2021 科大新生攻略 | HKUST Freshmen Guide | By CSESS
最新版本 2023 科大攻略已經出咗,即刻 Click 呢度過去睇!
文、圖:AI字頭文字組、ChronoS
JS5200 Engineering
JS5282 Engineering with an Extended Major in Artificial Intelligence
目錄:
序
大家好,我哋係Computer Science and Engineering Students’ Society, HKUSTSU(香港科技大學學生會計算機科學及工程學系學生會)。
見到呢篇文章嘅你應該已經成為咗我哋科大嘅一分子,歡迎以及恭喜各位新生。呢篇文章會為大家講解吓科大嘅基本知識同埋兩個禮拜後Reg Day 需要做嘅準備。
同埋我哋嘅Reg 科攻略出咗喇。撳呢度可以睇到。
— — — — — — — — — — — — — — — — — 我是分隔線 — — — — —
新生必知
重要事項同日期
New Student Orientation
首先一定要提到學校官方嘅Orientation:https://nso.hkust.edu.hk。揀返你嘅School,跟住佢個流程做就OK 㗎喇。
JUPAS Online Registration
今年JUPAS入嚟嘅你可以係8月12號早上9點(最遲13號下午5點前)要接受咗Offer 同交留位費先。完成之後等到10點就可以去UST 嘅網站開始註冊啦,要交個人資料、開email 等等。
Collection of Student ID Card
今年同上年情況都差唔多,所以大家可以expect 會寄掛號畀學生證你,不過最好都係Reg Day 嗰日睇清楚今年嘅安排。
Peer Mentoring
每個人都一定要參加,除非你係SHSS 或者係IPO 嘅同學仔。入面主要係同senior year 嘅師兄師姐同其他freshmen 傾下計,可以拎到唔同讀大學嘅心得之餘又可以識下班新friend。如果你鐘意嗰group 人,記住入佢哋嘅clan,開sem 之後又可以再見到佢哋!
School Welcome and Orientation
呢個就係學校嘅official orientation event 啦,入面最主要係解釋同講下科大嘅環境、生活、學業等等。大家喺入面一定會見到UST 日落嘅相,你就會知點解會咁多人咁鐘意呢度嘅風景啦。
ELPA
如果你係Non-JUPAS 入嚟,又或者你被Pre-Reg 入LANG 1002嘅I 班(DSE 英文overall 拎3或者有分卷拎2),咁就唔好彩啦,因為學校會要求你開學前考一個叫ELPA 嘅試,用嚟判斷你嘅英文能力。Non-JUPAS 嘅你會根據ELPA 嘅分數分去唔同嘅LANG 班(A 最勁,之後係S,最後係I)。不過所有Year 1讀LANG 1003嘅同學仔最後都要考ELPA 㗎。
Academic Advising sessions
呢個大約係講下大學嘅重要事項,例如reg 科嘅概念呀、你個School 課程嘅架構等等。個個都參加㗎,而且每個School 都有唔同嘅時間,下面係所有School 嘅Link。
School of Engineering (SENG)|School of Business and Management (SBM) | School of Science (SSCI)|School of Humanities and Social Science (SHSS)|Interdisciplinary Programs Office (IPO)
至於School 係啲咩嚟?下面會提及㗎喇!
