《孤疑前傳》/《飛越瘋人院》/《閃靈》

跌進陰森沉重的電影世界

《閃靈》經典場口，積尼高遜真係好癲！

兩日假期，宅在家睇 3 齣戲。

3 齣戲之中，有 2 齣都係恐怖片。
3 齣戲之中，有 2 齣都係積尼高遜做男主角。

《孤疑前傳》、《飛越瘋人院》、《閃靈》。

《孤疑前傳》（2022）

2009 年睇《孤疑》時，一邊睇一邊覺得陰森，睇完之後好鍾意！由於同期郭富城主演嘅《殺人犯》同《孤疑》撞埋同一條橋 — 「不老症」，兩套戲同期上畫，正面交鋒，兩套我都有入戲院睇，高下立見，《孤疑》win！

事隔 13 年，《孤疑前傳》上畫，本身十分欣賞《孤疑》嘅我自然有興趣睇，加上電影一大賣點係，當年 12 歲扮 9 歲嘅女主角而家已經係 25 歲嘅成年人，但前傳依然係佢做女主角，而且演返同一個角色！25 歲點扮 9 歲？令我又多咗份好奇心想睇。睇預告時，未知係同一女主角演返，仲諗又咁橋搵到個咁似樣嘅女仔做主角⋯⋯

將《孤疑》同《孤疑前傳》兩張海報放埋一齊，覺得海報設計好有心思。

25 歲女主角再扮 9 歲

同時放埋一齊睇《孤疑》同《孤疑前傳》兩張海報，都覺得設計有擺心思。第一集係正面陰森孖辮妹，第二集就同樣都係兩條辮仔，但換成背面，一墨綠一粉紅舊款連身裙，顏色對照，且戲名字體就如出一轍用小朋友手寫字，感覺好統一，帶出兩套電影之間嘅連貫關係。

再睇演 Esther 一角嘅女主角 13 年間嘅分別，12 歲同 25 歲比，話無分別就真係呃人，但女主角嘅五官樣貌同細個時仍然好相似，加上刻意嘅一樣造型打扮，即使感覺《孤疑前傳》女角大個咗好多都好，但又未至於太大違和感，不過即使用電腦特技效果改變女主角身高都好，話佢係 9 歲又點都有啲牽強。（唔知點解諗起古天樂喺《神鵰俠侶》電視劇入面要扮 10 歲細路嗰幾集戲，睇得我好辛苦）

無比較無傷害，一比較就覺當年係真細路，而家係扮細路。

劇情有啲驚喜

通常電視電影再拍一定唔夠第一集好睇，但《孤疑前傳》同《孤疑》一樣高汁。