【曼城周記】被逐
2021年｜周記 W12
Published in
17 min readMar 20, 2021
今個星期一爆鑊，呢篇周記主要係講呢隻鑊，當俾我呻下，真係家家有本難唸的經。貝星人周記，記一周之事，有水分，無乜營養，慢用喔！
本來今個星期篇周記就應該係講下同兩位長輩新同居生活新挑戰嘅，點知⋯⋯人生硬係充滿意外同驚喜。
嚟到英國都未夠一個月，【曼城周記】亦只係寫咗 3 篇咁大把，估唔到咁快就有事發生，唔通個天驚我技窮無嘢寫，所以送啲材料俾我出菜？
還記得我喺其中一篇【曼城周記】度叫大家估下我可以同我嘅伯父伯娘住到幾耐，一個月？兩個月？三個月？半年？
我真係傻豬嚟嘅，原來都未正式「一對二」同佢哋一齊三個人住過一日，我就已被逐離場。係，一日都無真正同住過，喺「英國梅窩」已爆鑊。
今個星期嘅周記，主要係講返呢單嘢。
都是燈塔惹的禍
星期一，「貝星人效應」天氣現象仍然生效，一早風和日麗到不得了，仲要唔大風。原定星期二細佬會放一星期假同我返曼城幾日，陪我置下傢俬、搞下其他手續嘢咁，所以我以為佢星期一都會返工，點知佢話晏啲先返，話帶我出去影相打下卡。
無錯！我話過要影「英國梅窩」（Holyhead）嘅名勝地標 — 燈塔！
於是細佬兩公婆就車我去打卡，睇下呢個燈塔、睇下全英國最長嘅地方名嘅火車站、睇下羊仔馬仔同兔仔，望下天、望下海，張張相影出嚟都靚到死，好寧靜好優美嘅環境，有我喜歡嘅藍天，又有我鍾意嘅動物，好美好嘅星期一。
「人物關係表」可睇返 W11 篇周記：