交通
雖然Reg Day 都仲係online 搞,但係經歷咗咁耐online 上堂,大家都應該好想親身入嚟科大campus。不過科大地理位置真係幾偏僻下,咁以下就簡單同大家講講常見可以搭咩車入嚟啦。
簡單嚟講,科大係喺彩虹向東同坑口向北嘅交界,所以真係幾山旯旮下。而且科大嘅主要出入口得兩個:北閘同南閘(North / South Gate)。以下係常見小巴/巴士路線喺平日同日頭嘅資訊:
小巴
11 系列
11號來往彩虹站同坑口村(經坑口站)。由彩虹去坑口係經北閘,相反方向嘅路線就係經南閘。想喺彩虹站出發就要畀$7.5,而喺坑口站出發就要畀$5.5。
11M號只來往科大北閘同坑口站,全程收費$5.5。
104
只來往科大南閘同牛頭角站,全程收費$8.3。
巴士:
91 系列
91號來往鑽石山站同清水灣泳灘(經彩虹站)。由鑽石山去清水灣泳灘係經北閘,相反方向嘅路線就係經南閘。兩個方向嘅全程收費都係$7.8。
91M號來往鑽石山站同寶林站(經彩虹站同坑口站)。由鑽石山去寶林係經北閘,相反方向嘅路線就係經南閘。兩個方向嘅全程收費都係$6.5。
792M
792M號來往西貢同將軍澳站,先經科大,後經坑口、調景嶺站,會兜得比較多路。兩個方向都係喺北閘上落車。由將軍澳站、調景嶺站出發嘅收費都係$7.8。
— — — — — — — — — — — — — — — — — 我是分隔線 — — — — —
簡略版科大架構
School 學院
科大係由五個School 組成,分別係:
工學院 School of Engineering (SENG)
商學院 School of Business and Management (SBM)
理學院 School of Science (SSCI)
人文社會科學學院 School of Humanities and Social Science (SHSS)
跨學科課程事務處 Interdisciplinary Programs Office (IPO)
Department 學系
每個School 係由唔同嘅學系組成,例如SSCI 就有Department of Mathematics 同埋Department of Physics 等、SBM 就有Department of Finance 等。至於我哋Engine School 嘅Department 就有:
計算機科學及工程學系 Department of Computer Science and Engineering (CSE)
電子及計算機工程學系 Department of Electronic and Computer Engineering (ECE)
化學及生物工程學系 Department of Chemical and Biological Engineering (CBE)
土木及環境工程學系 Department of Civil and Environmental Engineering (CIVL)
工業工程及決策分析學系 Department of Industrial Engineering and Decision Analytics (IEDA)
土木及環境工程學系 Department of Mechanical and Aerospace Engineering (MAE)
綜合系統與設計學部 Division of Integrative Systems and Design (ISD)
順帶一提:ISD 係唯一一個可以Year 1經JUPAS 直入(JS5211)嘅Division(唔使太理Department同Division嘅分別)。
以上嘅School 旗下嘅Department 會獨立或者合作咁提供唔同嘅主修/副修課程,第一年嘅JUPAS同學仔們都係屬於自己旗下嘅School。我哋呢個攻略最主要都係針對School of Engineering (SENG) 去講,如果你係Non-JUPAS 或者係其他School 嘅朋友仔,咁你可以稍移玉步去下一個section 啦,但係大家有咩問題都歡迎PM 問我哋!
相信Year 1嘅SENG同學仔們大多都係報JS5200或者新開嘅JS5282入嚟,所以係未有major 嘅(undeclared),當然報咗JS5282嘅同學會讀多個延伸嘅AI major。而Year 1就正正係畀大家試下take 下唔同course,感受下唔同學科嘅內容同教學,令大家對升Year 2揀主要嘅major更加清楚。咁SENG 有啲咩major 可以揀呢?
想詳細知道唔同School 提供嘅program,可以參考返:
https://join.ust.hk/zh-hant/our-programs
https://seng.ust.hk/academics/undergraduate/major-programs
另外,以下可以睇到under SENG 嘅Department:
https://seng.ust.hk/about/departments-and-centers
CS 係乜野?
