Li foll decovrition quel indica possibil vivent entes sur Venus

Un traduction del original in anglés che CNN.

Venus es li max brilliant objecte in li ciel nocturn pos li lune e ha fascinat li homanité durant millennies. Li decovrition del gas fosfine ha just augmentat li fascination por ti planete.

Yo es un membre del equip de resercha multinational quel anunciat li decovrition lunedí in li jurnale Nature Astronomy, e secun me it indica que alquo ínedit eveni por li production de fosfine: sive un chimie til nu completmen ínconosset, o possibilmen alquo vivent de tip microbial. Chascun explication sembla egalmen foll.

Fosfine es un gas composit ex un atom de fosfor e tri atomes de hidrogen. It es toxic a omnicos vivent sur li Terra quel usa oxigen, li homes includet. On usat it quam un arme chimic durant li Unesim Guerre Mundal e es conexet solmen con industries homan (p.ex. pesticides) o con li vive in locs sin oxigen. Fosfine es trovat in locs quam morasses e paludes. It trova se anc in li intrallias e excrement de animales — por exemple in relativmen alt concentrationes in colonias de pinguines. In li laboratorias on ha mesurat fosfine venient ex complex mixturas de bacteries.

Talmen on vide pro quo li decovrition es tam astonant: fosfine in teorie ne deve esser present in li atmosfere de Venus. Por formar se it besona mult hidrogen e li just temperaturas e pressiones — conditiones trovat sur Jupiter e Saturn ma nullmen sur Venus. Mi equip che MIT exhaustivmen serchat li tot conosset chimies e ne posset trovar un metode in quel li gas de fosfine vell posser esser facilmen productet sur Venus. Altri processes planetari, tales quam vulcanes, fúlmine, meteorites tra li atmosfere es omni ínpossibilitás in quant ili posse producter fosfine in solmen micrissim quantitás ma nullmen in li grand quantitá quel egala tis in li observationes.

Esque to significa que Venus possede vive extraterrestri in su atmosfere quel producte gas de fosfine? Ne con tot certitá. Venus es un loc hostil por omni forme de vive conosset de noi. Li superficie es ardentmen calidissim — mult tro calid por li formation del molecules complex necessi por vivent entes. Ma altmen súper li superficie, li atmosfere deveni plu e plu frigid. Súper Venus trova se un “loc dulci” inter 48 e 60 km, in li nubes, ú li temperatura es ni tro calid, ni tro frigid, ma exactmen optim por li vive.

Malgré to, li circumité es severi. Li atmosfere, por exemple, es 50 vezes plu sicc quam mem li max sicc locs sur li Terra. Li guttes in li nubes ne es format ex liquid aqua ma ex concentrat acide sulfuric. Li circumité acid es pluri milliard vezes plu acid quam li max acid circumités sur li Terra. Componentes terrestri quam DNA, proteines e amino-acides vell esser destructet in un instant in li acide. Talmen omni possibil vive in li nubes de Venus vell dever esser constructet ex componentes diferent del vive sur li Terra, o vell besonar un cortice protectiv ex materiales resistori al acide sulfuric, tales quam cire, grafite, súlfur, o alquo diferent.

Persones ha speculat pri li presentie del vive in li nubes de Venus durant plu quam 50 annus, comensante con Carl Sagan. Li scientistes es sovente desinclinat a apertmen confesser lor interesse por un tal “fringe topic”.

Támen, nor equip ductet de Jane Greaves del Universitá de Cardiff in li Reyatu Unit decidet intentionalmen serchar por li signes indicationes de vive sur Venus tra li gas de fosfine. Ella proposit usar li James Clerk Maxwell radio telescope (JCMT) sur Mauna Kea in Hawaii por observar li fosfine in unde-longores de radio. Coincidentialmen, anc mi equip che MIT hat esset laborant pri li gas de fosfine quam parte de un projecte plu grand in li intention de comprender qual gases sur li exoplanetes — planetes orbitant stelles ultra nor sole — vell indicar li presentie del vive. Un contacte mutual conexet nos du.

Quande yo incontrat li resultas de Jane yo simplicmen ne posset creder it. Totvez, mi equip che MIT laborat con ti de Jane sur un proposition por usar li plu potent Atacama Large Millimeter Array (ALMA). E quande li data revenit e esset analisat, li signale de fosfine esset mem plu fort quam antey. Yo esset tam chocat, tam astonat, ma noi havet null selection quam accepter que li resulta esset ver. Noi continuat diligentmen por suportar nor detection, continuante tra li exclusion de altri processes chimic por li presentie de fosfine, e duplic e triplic reconfirmationes que ne hay altri gases queles posser mimar li presentie des gas de fosfine.

Nor Sistema Solari possede un crescent númere de córpores de interesse in li sercha por li vive. li Mars Perseverance Rover de NASA es nu sur li via til Mars por serchar por signes del vive ancian. Li satellite Europa de Jupiter, e li satellites Enceladus e Titan de Saturn es chascun fascinant cibles potential. Nor decovrition de gas de fosfine nu leva Venus til mem un altri loc a investigar seriosimen in li sercha por li vive ultra li Terra — fórsan ja desde nu ne un efortie tam foll.