騰騰亂譯倫敦地鐵I（十二）

博君一笑嘅站名

話說，今日（10/8/2020）睇 Jeromy-Yu von 寰雨膠事錄 個Facebook page見到有人喺連登公佈話自己譯咗倫敦所有地鐵站做港式中文。但係，我望下個post，覺得人哋音譯成分太重，好似唔多尊重人哋地名嘅來源。

嗱，我真係有講嘢㗎。

而你Jubilee line用「租庇利綫」唔用「銀禧綫」嘅解釋竟然只係咁？

連登cap㗎。

我接受唔到。

我早排睇返本書講倫敦地鐵嘅設計史，入面有提到Jubilee line本身係叫Fleet line，已經定咗係灰色綫，因為原本嘅計畫係想佢行入Fleet Street，所以七十年代開綫嗰陣個總站係喺Charing Cross，等之後延綫嘅時候直接隊出去。只係之後倫敦政府冇通知過交通局就決定要刷事頭婆鞋，開綫前幾年將呢條新綫改名紀念女王登基25週年。但係改名當時已經有唔少指示牌已經整好，所以搞到要貼貼紙遮住Fleet line呢個名。然而，譯名方面叫「銀禧綫」係絕對正確。

而嗰本書嘅作者comment都話好彩當年改咗名，如果唔係後尾改咗plan唔行Fleet Street真係唔知點同人交代。

就係咁，我決定再加速，而家我同你盡快寫哂南北綫，跟住我就出銀禧綫。（唉吔，俾你發現我未譯哂所有名㖭。）

嗱，愛德湖下一個站就係呢個站喇。

Burnt Oak station. Picture from London Moving on Flickr.

Burnt Oak呢個地方呢，羅馬時期係個垃圾場（1971年考古發現），1754年先開始有呢個名，但係去到1860年代之前呢，呢個地方名係叫Red Hill嘅。

咁我未去過嗰度，唔知嗰度確切嘅地型，不過照佢個舊名，呢個地方應該係座山嚟。

至於Oak係咩樹呢？我真係懶得查字典，我搵大角嘴幫下手。