【曼城周記】人在旅途比利時

2024｜W28

Published in

Chez moi, c’est la B

9 min readJul 14, 2024

周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。

本周重點:
-撇低阿媽去睇波
-酒店隔空捧英國
-小提琴一級考試
-考試結果出爐喇
-人在旅途比利時
-雞蛋仔開心寄宿
-意大利餐廳聚舊

我：「比利時旗喎！」
母：「關比利時咩事？」
我：（⋯⋯⋯）「你知我哋喺比利時㗎呵？」
母：「而家知囉！」

幾時都話阿媽係地球奇異物種，稀有珍貴。

我而家身在比利時布魯塞爾，扮緊孝順女同阿媽去幾日旅行，所以呢篇周記係名符其實「人在旅途比利時」。

呢個星期嘅大事除咗飛比利時旅行外，就係考小提琴。由於人在他鄉旅遊中，所以今篇周記會短啲。

GO！

撇低阿媽去睇波

仲認得 G 知道歐冠盃決賽時我唔喺英國後好緊張，話如果英格蘭入咗決賽點算，咁咪冇得一齊睇囉！我當時嘅反應係「入到決賽先講啦！」同埋心諗英格蘭應該唔會入到決賽，但點估到波又真係圓嘅，英格蘭轆轆下又殺出重圍（條線其實算好易），準決賽有運又有實力，又真係俾佢入到決賽，而決賽當晚我喺比利時，冇辦法同 G 一齊睇波捧英格蘭。

準決賽呢晚，為咗一齊支持英格蘭，放工後撇低阿媽去咗搵 G，由於第二日就要考小提琴，又要放低雞蛋仔喺 G 度寄宿，所以又帶琴又帶狗咁出城搵 G。幸好呢晚英格蘭隊好生性，2:1 贏波殺入決賽！

阿媽就俾我撇低喺屋企，佢話當晚佢食杯麵咋。為咗陪男朋友睇波，獨留老母在家，仲要連隻狗都拎走埋，我都算不孝喇！

喺英國，足球係大事，對好多英國鬼佬嚟講（包括 G ）捧英格蘭隊係天職，呢種國家身分認同與歸屬感，可憾我冇乜，或者解釋得清楚啲係感覺好複雜。捧香港隊就唔使講，我哋一樣有呢份心！但某國呢？細細個 97 前都會睇住阿爸阿媽捧某國女排，都會理解到有種「大家係同胞」、「血濃於水」嘅關係，到 97 後就更加唔使講，已經係「米已成炊」嘅關係，去到 2008 京奧，簡直係香港人對國家歸屬感嘅高峰期，都「生米煮成熟飯」咯，望都望你好我好大家好。點知十年過去，一個女人加一個殺人犯，故城變天，從此國家歸屬感歸零兼變負，見到日本隊贏咗仲高興啲時，就知自己心已死。所以，我好欣羨睇到 G 佢嗰種單純支持國家隊嘅心，無論英格蘭踢到悶死全世界球迷又好，臨尾絕殺贏波都好，鬧好讚好，佢都一樣支持自己國家。

酒店隔空捧英國

話明係英國大事，星期日呢日嘅歐冠盃決賽英格蘭有份踢喎，當然個個英國人都想去睇波，大型連鎖超級巿場 Tesco 仲即刻宣佈呢個星期日全線 Tesco 收早，俾啲員工早啲放工去睇波，嘩⋯德政呀！

呢日我人在比利時，G 就喺英國，二人隔空一齊睇波。緊張時齊齊大叫，失咗機會時又一同嘆氣咁，有伴睇波係更加增添樂趣。可惜係最後 2:1 輸波。但老實講，平心而論，西班牙真係踢得好好多，由分組賽開始 7 連勝，又有最年輕歐冠入球球員耶馬，全隊波控球、傳球都有水準，抵佢哋做「四冠王」，第 4 次奪走歐冠盃。

