華田銀行
Published in

華田銀行

銀行閑談 (171) —BNPL Buy Now Pay Later 公司到底點搵錢嘅呢?對傳統銀行又有咩衝擊呢?

唔知大家有無用過 Buy Now Pay Later (BNPL) 嘅服務,我講緊唔係 Livi Bank 嗰隻 BNPL 偱環貸款 (唔係信用卡嚟架),而係 Atome、Hoolah 一類 BNPL 公司。

呢類 BNPL 公司嘅 business model 都幾特別的,「技術上」講可以令消費者喺無任何 credit facilitiy 下做到分期付款,攞到 short term financing 但又唔需要將交易登記信貸資料庫 (即係 TU 啦) ,同時 BNPL 公司又可以唔需要有任何財務公司 / 銀行牌照,仲可以做到商戶、BNPL 公司、消費者三贏局面,金融創新就呢啲喇。

銀行閑談會連續 3 集同大家同大家傾幾個關於 BNPL 嘅問題,今集會先下一BNPL 公司嘅運作模式。佢同信用卡分期有咩根本分別呢?佢哋點樣搵錢嘅呢?對銀行有咩衝擊呢?

對 BNPL 有興趣嘅朋友就睇落去啦!

BNPL 同信用卡分期嘅根本分別 — BNPL 本質上先係真真正止嘅「分期付款」!

而家香港玩緊嘅 BNPL,一般會先要求消費者先畀 1/3 嘅款項,30 日後畀第二期 1/3、60 日後畀最後嘅 1/3,感覺就同我哋走去豐澤百老滙買電器直接做「商戶分期」、又或者自己先畀錢再喺 App 度撳幾個掣同銀行做「消費分期」好接近喇。

不過 BNPL 同「商戶分期」同「消費分期」有兩個好根本性嘅不同。

首先 BNPL 本質上先係真真正正嘅「分期付款」,而「商戶分期」或者「消費分期」只係「分期還款」!點解咁講呢?

好簡單,假如商品價值係 $3,000,就算大家信用卡只係得 $1,000 信用額,大家用 BNPL 的話一樣可以過數畀錢,但係「商戶分期」或者「消費分期」就唔得喇!

因為 BNPL 係直接將總 $3,000 數分成 3 份向大家收款,所以就算信用卡得番 $1,000 信用額都可以過數,只要大家喺 30 日後有另外 $1,000 信用額畀 BNPL 收第二期 $1,000 就可以喇,所以話 BNPL 先係真正嘅「分期付款」。

而「商戶分期」或者「消費分期」完全唔係呢種邏輯,銀行先會喺大家將信用卡「扣起」$3,000 信用額,即係大家已經向銀行借咗 $3,000,不過銀行唔會要你即刻還,而係分 3 個月嚟還,所以話「商戶分期」或者「消費分期」只係「分期還款」喇。

第二個好大嘅分別,就係 BNPL 係根本唔需要大家有信用卡的!係吖!你用 Debit Card 都畀到錢架!

其實呢個係上面第一點嘅延伸,BNPL 喺技術上係「分期付款」而唔係「分期還款」(係唔係法律罅下集再傾),所以佢根本唔需要大家有 credit facility 喺背後揹住個商品價值。

我自己親身試驗就係用 Debit Card 一樣可以過到數 (當然要你個戶口有錢啦!),Credit Card 並唔係必須,所以就算你 TU 唔合格、無收入、唔想差銀行任何錢,一樣都可以用到 BNPL 嘅「分期付款」服務喇。

咁 BNPL 公司點搵錢呢?佢無收大家利息個喎!

一般銀行「消費分期」嘅盈利模式好容易明白,就係大家同銀行做個 agreement,大家可以將一張大單「分期還款」,銀行就每期就少少手續費,唔難明啦。

咁 BNPL 個盈利模式係點呢?大家將商品價格分 3 期畀,中間無畀利息個喎!其實 BNPL 個盈利模商同「商戶分期」比較接近喇。

大家去電器鋪買部價值 $12,000 嘅大電視,電器鋪會提供一啲「商戶分期」計劃,當大家碌卡之後,銀行並唔會將全數 $12,000 交畀商戶,而會喺中間打個折 (例如 5% 啦) 做手續費。而點解有時啲「商戶分期」會免息、有時又有息,就好睇個商戶想唔會想將個「商戶分期」嘅成本轉價畀消費者咯。

而 BNPL 公司嘅角色就好似一間提供「商戶分期」嘅銀行 (只係好似,因為技術上佢唔係一間銀行,亦無提供 credit),一部 $12,000 嘅大電視,BNPL 公司會喺總額上面打個折,網上睇到嘅公價一般係 5% 啦,佢會先畀 $12,000 減 5% 畀商戶,當消費者如期分 3 期錢「付款」畀 BNPL 公司,佢就淨賺 5% 喇!

