I.「計」時－ChronoS上莊感言
文、圖：ChronoS
經過Promotion Period、Consultation、Annual General Meeting 等等嘅活動，ChronoS 正式上任成為二零二一至二零二二年度香港科技大學學生會計算機科學及工程學系學生會啦。
大家可能喺Promotion Period 中唔同嘅活動中對我哋嘅Excos 有略略嘅認識，不過呢份E-newsletter 可以令大家更加熟悉我哋。而呢一份上莊感言會係我哋第一份寫嘅E-newsletter，希望大家睇得開心同埋多多支持我哋以後嘅E-newsletter 啦！
Chairperson — Lin, Matthew
大家好，我係今屆CSESS 嘅P — Matthew！
唔經唔覺就上咗莊，感覺好似發緊一場夢，一場美夢。上嚟UST 嘅時候其實已經有想上莊嘅諗法，但就淨係得個想字。始終一上嚟就全online，想花少少時間熟習下新環境，認識下新朋友先再作打算。填表做CSESS member 嘅時候，見到報名表上有個參加Sub com 嘅選項，諗住可以有啲讀書以外嘅嘢做下咁，冇諗太多就剔咗。喺活動中除咗識咗幾個朋友之外，仲有一個運用我知識嘅機會，設計咗一個member 幾鍾意嘅遊戲，好有成就感。於是就選擇把握面前嘅機會，下定決心上莊。轉眼間半年就過咗去，成班莊員一齊經歷咗傾莊、Pro P、Con day 同埋AGM。一齊笑過、嬲過、癲過，最後有CSESS members 嘅支持，一齊上莊。
好多謝一路以嚟咁多members 嘅支持，冇你哋就唔會有我哋呢一支莊。亦都好多謝咁多位莊員一路以嚟嘅carry，肯認識我呢一個咁靜嘅人。好希望嚟緊呢一年同咁多位莊員會有更深嘅友誼同默契，搏盡為CSESS members 服務。一齊發夢，一場CS 夢。
Internal Vice-Chairperson — Choi Hiu Laam (Nicole)
Hello，我係CSESS 嘅IV — Nicole。
雖然到依家仲對上莊好冇實感，不過我都真正明白到自己已經係CSESS 嘅Exco 啦！
喺半年前俾人叫咗去參加咗CSESS 嘅Sub-com function，當時唔太主動同唔太鐘意social 嘅自己識到一班嘅朋友（包括依家嘅莊員）。機緣巧合之下就去咗傾莊，我自己幾鍾意同一team 人一齊合作做事，鐘意同自己圈子嘅人一齊傾偈，笑下笑下又一日，所以我依家已經係CSESS 嘅IV 了 :p。
呢半年嚟真係改變咗我唔少生活，晨早起身趕year plan、同莊員傾偈傾到通宵達旦（經常性傾到聽到雀仔叫）、識到幾個知心好友…… 我相信上莊一定會為我嘅大學生活增添唔少趣味 (´∀｀)。
經過咗漫長嘅Promotion Period、AGM 等等嘅活動，途中發現搞一個活動同籌備上莊真係並不容易，所以好多謝各位莊員嘅努力、上莊嘅意見，更唔少得支持我哋嘅members 啦！雖然不得不說期間真係有啲辛苦同壓力，但係喺過程中好開心可以同莊員共事，變得更親密，個人認為非常值得！接下來依然有唔同嘅挑戰等緊我哋，我哋會繼續努力為呢個soc 付出！同埋希望members 可以繼續支持我哋啦，畢竟大家嘅支持會化成為我哋嘅動力！
平時我好鍾意打機XD，所以大家快啲join 我哋嘅Discord gaming server 一齊打機啦（當唔洗趕assignment 同莊務嘅時候T_T）。
External Vice-Chairperson — Tse Ho Wang (Terry)
Hello，大家好，我係CSESS 嘅EV — Terry！
是咁的，本來小弟我入左UST 嘅CS major 之後，打算尋尋覓覓，冷冷清清，淒淒慘慘戚戚咁渡過大學生涯，連CS member 都唔係，只係想做一個安靜嘅毒男。點知，係一個陰雨綿綿嘅一日，我收到Nicole 嘅message，佢問我：「你雖然入咗科大CS，但係你甘心渾渾噩噩咁過埋呢三年咩，有冇興趣一齊上莊？」佢嘅呢一番說話，就如同當頭一棒，令我豁然開朗，彷彿係上帝嘅旨意，要叫我唔可以咁樣沉淪落去。係呢個教育制度之下，經過小學同中學嘅洗禮，我除咗讀書之外都係讀書。毫無樂趣可言，唔通我入咗大學都淨係得讀書？就好似，睇完一本教科書之後，佢建議我睇多兩本，我睇完第二本，又建議我睇多兩本；而第三本，又仲係建議睇多兩本！結果我再去睇第四本。當我睇完第四本後，唔洗講，又建議我睇多兩本。其實，吾生有涯而知無涯，以有涯隨無涯，殆矣。學海無涯，回頭是岸。我決定，一改故轍，一邊讀書，一邊社交，唔再做一個考試機器。
