銀行閑談 (170) — 虛銀 eDDA 戰更新 — 一年過去虛銀入錢係易咗定難咗呢？

喺上年 3 月初寫完虛銀 eDDA 戰情況，喺 3 月下旬市場就傳出消息，話 eDDA收費風波暫告一段落，各銀行就eDDA「轉錢」所徵收的費用，由以往「一刀切」改為「分層收費模式」，即係單次過得少、手續費就畀得少，銀行間費用結算亦由各有各收 (好聽啲叫 OTC 啦)，變成由 HKICL 中央結算，每月向各銀行發出賬單，大家就唔使再嘈，亦唔好拖數啦唔該。

所以喺上年 3 月開始，如果銀行唔甘願被對手欺壓，又因為無得再賴數 / 拖數，都紛紛斬纜，或者喺「分層收費」之下，大幅減低每次入錢嘅限額，寧願叫個客分 10 分入錢，用盡個低層收費，都唔畀個客一次過入一大嚿錢，財技啦吓。