Basis mewn diwrnod
You can read this story in English here.
Awstriad, consuriwr, a seiclwr proffesiynol. Nid dechreuad jôc mo hwn, ond rhai o’r bobl y cyfarfûm â hwy ar fy niwrnod cyntaf o weithio i Basis.
Yr Awstriad dan sylw oedd Katharina, fy ‘hyfforddwr’, sy’n fy helpu i setlo i fywyd yn Basis. Ac mae yna sawl peth i ddod i arfer â nhw. I ddechrau, cyfarfu Katharina a minnau ar fy more cyntaf ym Mhencadlys Rhithwir Basis: swyddfa ddigidol ar gyfer defnydd mewnol Basis, ar lwyfan Welo. Gallwch gynnal galwadau ac anfon negeseuon sydyn, fel y gallech ddisgwyl, ond mae’r gofod wedi’i osod i efelychu amgylchedd swyddfa go iawn, gyda gwahanol ardaloedd wedi’u neilltuo ar gyfer dibenion gwahanol: ystafelloedd cynadledda ar gyfer cyfarfodydd tîm mawr, meinciau picnic i roi gwybod i bawb eich bod yn bwyta, ac ystod o fannau ar gyfer gwaith unigol neu grŵp bach. Fel swyddfa go iawn, gallwch chi bicio draw a sgwrsio ag aelodau eraill o’r tîm ar hap (sy’n ddefnyddiol iawn i aelod newydd o staff sydd â llawer o gwestiynau!), ond ar yr un pryd gallwch chi ddal i fwynhau buddion gweithio o bell (i ddechrau, does dim cymudo i’r swyddfa hon)! Mae fy amser yn Basis eisoes wedi agor fy llygaid i bosibiliadau newydd i weithio o bell. Fel un sy’n hoffi cadw i’m rhigol, rwyf eisoes wedi dod o hyd i’m man arferol ym Mhencadlys Rhithwir Basis, ar un o’r soffas lliw hufen yng nghanol y swyddfa, wrth ymyl coeden fawr.
Ond nid oedd fy niwrnod cyntaf yn gwbl rithwir. O ganol dydd, cynhaliwyd fy anwythiad mewn person. Dyma ble mae’r consuriwr yn dod i mewn, nid mewn pwff o fwg, ond ar drên i ganol Caerdydd. Eglurodd Joe, sef cyfarwyddwr Basis, wrth i ni gyfarfod yn Sgwâr Canolog Caerdydd ei fod yn gonsuriwr proffesiynol yn ei amser hamdden. Roedd hyn yn ymddangos yn rhyfedd o addas. Cyn dod i Basis roeddwn i’n cwblhau PhD ar syniadau Cristnogion cynnar am hud a lledrith — felly Joe yw’r bont berffaith rhwng fy hen alwedigaeth a’r yrfa newydd hon!
Yn y cyfarfod hwn, esboniodd Joe ymhellach am Basis, y gwasanaethau cyhoeddus maent yn eu cefnogi, a’r agwedd Agile at waith y mae Basis yn ei hyrwyddo. Mae Joe yn amlwg yn angerddol am ei waith, ac roedd yn wych clywed am ei uchelgais ehangach o gefnogi gwasanaethau cyhoeddus yng Nghymru, a’i awydd i gynnig y gefnogaeth hon yn y Gymraeg, gweledigaeth y gallaf ymuniaethu â hi. Cynhesach byth oedd croeso Joe oherwydd y cynhaliwyd yr anwythiad yn gyfan gwbl trwy gyfrwng y Gymraeg, fy mamiaith.
Doedd y diwrnod cyntaf ddim yn waith i gyd. Gyda’r nos ymunodd gweddill ‘Tîm Cymru’ Basis â Joe a minnau — Scott (cyn-seiclwr proffesiynol) ac Alys (y darganfyddwn yn fuan iawn ei bod yn athletwr wych ei hun) — am ddiodydd croeso. Arweiniodd y diodydd yn fuan at fwyd, ac yna at fwy o ddiodydd, ac yn y diwedd daethom o hyd i far lle gallem chwarae tenis bwrdd a bwrdd-siyffl. Roeddwn yn bryderus i ddechrau pan ganfu Alys a minnau ein hunain yn wynebu Scott a Joe mewn tenis bwrdd, ond mae’n ymddangos bod dwylo Scott yn fwy addas ar gyfer dolenni beic na rhwyfau tenis bwrdd. Nid bob dydd y cewch chi frolio am guro athletwr proffesiynol mewn camp Olympaidd! Ar ddiwedd y diwrnod cyntaf, wrth i mi adael ‘Tîm Cymru’ a theithio adref, ni allwn ond teimlo’n gyffrous am yr wythnosau a’r misoedd o’m blaen.
Gwibiodd gweddill fy wythnos gyntaf yn Basis, a oedd yn llawn cyfleoedd a phrofiadau diddorol: dysgais i ddefnyddio llwyth o feddalwedd newydd (Trello, Miro a ClickUp, ac enwi ond rhai); arsylwais ar gynllun hyfforddiant ymchwil defnyddwyr i’w gyflwyno i GIG Cymru; a threuliais lawer o amser yn gweithio ar farchnata Basis. Ar y nodyn hwnnw, os ydych am glywed mwy gennym, yn enwedig wrth i ni geisio cyfrannu i’r sgwrs ar Agile yng Nghymru, dilynwch fi fy hun, Joe a Basis, a gwnewch yn siŵr eich bod yn dilyn Basis ar Medium.