“A displayed content of a toolkit displayed showing tools like hammer, axe, box cutter, iron and flashlight” by Todd Quackenbush on Unsplash

「乜都自己砌」的思迷

前一段日子,公司營運得好差。產品更新好慢,係startup死症,個系統大重建變成黑洞,成本升得快過收入,燒錢越燒越快,命不久矣。作為最高話事,梗係我最大責任,而家諗起當時浪費咗咁多同事嘅青春,真係非常對唔住。

宋漢生
宋漢生
Aug 11, 2018 · 4 min read

關於呢次挫敗,有以下嘅觀察:

一,深層次嘅問題唔容易解決,因為根本唔知個問題有幾深層。在未知的情況,當然係先假設問題唔深層,先試吓輕一些嘅解決辦法,因為重藥震盪大,難食。唔得,先再行落一格,一層一層咁剝落去,而如果最後發現問題真係好深層,中間已經用咗唔少時間,但又無可避免。

二,呢段日子,心情唔會舒暢,腦裏面諗嘅,大部份時候都係諗緊解決眼前問題,唔想見人,亦冇心情寫文,因為一講就少不免要講煩惱,據我觀察,有事想摺埋係唔少人嘅本能反應。好在有朋友公司遇到類似困難,可以搵相對客觀但又有相關經驗嘅人傾傾,否則更難捱。

三,營運問題,財政健康係滯後指標,到財政明顯有問題,已經係好後期。財政問題嘅(唯一?)好處,係本來有好多解決問題嘅路徑選擇,議而不決,錢嘅問題會令人馬上集中火力收窄範圍,手腳加快。

四,由越燒越快到健康,中間幾個階段:越燒越快,均速燒,越燒越慢,唔再燒。直覺可能會覺得唔再燒係關鍵一步,但其實最難係頭幾步,證明改變得到營利線嘅斜道。條線彎得番向上去,即有望終會到對面岸。

五,最後當然希望攞得番之前燒咗嘅錢,只要做到唔再燒,就可能有攞得番嘅一日。以呢個角度睇,扭局階段最唔想嘅係再揼錢入去,揼錢即係燒快啲,完全同目標背道而馳,大佬已經由負數咁多追起,仲揼錢落嚟掉頭行負多啲,幾時先望見家鄉?


結果做咗好幾樣深層改動,分幾次分享。今次講嘅一樣,係關於用出面公司嘅軟件。公司用嘅軟件分兩類,一類係內部運作用嘅,例如電郵,除非你本身做電郵,否則大概唔會走去叫自己同事整個自家用電郵系統。同樣道理,唔會叫同事自己由頭整部電腦,由頭整個作業系統而唔畀錢解決。另一類,係軟件係你嘅產品一部份。好多人會覺得,公司如果係做軟件,咁個軟件本身係一嚿嘢,唔會拆散嚟睇。而如果當一嚿嘢,就會自然覺得成嚿都要由頭到尾自己寫。所以好多時都唔會用出面嘅軟件。仲有其他理由,例如出面人寫嘅,控制唔到,有起事上來點算,等等等等,總之如果你問軟件部,好多時真正取決嘅,係軟件部覺得自己做唔做得到,或者有冇興趣做。

公司做嘅改變,係拆散個產品咁睇,然後問:

一,呢一忽,出面有冇世界級嘅軟件已經可以畀錢即用?

二,呢一忽,係咪我哋產品嘅最重要賣點?

大部份時候,如果唔係核心賣點,都會出面已經有世界級嘅軟件可以租用。而如果你竟然搵到未有如此軟件,即係市場有好大嘅一個空間,可以考慮索性做呢個題目。

當然有好多質疑,咁就以登入咁基本嘅功能做一個例子。登入大概唔會係你個產品嘅核心賣點,但係冇咗又唔得。有冇世界級嘅軟件租用?有幾間,幾百蚊美金一個月起錶,同樣價錢請人只係請多幾個鐘。點解咁抵?因為有成千上萬客戶,好多人夾錢。可唔可信?有成千上萬公司用緊,起碼有好多人一齊考驗。咁簡單嘅功能自己寫都好快?看似簡單,但如果不只電郵加密碼登入,例如加入Facebook同LinkedIn登入,要可以合併或拆散賬戶,又或者想加多重密碼,就非常不簡單了。但佢冇你想要嘅一個好奇特嘅要求?通常佢太多功能嘅機會,遠超太少。而如果真係冇,應該慎重檢討,點解你嘅登入要求,會咁奇特嘅?

呢個改變,其實係逼自己仔細多一格咁去睇自己真正嘅賣點係乜,最後會發現:

一,原來團隊唔同人對於乜嘢係核心賣點,有唔同睇法。

二,大部份嘅組件,其實都只係必要的惡,而必要的惡,係應該畀錢搵世界級嘅軟件解決,以釋放公司資源,集中做好核心賣點。

三,就算唔計租定係自己砌,傾掂乜嘢先係核心賣點,本身就係一個做好營運嘅前提基礎,問題係,點解唔晨早做呢個練習?



cowriting space

科技人的共筆空間

宋漢生

Written by

宋漢生

cowriting space

科技人的共筆空間

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade