【曼城周記】講不出聲人鬼母曲
2024|W26
周記,顧名思義,即記貝星人一周之事:一切大事、小事、有事、無事、心事、瑣事、無聊事。
水分偏多,營養欠奉,多屬長文,敬請慢用。
今個星期周記摘要:
- 熱浪話咁快拜拜
- 廢青巨嬰臨時工
- 情敵睇波打邊爐
- 打完邊爐即失聲
- 被迫缺席所有嘢
- 英國病親都慘情
- 揸紅馬接媽咪機
- 人鬼媽咪初見面
- 細佬契哥齊食飯
又一星期,呢個星期嘅大事有二﹕
- 我阿媽駕到。
- G 阿媽駕到兼同我阿媽見面。
熱浪話咁快拜拜
分享大事之前,先又做下「天氣小姐」。明明啱啱對上呢個星期初先經歷緊一個「小熱浪」,曼城日間氣溫高達 28 度(我知我知,香港 35 度吖嘛),我終於有晚都頂唔順拎咗把風扇出廳吹下,但點知到星期五朝早去接阿媽機時,曼城氣溫驟跌到 12 度,當然仲有英國名物「天陰有雨」,於是好似我坤咗自己阿媽着晒夏天衫嚟咁,呢幾日都要借件大褸俾媽咪着。
明明已 6 月尾 7 月,明明已安排媽咪今次夏天先嚟英國,點知過咗幾日我都仲未俾佢感受到陽光明媚嘅英國夏天,可惡!(睇嚟我個靚靚野餐盒今年可用次數不多了,嗚⋯⋯)
廢青巨嬰臨時工
呢個星期又有《辦公室奇人奇事-番外篇》之「廢青巨嬰臨時工」。
我管理嘅「庶務二課」包括 office 清潔工作,而清潔工哥哥忽然做老豆(據聞佢真係忽然被通知做老豆)而要請侍產假。本身英國規例係要做夠 26 周先可以請侍產假,但人生大事嘅嘢,公司都酌情處理,只不過人事務隻「老狐狸」未經我同意兼無事先通知我嘅情況下俾清潔工哥哥放假,而搵咗自己個大仔做臨時清潔工替工,亦即係「廢青巨嬰」。
呢位阿廢上次已嚟過做過一次替工,未做完約定日數已提早唔做,原因不明,由於佢老豆係 HR 老頂,所以都無人過問啦!今次再搵阿廢幫手,我都無乜期望,亦知係臨時臨急無辦法之中嘅辦法,不過我都已向上級反映今次 HR 安排極差,「老狐狸」咁樣唔經我同意安排清潔工放假同請替工都係好唔專業同好唔尊重。老實講,明知投訴未必有效,只係本小姐一向不吐不快。
講返阿廢點廢,第一日唔聲唔聲無故早退,第二日就遲到,但佢老豆即「老狐狸」親自同我解釋話係佢搞錯時間遲咗車個仔返工,話唔係個仔錯。但佢個仔係點返工呢?罪狀就多了:
- 遲到(阿爸認錯)
- 早退(阿爸話會扣返佢人工)
- Lunch time 失踪 2 個鐘(英國 Lunch time 只有半小時)
- 捉咗佢幾次匿埋喺清潔房(無櫈,佢「巨無霸」嘅身形就咁企喺門後面)