【曼城周記】百忙中阿媽陪我

2024｜W27

周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。

本周重點:
- 英國又換首相
- 照超聲波求安心
- 切斯特半日遊
- 逛Costco行超巿
- 睇波、教書、練琴
- 鬼佬G做大廚
- 唐人街食中餐

阿媽嚟咗英國踏入第二星期，由於要留返啲假期同佢過幾日去比利時去旅行，所以呢兩個無特別請大假，而係返工 or WFH，又要做嘢，又要兼職，又要煮衫洗飯，又要睇波，又要練琴，又要帶阿媽出去玩下見下人，生活何其充實，呢個星期生活一言以蔽之﹕攰。(攰多過忙)

媽咪今次明明已夏天到訪英國，但唔好彩係，佢到埗前一日曼城中喺廿幾度嘅「微熱浪」中，我都叫做拎咗把風扇出嚟吹咗一晚，亦拎咗個野餐盒去公園 picnic 下。但由媽咪飛嚟嗰日開始，日日落雨多個天晴，氣溫仲急降到12-13 度，慘慘豬，感受唔到英國夏天嘅美好，我架「紅馬」當然都無機會開篷俾阿媽 chill 下。

佢喺英國剩餘日子只有 4 日，希望有機會回暖多少少，太陽出多少少俾媽咪感受下英國嘅夏天。

英國換首相

啱啱呢星期英國大事當然係 7 月 4 日英國國會選舉投票日，未投都知工黨贏硬，但難得仲可以做選民去投票，亦係我喺英國第一次參與國會投票，我當然都有盡下持份者義務，投下我神聖一票！我投嘅候選人即使落敗，但投票都履行咗民主社會嘅精神，我亦希望我嘅一票可以表達出唔想國會只係一黨獨大或兩黨之爭，希望多啲唔同聲音喺國會入面。

G 對於喺英國嘅香港人熱心投票表示欣賞，佢話英國有唔少合資格選民都未必會去投票，覺得大家如果好似我哋咁珍惜手上一票會更好。

新首相上場今次已係英國 2 年嚟第 4 個首相，不論大家支唔支持工黨都好，對於新政府上任，我多少都抱有啲新希望，希望英國將來會更好，話晒至少未來幾年我都仲係喺度住，我當然希望英國好。至於香港，即使我已離開咗，但屋企人同好多朋友依然喺香港，當然亦希望香港好，但暫時就無乜希望。

票站職員﹕你隻狗今日喺邊？

今次我係放工後即去票站投票，去到登記時，票站職員竟然問我﹕

"Where is your dog today?"