相信大家睇得我哋呢篇攻略都係對CS 有興趣㗎啦。到底所謂呢個科大神科係讀咩㗎?CS 即係其實Computer Science,就係讀下同電腦、資訊有關嘅科。CS 有好多方面可以發展㗎,例如有AI、Software、Networking、甚至有得讀Game Development 添。
以最多人有興趣嘅AI 做例子,要讀下點樣用唔同嘅方法去收集同present 一堆data (Data Mining)、點樣去分辨一樣物體等等。如果大家唔肯定有冇興趣嘅,可以報吓啲Intro courses 去試吓㗎,In Sec 推薦大家試下COMP 1942 :)。
Students’ Society 學會
Soc 其實就係學生組織,而科大有好多唔同類型嘅Soc,例如School Soc (e.g. Engine Soc)、興趣Soc (e.g. 天文Soc)、運動Soc (e.g. 劍擊Soc)等。 每個Soc 都會為返自己member、讀嗰科/對嗰方面有興趣,甚至所有科大學生服務。
請容許我哋喺度hardsell 下,你哋睇緊嘅呢篇文唔係由校方寫,而係由我哋CSESS 寫嘅。CSESS 即係The Computer Science and Engineering Students’ Society,啲人會叫我哋做CS Soc,係under 學生會(Stduents’ Union a.k.a. SU)嘅一個Departmental Society。我哋每年都會搞下活動、派下福利咁;而嚟緊我哋會搞三日O Day,所以有興趣識人同埋玩嘅話就唔好錯過喇。
嚟緊我哋會喺8月12日JUPAS 放榜嗰日,set 個Zoom virtual counter,對我哋有興趣,或者有疑問嘅你記住嚟join 喇。詳情可以撳下呢度,或者跳到呢篇文章最後。
我哋嘅網站喺度: https://csess.su.hkust.edu.hk/
Major
因為大家冇Major,所以大家要諗定年尾揀咩major 啦。詳細可以上返呢個網,睇下詳細嘅major 介紹:https://join.ust.hk/our-programs/school-of-engineering
Minor
當大家讀咗一個sem 之後,就可以開始declare minor 啦,但係要注意嘅係你會多咗course 要讀,所以要留意workload 呀。
— — — — — — — — — — — — — — — — — 我是分隔線 — — — — —
科大常用Terms
青蛙路
由北閘行到Atrium 嘅其中一條路,據聞係因為落雨個陣會有好多青蛙出現所以會有咁嘅名。不過我哋咁耐都未見過 -.-。
火雞
Atrium 對出嘅地標,實際上係一個日晷,係科大最著名嘅地點之一。無論係第一次入科大定係畢業相,火雞都一定係大家嘅首選之地。火雞實際上嘅用途其實係用太陽嘅位置去推斷時間嘅,都幾得意㗎。
Liba
讀作「拉把」,即係Library ,大家可以喺Atrium 見到同入到去,通常係考試期間都會特別多人喺入面全日寒窗苦讀,追Mid-term或者係Final,我哋就會叫咁做「摺Liba」啦。
Atrium
係喺科大北閘行入嚟就見到嘅地方,主要係連接學術大樓唔同嘅設施同房,係大家返學必經嘅地方,而且通常都好忙好多人㗎,成日都有好多Society 係度搞event、promotion。
蘑菇
喺Atrium 最入嘅一個地方,類似係一個露台嘅物體,可以見到科大嘅無敵大海景之餘,對下都可以見到LG7(科大最底嘅樓層)。由於科大嘅讀書壓力實在太大啦,當考試考得唔好,或者太多assignment 要趕嗰陣,大家都會話想「跳蘑菇」。
Seafront
喺海旁嘅一間餐廳,通常係住Hall 嘅同學仔想食宵夜嘅好地方,有啲人買完嘢食甚至會去海邊(真Seafront)同friend 坐住,一路食嘢一路對住個海吹水,真係諗到都覺得寫意!
Skywalk 天行
每逢轉堂嗰陣,大家都會選擇行大路去唔同嘅room,於是就會出現塞lift 嘅情況,有機會會令到大家遲到。所以有啲朋友仔會選擇穿插好多唔同嘅細走廊,有時候甚至會更快到目的地添,我哋就會叫咁做Skywalk 啦。
金兜
科大「美食」天堂(#曲),聽講食完可以練到鐵腸胃之餘,亦都可以幫大家慳番唔少嘅錢。不過,我哋嘅Welfare Sec 話金兜其實都有啲好食嘅嘢嘅,想知就問下我哋啦!
