Wave 5. Picsart Academy ընդունելության 5-րդ ալիքը
Համառոտ ուղեցույց դիմորդների համար
Picsart Academy-ում պատրաստվում ենք հերթական մեծ ընդունելությանը, որն ունենալու է տարբերակիչ Wave 5 անվանումը: Այս ալիքի ընդունելությանը դիմորդները սպասում են դեռ օգոստոս ամսվանից, ներառյալ հենց այն դիմորդները, որոնք դեռ հուլիսի ընդունելությանը, տեղերի խիստ սահմանափակ լինելու արդյունքում, չընդգրկվեցին մեկնարկող խմբում:
Wave 5-ի ընդունելության մեկնարկը և հայտագրումը կսկսվի դեկտեմբերի 1-ից: Դիմելու համար պարզապես անհրաժեշտ է այցելել Picsart Academy-ի կայքէջ և սեղմելով հայտադիմումների հղումը՝ լրացնել անուն ազգանուն, էլեկտրոնային հասցե, հեռախոսահամար, նշել թե կրթական մոդելի որ կտորին եք ցանկանում մասնակցել, լրացնել որոշ անձնական տվյալներ և հաստատել հայտադիմումը:
Բոլոր դիմորդները կունենան առավելագույնը 7 օր ժամանակ Picsart Academy-ի կրթական մոդելի Sandbox (սկսնակների համար), Level Up Bootcamp (վերապատրաստման դասընթացներ) և Code Republic Lab (փորձառուների համար) փուլերից որևէ մեկին դիմելու համար:
Հաշվի առնելով այն, որ դիմորդների քանակը յուրաքանչյուր ընդունելության հետ մեկտեղ կրկնապատկվում, երբեմն եռապատկվում է, ուստի ընտրական փուլերում դիմորդներին բավական թեժ մրցակցություն է սպասվում, որի արդյունքում հստակ գիտելիքներ ու հմտություններ ունեցող դիմորդներին է միայն հաջողվում միանալ մեկնարկող ալիքին:
Յուրաքանչյուր դիմորդ անցնում է թեստերի, քննությունների և հարցազրույցների մի քանի փուլ։
Հայտագրումների ավարտից անմիջապես հետո սկսվում են նախընտրական փուլերը: Յուրաքանչյուր դիմորդ անցնում է թեստերի, քննությունների և հարցազրույցների մի քանի փուլ, որոնց արդյունքում որոշվում է, թե Sandbox, Level Up Bootcamp և Code Republic Lab փուլերից որն է առավելապես համապատասխանում դիմորդին։
Հիմնական և ամենակարևոր փուլը նախնական թեստավորումն է: Այս կտորում դիմորդը հանձնում է դպրոցական մաթեմատիկայի և անգլերենի թեստեր: Առարկաների ընտրությունը պատահական չէ, քանի որ`
- մաթեմատիկական մտածողությունն օգնում է ծրագրավորման պարզագույն խնդիրներից մինչև բարդ գործողություններ կատարելու ժամանակ
- ծրագրավորման ոլորտի գրականությունը, ինչպես նաև տերմինաբանությունը հիմնականում անգլերենով է, ուստի անգլերենի մինիմալ գիտելիքները նույնպես կօգնեն արագ յուրացնել նյութը
Մաթեմատիկայից ներառված է մասնավորապես՝
- Եռանկյունաչափություն
- Թվային ֆունկցիա
- Աստիճանային, ցուցչային, լոգարիթմական ֆունկցիաներ
- Թվային հաջորդականություն, սահման
- Պյութագորասի թեորեմը, կոորդինատային հարթություն
- Շրջանագծի և ուղղի հավասարումները
- Մակերեսներ, ծավալներ
- Բազմանիստեր
- Կոորդինատները և վեկտորները տարածության մեջ և այլն:
Անգլերենի նախընտրական թեստն ընդգրկում է մինչև A2-B1 մակարդակի քերականական կանոններ:
Դասընթացների շրջանակներում ծրագրավորման հիմնական առարկաների հետ մեկտեղ, իհարկե, այս երկու առարկաները նույնպես ներառված են` միտված լինելով ուսանողի մոտ էլ ավելի բարձրացնելու գիտելիքի մակարդակը:
Նախընտրական այս փուլերը բավարար են կրթական մոդելի Sandbox-ի կտորին դիմելու համար։
Նախընտրական թեստավորումը հաղթահարած դիմորդներն արդեն մասնակցում են բանավոր cultural/behavioral հարցազրույցի, որի ընթացքում ստուգվում է նաև դիմորդի տրամաբանությունը:
Նախընտրական այս փուլերը բավարար են կրթական մոդելի Sandbox-ի կտորին դիմելու համար, սակայն Level Up Bootcamp-ի դեպքում ուսանողները պետք է նաև հանձնեն այն բոլոր նախընտրական քննություններն ու թեստերը, որոնք որևէ դասընթացի մասնակցելու անհրաժեշտ նախապայման են:
Code Republic Lab-ի շրջանակներում ընդունելությունը իրականացվում է թեստավորման և տեխնիկական հարցազրույցի միջոցով, որոնք հաղթահարած դիմորդները կընդգրկվեն Lab-ի մասնակիցների կազմում։
Նախընտրական գործընթացը տևում է մեկ ամիս։
Նախընտրական ողջ գործընթացը տևում է մեկ ամիս, որից հետո, փուլերն հաջողությամբ հաղթահարած և մեկնարկող ալիքում ընդգրկված ուսանողները, ստանում են ակադեմիայում ինֆորմացիոն հանդիպման մասնակցելու հրավեր, որի ընթացքում էլ քննարկվում են մեկնարկող դասընթացի բոլոր մանրամասները, ստորագրվում է համաձայնագիր, ուսանողը միանում է ակադեմիայի ներքին հարթակին` պատրաստվելով դասընթացի մեկնարկին:
