Member preview

“A “Sorry, we're closed” sign hanging in a store window” by Tim Mossholder on Unsplash

微軟75億的「道歉啟事」

微軟以25倍營收天價收購GitHub。GitHub係乜?行外人多數未聽過,行內人就幾乎個個都用,真係暫時未聽過有人唔用,公司唔用個人都用,唔畀錢用都免費用,唔用佢嘅公司大概好打有限(凡事都有例外)。同行外解釋GitHub係乜,佢自己CEO嘅比喻,係好似Wikipedia,俾三唔識七嘅大家共砌資訊,有得睇晒每一個編輯改變,有得審批通過內容變更,不過Wikipedia裝嘅係一頁頁嘅文章,而GitHub裝嘅係程式編碼。再簡單的講,GitHub係所謂「社交編程」嘅工具。

俾三唔識七嘅人一齊社交編程,有幾重要?有兩種場合。一種,係公司內部用,一般軟件開發,都會有超過一個人參與,就算唔係同一時間,一個人離開都會有另一人頂上,所以都需要工具去令合作較為順暢。另一種,係open source軟件,基本上成個行業,由伺服器到手機到網站等等,都係靠open source撐住,而open source軟件雖然有些有大公司撐腰,例如請同事去幫手寫,但好多都確實係由個人無償地出力維護。

而世界上嘅open source軟件編碼,放係邊到俾人共砌?就係GitHub。GitHub幫手寄存open source編碼,不收分毫,咁都肯?因為大部份人認識GitHub,正正係由使用式者共砌open source開始,所以係最有效嘅marketing工具,有數得計,錢呢,當然係公司內部用嘅客戶負責畀。

講番單收購,世界上最大影響力最賺錢但編碼又最收收埋埋嘅軟件係乜?就係微軟嘅Windows,所以微軟一向都同open source世界好唔妥,而亦因此令到後期微軟在行內神憎鬼厭。其實早期微軟形象好好多,事關佢當年就好似後來嘅蘋果app store咁,造就好多賺錢機會畀寫軟件嘅公司,仲要唔收呢家蘋果抽嘅三成分成。但自從互聯網出現,微軟在商言商,當然係不斷打壓呢個威脅自己嘅新軟件平台,總之互聯網應用越廢越好,打壓力度之大,從不惜一切用internet explorer整死Netscape,整死完再解散internet explorer條team,可見一斑。

但係到今時今日,大家都知,微軟亦都不得不承認,Windows屈機時代已成歷史,Windows可以斷續賺好多錢,但無得再屈機。在新時代,微軟想做雲端生意,但雲端Windows完全唔夠惡,二揀一,為長遠着想,一定係揀雲端棄Windows。Steve Ballmer最叻一步係落台,然後請到而家嘅CEO Satya Nadella,一上任就將Windows從神枱打番落凡間,宣佈以後在雲端會對作業系統一視同仁,唔會齋谷自家製嘅Windows。

當然,佢呢步唔係出於好心,係出於自救,但一間惡開嘅公司,要承認眼前嘅新形勢,好多時係比死更難做,微軟遲咗十幾年先肯接受,其實已經好勁揪,認錯係改正嘅第一步。而行收購GitHub呢一步,有買貴冇買錯,方向絕對正確,係一條75億美金嘅橄欖枝,起碼當半句唔開口嘅「之前唔好意思」。

行內人嘅餘悸,唔係一時三刻可以忘記,有人聲稱一聽到單收購就話要離開GitHub另覓新居。不過長遠來講,微軟在雲端都係想屈都冇得屈,有佢嘅存在,平衡下Amazon同Google,其實係好事。Satya Nadella不單止令微軟承認新形勢,仲能夠在軍閥割據嘅公司政治上擺平各方面人馬,重新上路,呢一點係神級嘅勁,難怪上任後股價升咗三倍!

Satya Nadella同Google嘅CEO一樣,都係印度人,仲要係印度土生土長到廿歲先去美國讀書個種,竟然升到上全球科技巨擘之頂位,好多人問點解美國科技界咁多華人,冇幾個做得到?係好有趣嘅一條問題。

原文刊於蘋果日報 2018年06月14