為左認識一班志同道合嘅好伙伴，而且身為一個CS 人，點可以唔為CS soc 付出一分力。所以我選擇上CSESS 呢一支莊。
而我最後覆咗句，「我願意。」
Internal Secretary — Yeung Kai Chun (Leonard)
大家好，我係CSESS 嘅In Sec — Leonard！
其實上莊呢樣嘢我從來都未諗過。我仲記得一開始入嚟UST就報咗CSESS嘅O Act，之後做咗CSESS 嘅會員，仲要無啦啦走去咗玩Sub-com，識到一班幾好嘅朋友之餘，亦都慢慢接觸到上莊嘅資訊。眨吓眼，就過咗Consultation Day 同Annual General Meeting，無啦啦就做咗Exco 上咗莊啦。
個感覺雖然仍然係好surreal，但係我亦好興幸可以有呢個經驗，特別係今年係疫情嘅情況下，好難得可以識到一班可以一齊笑、一齊努力、一齊傾到計嘅莊員之外，亦都係Promotion Period 期間接觸到對我地soc 有興趣嘅members。希望嚟緊一年，我地可以仍然係咁困難嘅時期服務members，令大家可以係生活中搵翻少少嘅樂趣之餘，仲可以為自己嘅大學生活添加翻少少回憶。
External Secretary — Chan Chung Kai (Kai)
大家好，我係ChronoS 既E Sec — Kai.
正所謂，天將降大任於是人也，必先苦其心志，勞其筋骨，餓其體膚，空乏其身，行拂亂其所為，2020–2021 可以稱得上為多災多難嘅一年。係呢一年，病菌肆虐橫行，人人自危。絕大部份嘅堂都淨係可以網上授課，大家應該比較難識到新嘅朋友仔。而我好好彩，有參加Sub-com，識到一班好好嘅朋友，所以決定一齊上莊，一齊為個soc 出一分力。
運動係其中一種可以認識新朋友同埋增進感情嘅方法，就好似上個世紀70年代，中美兩國關係破冰，就係因為中美兩國舉行乒乓球友誼比賽。而我哋可以效仿，一齊打下羽毛波（利申新手），如果大家有興趣嘅可以約我一齊打，為呢一個沉重嘅學業中帶黎一絲喘氣嘅空間。
Financial Secretary — Lau Sin Yee (Fiona)
大家好，我係CSESS 嘅Fin Sec — Fiona。
一開始其實冇諗過自己會上莊，自己本身就係一個hea 底嘅人，都知上莊一定會搞到自己好忙；又唔係一個特別無私嘅人，鐘意為其他人服務；寫落CV 又冇咩用，咁上莊嚟其實好似真係冇咩用。所謂「上莊正傻仔」，其實諗返真係幾真。由Pro P 到依家，其實都已經有幾次覺得自己好傻，玩嘅時間都唔夠（永遠都唔會夠XD），點解仲要分啲時間出嚟做莊務，仲要其實未上莊，未真正開始忙。但係當辛苦嘅時候得到莊員嘅鼓勵，諗起上莊令我識到呢班friend，就會覺得可以堅持落去。
一開始想上莊，無非都係想挑戰自己，去做啲自己冇做過嘅嘢，覺得應該可以學到好多嘢，但係依家覺得除此之外最珍貴嘅就係呢份友誼，特別係喺依家過咗成年都未返過UST 上實體堂嘅情況下。希望我哋喺嚟緊呢年可以令咁多位members 享受我哋搞嘅活動，無論嚟緊呢年有幾困難，我哋都會盡力服務大家。
Welfare Secretary — Chan Yan Nam (Chan Chai)
大家好，我係ChronoS 嘅Wel Sec — 陳仔。
雖然我冇參加Sub-com function，不過同莊員一齊經歷Pro P 同AGM 之後，我覺得上莊好有意義，所以好開心可以同各位莊員一齊順利咁上到莊。上莊可能會好辛苦，不過我係唔會驚㗎，因為我相信我能夠從中學到好多嘢，同埋我都好想為個soc 出一分力。
而作為Welfare Sec，我嘅職責就係提供不同嘅福利比各位members，服務大家。 所以，我會盡力搵啲好使好用嘅product 比members，希望佢地開開心心。
接下落嚟我哋會有唔同嘅活動，敬請大家期待啦！