Ակադեմիայում կրթական փուլերն անցնում են հետևյալ հերթականությամբ
1. Sandbox
Ադապտացիոն ուսուցման մեթոդներով հագեցած ուսումնական հարթակ սկսնակների համար։
Տևողությունը՝ 6–12 ամիս։
Sandbox-ը նախատեսված է և՛ սկսնակների, և՛ գիտելիքների որոշակի պաշար ունեցող դիմորդների համար։ Այստեղ ուսանողները զինվում են հիմունքային գիտելիքներով՝ հետագայում կրթությունը մեկ կամ մի քանի մասնագիտացմամբ շարունակելու համար։
Ինժեներ-ծրագրավորող դառնալու համար՝ դիմորդից, անկախ ունեցած աշխատանքային փորձի, պահանջվում է անցնել ծանր և երկարատև հիմունքային կրթություն, որը ներառում է հետևյալ թեմաները՝
- Համակարգչային ճարտարապետության հիմունքներ (Computer Architecture Fundamentals)
- Համակարգչային ծրագրավորման լեզուներ, այդ թվում՝ C++, Java, Python, JavaScript
- Օբյեկտ-կողմնորոշված վերլուծություն և նախագծում
- Ալգորիթմներ և տվյալների կառուցվածքներ
- Մաթեմատիկա (մասնավորապես ՝ մաթեմատիկական անալիզ, երկրաչափություն, գծային հանրահաշիվ, հավանականությունների տեսություն, վիճակագրություն)
- Համակարգային ծրագրավորում (System programming)
Ամբողջական ցուցակը կարող եք տեսնել հղումով։
2. Level Up Bootcamp
Խորացված ինժեներական դասընթացներ՝ փորձառու ծրագրավորողների վերապատրաստման համար:
- Խորացված ալգորիթմներ և խնդիրների լուծման էֆեկտիվ մեթոդներ
- Բազմահոսք և ասինխրոն ծրագրավորում
- Ծրագրային ճարտարապետություն և համակարգային նախագծում
- Ծրագրավորման պարադիգմաներ, այդ թվում՝ ֆունկցիոնալ ծրագրավորում
- Պատկերների և վիդեոների մշակում։
Ամբողջական ցուցակը կարող եք տեսնել հղումով։
Level Up Bootcamp-ում ուսման տևողությունը կարող է տևել մինչև 1 տարի: Դիմորդը նաև կարող է ընտրել մասնագիտացումներից որևէ մեկը.
- Frontend վեբ ծրագրավորում
- Backend վեբ ծրագրավորում
- QA ինժեներություն
- DevOps ինժեներություն
- Մեքենայական ուսուցում
- Տվյալագիտություն
- Android հավելվածների մշակում
- iOS հավելվածների մշակում
- Պատկերների ճանաչում և մշակում
Հաջողությամբ հաղթահարելով այս փուլի քննական շեմը ևս՝ ուսանողը հրավիրվում է ուսումնահետազոտական նախագծերի լաբորատորիա՝ Code Republic Lab, որտեղ աշխատելու համար նրանից պահանջվում են ինժեներական հիմունքային գիտելիքներ և գործնական վարժ հմտություններ։
3. Code Republic Lab
Հետազոտական և ստեղծագործական նախագծերի վրա ամբողջ դրույքով աշխատանք՝ աշխատանքային անփոխարինելի փորձի ձեռք բերման համար։
Տևողությունը՝ 3–12 ամիս։
Առաջին երկու փուլերը հաղթահարելուց հետո, ուսանողը հնարավորություն է ստանում միանալու Code Republic Lab-ին, որտեղ ուսանողը ստանում է գործնական առաջադրանքներ, որոնք ենթադրում են մեծ և փոքր նախագծերի իրականացում, ինչպես՝
- Ինտերպրետացվող լեզվի նախագծում և ինտերպրետատորի մշակում
- Ալգորիթմների և տվյալների կառուցվածքների իրականացում
- Տվյալների բազաների համակարգերի իրականացում
- Ցանցային ծրագրավորման տարրեր պարունակող ծրագրերի իրականացում, այդ թվում՝ p2p շախմատ
- Մեծ և փոքր նախագծերի համակարգային նախագծման առաջադրանքներ
Այստեղ ուսանողներն աշխատում են երկարատև և ավարտուն նախագծերի վրա, որոնց բարեհաջող իրականացման և հրապարակման դեպքում համարվում են Code Republic Lab-ի շրջանավարտներ։
Ուսանողը կարող է ավարտել փուլերից միայն մեկը կամ երեքն ամբողջությամբ։ Փուլերից ցանկացածը հաջողությամբ ավարտելու դեպքում, ուսանողը ստանում է համապատասխան որակավորում՝ հավաստագիր, որն երաշխավորում է տվյալ փուլում վերջինիս կողմից յուրացված գիտելիքների և հմտությունների բարձր որակական արժեքը։
Picsart Academy-ն համալրում է եզակի կրթական հաստատությունների շարքը, որոնք ստանձնում են իրական ինժեներ-ծրագրավորող կրթելու բարդագույն առաքելությունը։ Առաքելությունն իրականացնելու ընթացքում Picsart Academy-ն նաև ձգտում է քարոզել իրական ինժեներական հիմունքային կրթության կարևորությունը թե՜ տեղական, թե՜ միջազգային շուկայում։