BNPL 對銀行嘅衝擊 — 就是比你「更好」就是了

BNPL 席捲全球多個城市,對傳統銀行都有一定衝擊,因為佢喺好多方面都比傳統銀行更好,我嘗試歸納 3 個 point 啦:

一、BNPL 直接蠶食信用卡業務
BNPL 喺無需要入息 / 資產証明下都可以令消費者享受信用卡「延遲付款 / 還款」嘅功能,亦直接幫到本身比較難申請信用卡嘅一眾 underserved。

當我用 BNPL 接駁 Debit Card 可以做到同信用卡一樣嘅效果,而還款期更長,我仲有無需要用銀行嘅信用卡呢?

二、BNPL 比一般「消費分期」同「商戶分期」都更快、更方便、更安全。「商戶分期」有一個好大嘅問題,就係「收款銀行」同客戶嘅「信用卡銀行」必須要係同一間先可以做到「商戶分期」,所以大家會喺豐澤百老滙見到好多部卡機一字橫排,為嘅就係方便唔同信用卡客人,而由於每部卡機都有成本,所以「商戶分期」一直好難大做。

而「消費分期」就無呢個「同銀行」嘅限制,但係相關手續費就要由消費者自己承擔,消費者亦需要承擔買完嘢但銀行唔批分期嘅風險,咁大家就未必肯做啦。

BNPL 就補足咗「商戶分期」同「消費分期」嘅問題,BNPL 行 PaaS,商戶只需要做 API 接駁,唔需要十間銀行嘅卡機都可以做到所有客人嘅生意。消費者亦都「零手續費」享受到分期服務,亦無買完嘢但係銀行唔批分期嘅風險,咁明顯係一個比較好嘅產品啦。

三、BNPL 帶動嘅人帶同消費力,已經直接挑戰一眾銀行信用卡優惠
傳統上銀行會同好多商戶做聯營優惠,例如銀行 A 客戶去酒店 Z 消費滿 $1,200 減 $100 咁。

酒店 Z 願意合作,除咗睇中銀行 A 廣大 card base,仲好多時因為酒店 Z 係用銀行 A 收款,所以銀行 A 亦有空間喺呢種 “on-us” (即係銀行 A 信用卡客戶喺銀行 A 收款嘅商戶消費) 情況下提供一啲優惠畀商戶。

所以信用卡係一個「商戶」、「消費者」雙邊市場,要兩頭都大先做得起,亦只有大行有能力提供咁多信用卡優惠畀客戶。

而 BNPL 就係一個好強嘅競爭者,因為「消費者端」更容易入會,無審批卡嘅限制,過程亦更快更方便;而「商戶端」接駁容易,無卡機嘅成本問題,基本上後台少少設定、前台手機再接駁 POS 就可以收款,一入會就可以接觸一個龐大嘅消費者群,BNPL 公司仲有晒 targeting 幫商戶去搵客人,呢啲都係傳統銀行未必能夠提供嘅服務喇。

點解 BNPL 公司唔需要財務公司 / 銀行牌照,又可以喺「技術上」向消費者提供短期融資,同步仲令消費者喺無 credit facility 下攞到 credit,仲要唔需要落 TU 呢?

今集介紹咗 BNPL 公司嘅營運同盈利模式,仲有佢對傳統銀行嘅衝擊,希望令大家可以多啲了解呢個新興行業。

講咗咁多 BNPL 嘅優勝之處,佢嘅成功關鍵之一就係完全跳過所有 credit facility 下向客戶提供分期服務,即係:

  1. 客戶無需要申請信用卡
  2. TU 完全無記錄
  3. BNPL 公司「技術上」無提供任何 credit facility
  4. BNPL 公司本身更無財務公司 / 銀行牌照

到底係點樣做到嘅呢?下集再同大家銀行閑談喇。

關於華田:
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。
2021 年開始 Medium 只會發佈部份文章,想知最新銀行 insider insight,就要訂閱我 Patreon(patreon.com/watin) 喇!2021 年 8 月 Medium 再次改制,讀者可以選擇將一半既 Medium 會費撥繳至你喜歡既作者。如果你想喺 Medium 上面支持我,可以去以下呢條 link (watin.medium.com/membership)登記做會員哦!華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄: https://wealth.hket.com/sraw116/華田銀行

--

--

--

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store
華田 Watin

華田 Watin

Wallace Tin || Sloppy Mercenary || Banks, Languages & Mo-liu Things || fb.me/WatinResearch || patreon.com/watin || watinmedium@gmail.com

More from Medium

Corporate Venture Funds, Startup Studios, and Accelerators. Why the Buzz?

State of the Market: The Goalposts

The rapid rise of RapidAPI: Why we believed in this developer-led startup when the CEO was just 15

💊Our 12th Investment: OK Capsule — Enabling Personalized Nutrition At Scale. 💊