「要請個點樣嘅人」僱主成日答唔到？
到底香港幾時有「僱主改進課程」去過濾咁啲無腦僱主先？
首先我要同大家講一個真係勵志嘅故事。喺我搵到我正式入行做得長嗰一份全職之前，我做過兩份全職。
一份係一間蚊形舖仔，有個好後生嘅老細將自己興趣變成生意，話要請售貨員。拆箱 pack 貨呢啲手板眼工夫啫，但我返咗工唔夠一個禮拜，佢就叫我幫手埋晒積落兩三個月無計嘅數。單又唔齊，亂 Q 咁開單折咗俾客都唔 mark 低，利潤同出糧俾自己都分唔到……中學雞都叫讀過會計成績唔錯，血管當然有爆，咁你鍾意用咩格式咪用咩格式囉。
問題係我當初根本無提過我讀過會計，見工亦無提過話要執埋盤數。我當初見嘅係售貨員。結果係個老細借頭借路屈咗我一啲小事。你笑笑口話簽紙即走時，我咪笑笑口拎咗錢出咗門口先屌你老母囉。錢到咗手，個老細終於講「其實我係想搵人搞咗堆數佢咖咋」。
然後佢再貼返張請人告示出嚟：勤奮有禮，盡責準時，有售貨經驗優先。
到第二份工，係某大琴行請文員，中五程度呀流利粵語呀識 Office 呀嗰啲嘢囉。我上到佢哋寫字樓，個 HR 同我講：其實你返工係要落舖頭返嘅，咁因為工作上有一部份係要用電腦，所以當初請人個名同要求都係寫文員。
身為一個無乜社會經驗嘅小朋友，我都隱約知道奶嘢。但咁又點啫，死廢青你有工返咩？
我返工近一個月時間，係喺間舖度執頭執尾執收據斷六親，真係掂到部電腦嘅時間係得收銀。我當然唔會話俾你聽，喺間間琴行都開宗名義請緊銷售員或者店員嘅時候，嗰間琴行到而家都重係用緊文員個名同要求嚟請店員。
我廢，但我唔自卑。呢兩段同我之後嘅職業乜叉關係都無嘅小插曲，話咗俾我聽一樣嘢：唔係個個老細請人都知自己需要嘅係咩人。時光飛逝，一眨眼幾年過去，我已經返緊一份我想返嘅工。有日要幫公司寫 job ad 請人，我望一望公司出咗街嘅 job ad，再諗一諗嗰個位實際上做緊啲咩，就徹底驗證咗我嘅諗法。
讀完書出嚟無工作經驗，人一絕望起上嚟自然就會戇鳩鳩乜工都見一餐。呢段「因為我無經驗所以無工返所以無經驗」嘅地獄輪迴會係你人生之中見得最多閪工嘅時間。喺你嘅角度，因為你無揀擇嘅本錢，所以有人請你就偷笑。而喺啲戇鳩僱主嘅角度，你白紙一張，會請你嘅公司只有三種：
1. 工作要求簡單到即使白紙一張都無所謂，剷薯條又唔使要砂紙嘅
2. 知你白紙一張，但佢會俾適當嘅工作去訓練你
3. 根本唔撚知自己想要咩人，有眼耳口鼻就請再求其質嘢俾你做
如果你學歷夠高嘅話，你就奶嘢鳥。第一種老細通常唔會請你，因為知你做唔長，亦當良心發現無謂嘥你時間。第二種工唔使多講。而第三種就係白紙最容易遇到嘅閪老細。
佢哋都特別鍾意喺你唔識做某啲嘢嘅時候講「後生仔無學習能力」「唔捱得」「唔敢挑戰」乜乜柒柒……因為喺佢哋眼中，公司嘅嘢就係咁多，你點都要做，甚至俾其他嘢你做即係俾嘢你學。更何況佢出糧俾你，你嘅份外事亦即係份內事，就好似大雄嘅玩具就即係技安嘅玩具咁。
係呀，每間公司有自己嘅需要，有啲需要嘅技能間間公司都係咁，而有啲就雜到不得了，人搵工工搵人從來都係 deal or no deal 嘅問題。不過有啲僱主或者 HR 對佢哋需要啲乜嘢一無所知，呢班無腦僱主根本無資格批評後生仔。想請人返嚟寫網頁寫程式，就出 ad 話要請 IT；明明啲嘢真係要搵熟手嘅做，又要見大學生就請，連人哋讀咩出身都唔睇，奢望啲嘢求其請一個人就可以做到，拉牛上樹九唔搭八。呢啲所謂請唔啱人，根本就係僱主自己攞嚟，偏偏喺啲濕鳩 HR 公司帶頭壓價嘅時候，又要好似身同感受咁覺得一整代後生仔都係廢青。
無腦僱主係有樣睇咖。留意吓招聘廣告講嘅嘢，要求越虛無通常都代表個老細唔知自己想要咩人，只係想守株待兔式等你撞咗入嚟先。試諗吓如果一隻 job ad 寫嘅需求係「有禮盡責」咁先算吖，呢個要求根本無助於將啲唔啱嘅人過濾。你會唔會因為自己成 Q 日爆粗而唔見呢份工？盡責嘅定義即係做足份內事還是廿四小時 on call？退一萬步講，有邊個見工嘅人會覺得自己唔盡責收皮先咁咖？喺互屌「出唔起人工」「後生仔唔捱得」之前，不如問吓呢班腦細有無用過個腦去令自己請到啱用嘅人先？供求都搞錯，賴社會？
喺我而家做緊嗰行，啲外資公司開出嚟嘅應徵條件具體到不得了。佢哋又特別興一種新嘅見工方式：同你對足一日。長時間 interview，同你食餐飯再喺公司行個圈，莫講話技能經驗啱唔啱工作需求，就連你夾唔夾嗰間公司嘅文化都有個大概。唔啱用嘅話當好嚟好去，你自己亦都有份望吓係咪真係啱做呢份工，俾盡嘥得嗰一日，好過嘥大家之後嘅錢同時間。幾時香港班老細有返少少咁嘅智慧？我諗都好難有。
呢篇係回帶文，時空背景係早幾年毒果出咗篇咁嘅 HR 打手文（20160328：「點解會見呢份工」年輕人成日答唔到？），都叫做幫手請過人亦都返咗幾年工嘅薯皮獅就頂唔順，決定解構吓僱主口中所謂請親啲人都廢到底係乜嘢一回事。咁啱早幾日又有單請十八般武藝琴行文員嘅新聞，薯皮獅又諗起呢篇文入面其中一個故事。以後啲舊文都係一樣，有緣就搬啲過嚟咁～
