDE。
有啲人提議第一次試就試 ADIEU（我英文差，完全唔知有個咁嘅字），試哂啲響音。我就比較鍾意試 COINS 同 TRADE 先，包咗大部分嘅響音同埋常用字，去到第三次先認真諗下試咩字。
呢個遊戲令我諗番起細個我都幾鐘意玩嘅 Mastermind（睇下圖可能會記得），要估由唔同顏色組成嘅四位密碼，估完一次之後就有白色同紅色標記提示顏色同位置有幾多粒正確。不過轉咗做文字版，多咗一定要係一個英文字嘅限制，感覺又好唔同。
雖然Wordle好似無咩特別，但我認為都有幾個原因令到佢爆紅：
1. 易學難精
用網站唔用App，無廣告，玩法簡單，好快學得識。但係真係玩嘅時候，尤其係第四五六次估，都要絞盡腦汁。一方面得番好少機會，另一方面有之前嘅提示，要好專注諗得好清楚決定用咩字。估到嘅時候都幾有滿足感。
2. 每日一字
宜家好多遊戲都引人課金，用唔同方法引你一路玩落去，永無止境。但係Wordle 就唔同，每日一字，幾分鐘就玩完，輕鬆好多，又唔怕沉迷。等車嘅時候玩下好似開心過碌 Facebook。
而且，全世界都係同一個字，大家就可以傾下今日難定易，同估嘅策略。又會有少少唔夠喉想聽日快啲玩。
3. 同朋友分享
講到同朋友傾，我同咗啲朋友分享Wordle，之後佢地仲有興趣過我，每朝就比我睇佢地嘅成績（即係有黃綠格仔幅圖）。睇完之後，大致有個概念今日係難定易，之後一得閒就想玩，同埋有少少friendly competition 睇下邊個快啲估中。
不過我啲朋友好勁，好多時都係三次就估到，我就通常都要四或者五次先估到…..
如果大家都想玩下嘅話，可以去呢度：https://www.powerlanguage.co.uk/wordle/
想睇下點樣係語言學角度分析Wordle，就可以睇下奇啲 Kei4di1呢篇。
