關於寫文，華田一直都有一個 pain point，就係題目太多但係做 research 既時間太少，有時候啲 research 其實好 tedious，例如其實有幾多間銀行有類似 function 、報紙有無報過呀邊個高層有無講過既某番說話 (好多時 insider news 同 public info 我會亂咗，一個唔小心寫咗啲商業機密我會畀人炒魷架) 、我知係邊份 HKMA circular 但係唔記得邊頁邊行、某某出咗隻新嘢我知佢勁但係未得閒試等等。
所以大概喺 2 個月前左右，華田開始咗一個小計劃，就係：
請人做！
咁啱我又識一班商學院既大學生，咁就梗係問吓人有無興啦，反應就大家都估到，retail banking 啲嘢咁低賤，當然係食檸檬多過食橙，不過都好彩地有 兩三個傻吓傻吓既肯睬吓我，又唔嫌人工低 (有 pay 的，高過最低工資，叫做好過做看更咁)，咁就開始咗試吓點合作。
有人幫梗係好啲，不過做落先發覺唔係咁容易，我個腦有一大堆諗法，但係人哋唔係你條蟲吖嘛，你要好有條理咁話畀佢哋知到底你想要乜、覺得個 sound bite 係乜、個有趣位又係乜咁，仲要做個 Trello 開個 Slack 畀大家 work together，都幾多功夫架。
但又說穿了， retail banking 既嘢就係啲一個幾毫、呀婆都睇得明既嘢，唔係嗰啲什麼侵侵又徵幾多百億關稅、乜乜又有隻乜乜 IPO ，有時候我會有一種 hey friends, don’t you feel it’s really interesting? 既感覺之餘，又會有一種 yea, it’s really so 19 既心虛感。
廢嗡完，入正題，未來「華田銀行」將會有直接由呢幾個傻仔出品既文章，始終我覺得個 research work 係佢哋既，可以引導到佢哋寫一篇我覺得有獨特見解又有趣既字仔出嚟，都算係為地球做番件小事。
如果唔係華田手筆既，會喺文章末段標明，所以大家如果喺未來睇到啲字唔多似我寫既 (例如無咁多粗口、別字、錯字、兜圈、爛 gag、粉 gag ...) ，正常既，儘管繼續支持就好，總之唔會令你失望架喇。