— — — — — — — — — — — — — — — — — 我是分隔線 — — — — —
重要工具
USThing:
USThing 係由科大學生開發嘅必備懶人app:睇時間表、睇grade、book場、搵地方等,基本上係科大學生生活不可或缺嘅一部分。Fun fact: 喺2021年情人節嗰陣,仲多咗個交友嘅功能,類似Tinder 咁。
USTransit:
科大太遠唔識去?除咗Google Map,呢隻app 都幫到你。佢可以show 到邊啲車入到科大,亦都同到你講佢哋路線、班次同埋幾時到站等資訊。
Path Advisor:
出面入嚟科大難,但科大入面仲難行。成個迷宮咁,唔識Skywalk 真係煩。
唔緊要,Path Advisor 幫到你。
揀好起點同終點,佢就會gen 條建議路線出嚟,想去邊都冇難度!雖然其實仲係有難度,但好過冇。
Duo Mobile:
其實呢隻app 就冇乜好講嘅,因為佢係用嚟負責security。Duo 用Two Factor Authentication,即係除咗密碼之外另一重保障,去確認個user 嘅真實身份嘅驗證手段。要入到科大內聯網,就要用呢隻app 去驗證。
My Portal :
呢個基本上係科大人嘅內聯網嘅入口,佢入面整合晒大家要用嘅網站嘅link。
ITSC:
相信大家一開始一定會對呢個名頭痛,但其實廣義上ITSC 只係一個提供資訊服務嘅平台,基本上啲安全驗證、校內Wi-Fi 甚至學生email 都有佢哋份負責。狹義嚟講,ITSC 就可睇成大家嘅通用用戶名,例如如果我叫陳大文CHAN Tai Man,咁我個英文簡稱係TM CHAN,ITSC 就可能係tmchan。心水清嘅同學應該知道TM CHAN 其實好多人都係咁叫,陳大敏、陳兜踎等,所以真正嘅ITSC 係tmchan 然後後面加啲字母,例如tmchanab 咁,視乎呢個TM CHAN 有幾早入UST。
Office 365:
學校嘅Microsoft Office Account,平時都係用Outlook 收發email,同埋提供埋Word、Excel、PowerPoint等。Email 方面,格式係 your_itsc@connect.ust.hk ,your_itsc 就類似tmchanab 咁。
Student Center (SIS):
呢個係官方嘅管理平台,畀學生處理交費用、睇academic progress、reg 科等等對學生好重要嘅功能,所以真係要識!
Canvas:
呢個係一個非常重要嘅平台!佢主要用嚟管理大家上嘅唔同course 嘅內容,例如lecture notes、online quiz、grading 都要用到呢個平台。
Healthy Lifestyle Course:
呢個網站主要用嚟reg 唔同嘅運動、skill class 等,亦都可以check 自己個進度。記住時不時要入去check 呀。想知詳情或者嚟緊有咩活動,可以入呢條link:https://hlth1010.hkust.edu.hk/about/index.html。
UST Space:
科大有咁多course 揀,唔通個個都take 得?未上過某啲course,但又猶豫take 唔take 好,呢個網就拯救到你。呢個網主要係用嚟畀學生幫唔同course 畀feedback,例如可以講下workload 大唔大,教授教成點等等。除咗睇之外,你上完某啲course,有感而發嘅話,都可以貢獻下,寫下feedback 咁。唔想後悔揀錯course 就要上去睇喇。
— — — — — — — — — — — — — — — — — 我是分隔線 — — — — —
後記
當你睇到呢一段嘅時候,首先我哋要多謝你咁俾心機睇哂。相信你依家已經對科大同埋Reg Day 有一定嘅認識。如果有咩疑問可以PM 我哋,我哋會盡快解答。我哋亦會喺唔同嘅社交媒體上share 最新資訊,如果想第一時間收到通知,大家記得要follow 我哋嘅social media。
另外,我哋嚟緊喺Reg Day 會開一個Virtual counter,大家可以嚟問我哋關於Engine、科大、CS、O Day 等等嘅問題,幫埋大家報O Day 都可以㗎,或者純粹嚟同我哋傾下偈!
詳情如下:
日期:12/8
時間:12:00–18:00
平台:Zoom
link: https://hkust.zoom.us/my/csess?pwd=ZU1WcGhFaTlNaHlWOUtjMjRWOXpjdz09
到時嚟搵我哋傾偈啦!
CSESS Facebook page: https://www.facebook.com/csess.hkustsu/
CSESS Instagram: https://www.instagram.com/csess.hkustsu/
CSESS website: https://csess.su.hkust.edu.hk/