為什麼愈高息的存款反而會養出愈不忠誠的客戶呢？
最近多咗同畢業無耐既同事傾偈，發現一啲對我嚟講經已習以為常既傳統知識，原來對普羅大眾嚟講都唔係咁 obvious (唉，做咗 old seafood 喇)，今日分享一個：
理論上存戶當然係想息口愈高愈好，但係點解高息存款無辦法養出忠誠既客戶呢？
低息錢同高息錢，兩種截然不同既錢
呢個就關係到銀行戶口既兩個作用：投資回報 & 銀行服務。
「投資回報」好易明白，如果戶口係 1% 厘息，今日存 $100，出年畀番 $101 你，就係咁簡單。咁當然如果係為咗追求回報，就一定唔會放活期戶口，而會放定期戶口。
以今日呢個時空嚟講，新資金做半年 $200,000 起跳大概有 1.5% — 2% 不等，主要都係睇銀行 (一般細銀行息口就好啲) 同埋有無咩特別玩法 (例如要你用手機開戶、轉少少外幣、登記個水電煤等等)，多啲要求息口會好啲咯。
「銀行服務」都好易明白，大家如果有多咗既 cash 都會放喺銀行唔會放喺屋企，除咗驚畀人偷，仲有放喺銀行始終方便啲，仲可以用嚟找卡數、交水費、FPS 畀人、買旅遊保等等，仲可以有事起上嚟做資產證明，如果啲錢喺晒屋企，唔同真係影張相畀對手話你有幾多錢咩。
咁大家分清楚呢兩種作用之後呢，就好易明喇。
息魔 vs. 正常人
追求「投資回報」既屬於高息錢，存戶 (俗稱息魔) 認息唔認人，哪怕你今日個息口係全港最高都好啦 (say 4 厘)，個定期一到，只要對手畀你高 0.0000001 厘，息魔都會同你 say goodbye，頭也不回咁走咗去。
高息養出反叛客，道理莫過於此啦。
相反追求「銀行服務」既人諗法就好唔同，只要個客經已 stick to 咗你間銀行，啲 payroll 呀、水電煤、FPS、PPS、支票戶口、自動轉賬、股票戶口等等等等用晒你間銀行，哪怕你只係畀得 0.1 厘，而隔離銀行畀到 1.1 厘，個客都唔係咁容易走，難聽啲叫綁死個客，好聽啲就叫 loyalty 咯。
而事實上就算你可以好似啲電話公司咁，買新機嗰陣幫你做埋「天機轉移服務」，幫個客乜嘢 settings 都無縫接合都好啦，個客都未必真係想走，始終佢追求既根本唔係「回報」，而係「銀行服務」呢～
What is the Implication?
如果要量度一間銀行既 loyal money，即係 safe money，好吊詭地我哋一般會睇銀行既低息存款 Low Cost Deposit (又稱 CASA — Current Account Savings Account)，而唔會睇 High Cost Deposit 呢啲 disloyal money 喇。
所以如果我哋要比較兩間銀行既存款結構，比例上愈多CASA 既銀行唔只資金成本愈低，存款亦都愈忠誠，喺 Cost Side 方面既表現就比較好喇。
下期預告
咁銀行要點樣先有效養到忠誠既客戶呢？一般我哋會分 3 個角度出發，有邊個角度呢？我哋銀行小知識 (8) 再講啦！
最近我開始諗緊 Medium 會唔會好快會有非走不可既一日，如果大家唔會覺得畀個 like 太麻煩的話，都好想大家可以 like 呢個 FB page，有咩新動作等我可以方便 update 到大家。
