Medium 改制後收入影響
當然係不科學又不數學的分析
如果 Medium 改制主要係為咗出少啲錢俾作者而達到「節流」,而唔係鼓勵作者努力創作,咁佢成功咗!分分鐘仲打擊咗用 Medium 寫作增加收入嘅一群作者嘅寫作動力。
睇返 8 月改制後我嘅收入同上月分別:
7月:共 13 篇文,收入(扣稅前)$112.39
8月:共 13 篇文,收入(扣稅前)$48.28
咁橋呢兩個月都係一樣寫 13 篇文,先單睇最終收入銀碼,唔使睇更多數據,都知道 Medium 忽然改制後對我嘅「零用錢」收入有幾大衝擊!記住呢個仲要係扣稅前嘅賬面數,扣數後係「七折」(今個月實袋稅後價 $34.24,同上月比連一半都無)!
咩指標影響收入?
上次喺《呼籲﹕請大家拍多 49 下手》一文中有提及到,以往用「計時」(讀者閱讀時間) 嘅計錢方法喺新制下被以下兩個指標取替﹕
- 拍手數量
- 留言數量
於是我呼籲大家「行行好」,都唔奢求百忙中留言同我吹水,但求篇文唔太差的話拍多幾十下手支持下。而喺我嘅呼求下,讀者之中都不乏善長仁翁,8 月嘅文章明顯拍手量大增,亦有啲讀者留言互動,不過喺大家力撐下,8 月嘅 Medium 文章收入只有 7 月嘅 43%,同樣一個月寫 13 篇文,但收入跌幅超過一半。想像下如果真係打工咁計嘅話,呢個月嘅工作量同上個月一樣,但份糧 4 折出俾你。