係咁「先」

究竟個「先」字係擺先吖，定係先擺其他嘢先先啱先？

嗱，相信大家講廣東話/香港話/港式粵語講咗咁多年，有好多語言方面嘅嘢，大家都講到順哂，都未必醒起呢個point係個好奇怪嘅位嚟。

就好似呢次講嘅「先」字。

我哋細個學中文嗰陣應該都學過「先……，再……」嘅句式嚟表達做事嘅先後次序。我諗好多人都咁樣用慣哂，跟住就可能改後面個連接詞，轉咗做其他嘅嘢（例如：然後、至），但係都係用「先」呢個字表達首先做嘅嗰件事。

留意：呢度講嘅「先」係擺喺動詞詞組嘅前面。喺正常情況下，「先」係唔會擺喺句子嘅最開頭。如果見到「先」字擺開頭嘅話，好大機會係配咗詞，解「死咗嘅邊個」，例如「先人」。

Photo by Glenn Carstens-Peters on Unsplash

例如，可能會有細路咁講：「我哋而家先做功課，然後再溫默書。」（嗱，我有教書嘅朋友話喎，而家呢段時間開Zoom上堂live嘅時候最可以確保所有學生都出現嘅活動係咩呢：默書。但係點交呢？）

講開我哋會轉（甚至減咗個）連接詞，其實呢樣都可以算係港式中文嘅特色。但係同樣都係呢樣嘢，我哋係成日都俾D國語人/普通話人話㗎。話咩呢？咪就係我哋D連接詞錯鬼哂囉。

不過咪住先，廣東話係咪真係成日咁講先？

好似又唔係喎。聽返大D嘅人講嘢就會發現，其實佢哋要表達先後次序嘅話，個「先」字係擺後嘅。例如，應該有唔少長輩同細路講：「你哋一個二個讀好書先呀，大個大學畢業之後至拍拖都未遲呀，知冇？」（You know what? It’s a lie!到你大學畢業就會催你結婚㗎喇，知你冇拖拍嘅時候仲會有成班三姑六婆出嚟問候你㖭。）

另外呢，「先」嘅後面可能會冇後續嘅事。例如：

我行開陣，你坐低先。

Photo by Nathan Fertig on Unsplash

咁呢度嘅「先」做咩事呢？呢度要記住一點，語言好多時都有implication嘅。咁呢度暗示嘅後續事宜係「我返嚟之後有嘢搞（，可能係傾偈，可能係做嘢，可能係飲醉少少……）」。所以「你坐低先」嘅「先」表達嘅係一件暫時嘅事，之後嘅事陣間再講。

跟住就睇下「先」喺句子嘅結構係點喇。因為，原來喺廣東話，個「先」字可以係形容詞，亦都可以係副詞。

所以睇下以下例子：

如果有人問：「你想邊個政治人物死先呢？包括但不限於甴維尼、柒婆、689、PK、好困擾。」