喺機場即興買咗件英格蘭波衫捧場，輸咗但無悔使咗啲錢，哈哈！

小提琴一級考試

星期四嗰日請咗日假，因為是日下午考小提琴，雖然只係一級貨仔，但始終係第一次，點都會緊張。

去到試場，眼前係一間教堂（St. Paul）同一片墓地，我冇諗過考試會喺教堂入面進行喎！仲要有咁多先人喺出面聽住？？？ G 話有啲試場會喺啲學校借地方，但佢個城呢就借呢間教堂，好特別。於是望住呢個咁神聖嚴肅嘅地方，我內心卻泛起一陣陣喜感，覺得喺教堂考琴好有趣。

入到去呢個小教堂，職員安排我哋喺門口隔離嘅一個小房間嘅「等候室」坐低等。考試前 10 分鐘，考生可以去 Warm-up Room 入面熱身練習下，但呢間房其實係教堂個廚房，只係喺廚房入面放咗部電子琴同譜架，一樣相當嘅格格不入。

G 當然就同我去做最後練習，練習時明明表現不錯，不過到真正考試時又真係會緊張失準。唉⋯⋯

考官係個笑容親切嘅女士，一口純正口音嘅英文好易聽得明，G 話所有考官嘅口音都係好好聽，未聽過有口音難明難聽嘅考官，但我事前當然都有幾分擔心，話晒考琴會有 Oral，聽唔明就 GG 啦！

一嚟就係拉考試三首歌仔先，第一首我揀首最易嘅，諗都無諗過自己會拉到錯晒，當然係失望，但亦明白自己好緊張，個心跳咗出嚟咁！但事後 G 話我雖然有錯，但全程無停低兼繼續去拉到最後，呢個係表演同考試嘅要點，俾人感覺你有音樂感同堅持 The show must go on 係最重要，所以佢話雖然呢首歌有啲失準，但並不算大災難。至於第二第三首歌係難啲嘅，但我都叫符合到自己平時練習水準咁完成，拉完呢兩首歌後，我嘅鋼琴伴奏，A.K.A 我嘅老師兼男友都有做口形話我「Well Done」，開心仔呀！

呢三首歌之後，G 就要離開考室（即係教堂個主禮堂），留返我同考官單對單。先考 Scale，考咗我至少 6–7 個 scale，相當多，但我都有拉到嘅，雖然速度唔太快。跟住就要我企去鋼琴後面，考官彈琴問問題同要我跟唱。除咗拍手我唔係十分肯定自己啱唔啱外（節奏感近乎零），其餘我都有信心自己答啱，而考完出到嚟，G 話聽到我拍手都有拍啱節奏，YEAH！

考試結果要等一星期，G 話合格就一定合格，始終只係一級貨仔，BB 班，要求好低，但就睇下考官俾咩分數，佢話最重要係睇教官嘅評語，要知道自己邊啲地方做得好，邊啲地方要再改進，咁先係重點。嘩，佢真係求學求真㗎喎！我係香港學生嚟㗎，基因入面求學就係求分數，我真係無咁諗過，但我亦認同佢嘅諗法先係真正學習嘅精神嚟嘅。

考試結果出爐喇

而今日（星期日），晏晝 G 由英國打電話去比利時搵我（WhatsApp call 啫），以為佢有咩緊要事，原來佢話已收到我嘅考試結果，所以第一時間打嚟通知我。

「你估下你攞咩成績？Distinction 呀！」

嘩！我自己都好驚喜！

G 話 100分合格，120–129 分 Merit，130–150 分就 Distinction，而我就僅僅以 131 分拎到 Distinction 級別。G 話幾多分都好，都係攞到考試中最高級別，仲話以我為榮，等我返英國再同我好好慶祝。唔知以為我拎咗奧運金𠻹呀！但鬼佬就係「鼓舞教育」，而事實上雖然只係一級貨仔，我都付出咗努力，係開心嘅！