讀摩理臣山小學嗰幾年盞鬼少年時｜讀番書雜憶：皇仁的歲月（第一章）Part 2
讀摩理臣山小學嗰幾年，學校啲嘢真係記得唔多。
除咗喺「錫克廟」踢波就係有時去體育路馬場出面嘅空地踢波，不過會俾人趕。印象中唔會走入馬場，只會遙看一段距離叫大石鼓嘅地方。有個同班姓陳嘅同學住喺霎東街，有時放咗學踢完波，就去佢屋企玩。嗰度嗰陣時啲屋係住人嘅，兼且啲大厦唔係好多層，唔似得而家全部係食肆酒吧同埋鋪頭。喺同學屋企玩完就自己搭電車返屋企，唔駛人湊。霎東街附近就係鵝頸橋，而家橋底出名打小人，重有示威人士唔入維園會途中加入會係嗰度等候。嗰個年代同一地方重係一條大坑渠！
話說回頭，係摩理臣山讀小學剩係記得個譚校長同教英文嘅Miss Chan。重有姓黃嘅班主任。有一次Miss Chan罰我企喺校長室門口，譚校長冇問因由，我覺得佢咪咪咀喺度笑。Miss Chan同Miss黃後來都做咗校長，Miss Chan做「北角官立小學」校長而Miss Wong嗰間就叫做「堡壘山官立小學」。幾年之後，我哋一班男同學想見返啲女同學攪re-union，都會問黃校長借堡壘山官立小學地方，黃校長又會借俾我地。不過記憶中出席嘅男同學眾多，女同學就只得一個。我地就輪流同佢影相。我同呢個女同學嘅相，珍而重之，但係而家又再搵唔翻！
講起男女同學，還記得一件事。當年唸五六年班，兩小無猜的年紀，又會開始對異性發生興趣。而有點耳濡目染嘅係電影宣傳廣告對一啲性感女明星嘅描述：艷星呀、肉彈呀，呢啲名詞係令到我輩產生好奇同幻想。
呢一年聖誕節，同學們都花費零用錢買聖誕咭送俾老師同埋友好嘅同學。同學之中有一位俾我地嘅印象係最道貌岸然，我哋（我同兩三個同學）送俾佢嘅聖誕咭，裡面當然印有Merry Christmas and Happy New Year，但咭嘅封面係一個意大利肉彈：應該係珍妮羅露寶烈吉妲（要不然就是蘇菲亞羅蘭），呢個同學拆開信封，看了看，面色大變，不單要退回聖誕咭還要我們鄭重道歉！唉！
而後來我和這位同學一起入咗「皇仁中學」，他最後入咗香港大學，畢業後結婚，對象係當年摩理臣山小學同班的一位最靚嘅女同學呀！
入皇仁難唔難？當年喺官立小學讀六年班嘅，大概有啲優勢。我哋都要考小學會考，不過考小學會考我諗都係啲父母緊張過我哋！
哈哈果陣時會考放榜會賣報紙咖，放榜果日，買張華僑日報，睇住啲冧巴，搵自己個名… 搵到… 哇哈哈，係老竇讀過嗰間殖民地政府官辦嘅皇仁中學！
（待續…）
::煉藝在道〉在在共識者｜專欄::文 ◣ 莫昭如
戰後出生世代，火紅年代積極投入社會活動的「文化份子」。
隨筆回顧、檢視、再思這大半個世紀，浪盪於大時代洪流，滾動過的波濤，
及後，又匯聚著甚麼新的湧動～
總編按：延伸資訊┐
五、六十年代香港人會知道這些西方名星，「珍娜羅露寶烈吉妲」是當年香港中文譯名，現在在維基找到的是另一款譯名了。要說香港文人將洋人譯名譯得傳神，原來香港當年有名的報界文人「三蘇」曾將「珍娜羅露寶烈吉妲」戲譯為「真奶裸露煲裂雞蛋」。「珍娜羅露寶烈吉妲」譽為意大利老牌艷星，曾與「蘇菲亞羅蘭」齊名。粵語長片裡歌仔都有得唱，是鄭君綿、鄭碧影合唱的《才子佳人》，頭一句就係：「～擰柳腰好似蘇菲亞羅蘭，又似惹火寶烈吉妲～佛見到都日會起大痰，花靚仔想到心爛～」
珍娜羅露寶烈吉妲（Gina Lollobrigida）
（1927年7月4日－），義大利女演員、攝影記者、雕塑家。她是1950年代及1960年代早期，歐洲知名的女演員，亦係當年具代表性的性感符號。至今，她活躍於義大利人與意裔美國人的相關事務中，特別是國家義裔美國人基金會（NIAF）的最大支持者之一。（☛查看維基）
蘇菲亞羅蘭（Sophia Loren）
（1934年9月20日－），義大利國寶級女演員，第34屆奧斯卡影后、終身成就獎、金球獎等眾多國際重磅級電影獎項得主。她更於1999年獲美國電影學會選爲百年來最偉大的女演員第21名。（☛查看維基）
在快活谷賽事前，內場被關閉，華人觀眾蜂擁遍布大石鼓。
（上圖攝於1890年，來源：香港賽馬會資料庫）
（圖片來源：Hong Kong Heritages 圖說香港歷史建築 facebook page）
::圖文::整理 ◣ 在在總編
