銀行閑談 (175)— 乜嘢叫 Central Bank Digital Currency (CBDC) 呢？「央行貨幣」唔係一路都係「數碼化」嘅咩？

Patreon 原文：https://www.patreon.com/posts/67966996

繼 4 月底 HKMA 出咗 discussion paper 向各界徵詢對香港發行「央行數碼貨幣 」(Central Bank Digital Currency, CBDC) 嘅意見後，呢幾日金管局又宣佈聯合以色列銀行同國際結算銀行創新樞紐 (Bank for International Settlements Innovation Hub, BISIH) 為 CBDC 進行聯合研究。

銀行閑談會一連幾篇講吓 CBDC 嘅話題，首先會講一個好基本嘅概念問題：

成日都話全球央行量化寬鬆「印銀紙」，不過大家都明白「銀紙」係唔需要真係「印出嚟」，央行只需要透過喺市場購買資產，找數嘅時候喺結算銀行度「撳個掣」，錢就會自動出現，根本唔需要油墨紙張，所以話「央行貨幣」從來都係「數碼化」架啦。

咁到底乜嘢叫「央行數碼貨幣」呢？

既然有「央行數碼貨幣」，咁又存唔存在「非央行數碼貨幣」、「央行非數碼貨幣」、「非央行非數碼貨幣」呢？

今集會由清華園講到澳洲央行，又由 retail bank 講到 wholesale bank，大家又估吓佢哋同「央行數碼貨幣」有咩關係啦！

清華園內最流通嘅貨幣

記得當年嘅清華園讀書嘅時候，修咗一門金融史嘅課，老教授話「貨幣」未必係我哋想像中有一個毛主席頭像喺上面嘅先可以叫「貨幣」，就好似佢幾十年前仲喺清華園做學生嘅時候，清華園內最流動嘅貨幣叫「飯票」。

大學飯堂因為有國家補貼 (國家重點大學喎！)，所以價格真係超平，亦所有人都可以食，不過食堂係認飯票唔認人的 (我當年就變咗電子飯卡啦)，所以只有師生先買到嘅飯票就成為咗一種可以「尋租」嘅「貨幣」，例如修一次單車要 5 蚊，學生就可以用面值 1 蚊嘅飯票換到 5 蚊嘅修車服務，繼而修車師傅可以食到市值 10 蚊嘅飯。

所以當年嘅學生要去修車 (清華本部有 306 公頃咁大，即係 430 個足球場、16 個維園咁大，而北京係一片平地，用雙腳係去唔到課室的)，就會帶齊各家食堂嘅飯票，亦所以話「飯票」先係清華園內最流通嘅貨幣！亦係清華園內「非央行非數碼貨幣」嘅代表！

大家或者會問「飯票」同 CBDC 有咩關係，我係想大家明白，數幣其實可以有好多形式，亦有好多唔同嘅層面去分析，未必係國家央行發行嘅先可以係貨幣，例如大家用緊嘅滙豐銀紙就已經唔係金管局直接發行喇！