Publication and Promotion Secretary — Wan Ho Yan (Wan)
Hello，大家好，我係CSESS 嘅PP Sec — Wan :)
感言係指去表達一個人對某啲事或者另一啲人有嘅諗法。而我對自己上莊呢件事仲未有一個好明確嘅感受，所以我都唔知寫咩好.___. ，咁就不如講下上莊呢樣嘢啦～
有人話上莊好傻，冇錯，睇完Fin Sec 篇文都唔洗多講。但亦有人話正正係因為咁樣，呢班同你一齊做傻事嘅人會係你大學生涯中好難得嘅一班朋友。都啱，喺踏出社會之後，又有幾可可以遇到好似上莊咁樣嘅機會。經歷左Pro P、AGM、Con day，如果冇呢啲活動，我哋就唔會知道支莊係點樣運作，我哋唔會有機會認識到各位members 同埋上莊們（佢哋真係幫咗我哋好多thank you:,)）更加唔會有機會去同呢班嚟緊要對一年嘅莊員夾下，一齊做下嘢。其實呢啲又係咪Pro P、AGM、Con day 嘅實際意義呢？都係我自己嘅睇法嚟啫。
一直以嚟有人問我上莊為咩，我都係答佢想學嘢，因為我對每件事嘅基本睇法都係咁。咁問題黎喇，上莊嘅意義喺邊？
或者到頭來並唔係我揾唔到個答案，而係問錯左問題。或者我應該問自己，我想為上莊賦予啲乜嘢意義？莊期啱啱開始，我要去感受同經歷嘅仲有好多，可以賦予嘅意義可能仲未有。但我希望係落莊嘅時候唔再係好簡單咁同人講我學到嘢。最後希望我哋唔會辜負各位members 嘅期望，帶到比你哋令人滿意嘅活動同福利啦！:3
Sports and Recreation Secretary — Chan Chun Yuen (Revenant)
Hi，我係CSESS Session 21–22 嘅Sports and Recreation Secretary — Revenant.
好老實講，我其實到傾莊嗰日都唔知自己有咩post 想做，甚至係完全唔知自己到底係咪想上莊，因為即使參加完O Act 同Sub-com 活動之後，我係對於我自己嘅社交能力都仍然感到迷惘，頹毒摺齊晒。不過希望自己會有啲新嘗試同埋對運動都有少少興趣，就結果而言，我依家就上咗莊啦！
正如我或者我其他莊員喺Pro P、Forum 嘅時候有講過，基於疫情嘅關係，我哋有好多活動都基本上係冇得實體做嘅，即使有都好，帶住個口罩同唔帶口罩個體感都差好遠。不過即使係咁都好，我都希望嚟緊Intramural 又或者其他活動都搞得成喇。
我自己平時除咗打跆拳道同識吹clarinet ，之外都有打機嘅，雖然幾廢，不過如果你哋喺CSESS Gaming Server 嘅話可以試下叫我一齊玩，如果我有睇到又仲未因為上莊P俾我讀數嘅「天啟」走火入魔嘅話應該都會同你哋一齊打機lmao！
Academic Secretary — Chak Wai Ho (Ben)
Hello，我係ChronoS → CSESS 嘅A Sec — Ben。
半年，我由一個啱啱入嚟科大，乜都唔知，到依家正式變成CSESS 嘅Exco。
你問我點解想上莊？其實原本喺中學都有聽過大學有五件事，但係對上莊都冇乜認識。後尾入到嚟，想周圍見識下，就join 咗O Act，做咗member，之後機緣巧合下玩埋Sub-com。喺過程中識到唔少人，可以一齊做野，最尾都搞咗個唔算完美，但幾有成功感嘅event。就係咁，我就開始對上莊產生咗興趣。
有云：「成功係靠三分天賦、七分努力，淨低九十分睇運氣。」經過咗漫長嘅Pro P 同其他Con day、AGM 嘅event 之後，我終於都成功成為一名Exco。之所以想做A Sec，係因為本身我已經鐘意CS 方面嘅野，再加上我中學嗰陣同STEM 科嘅老師嘅關係keep 得唔錯，希望同CSE department 可以保持良好嘅關係。
自問呢個sem 壓力算大，但我相信呢個係一種磨鍊。雖然嚟緊呢年會發生嘅事都係未知之數，但我相信我哋咁多位依然可以keep 住動力，為大家服務。
Marketing Secretary — Lau Yan Hei (Harris)
Hello!!! 我係ChronoS 嘅Mark Sec Harris。由Sub-com 到依家好似已經經歷左好多野咁，但係上莊嘅經歷而家先至正式開始，多謝大家信任我地！如果你喺度睇緊呢段文，好有可能你係一位充滿好奇心睇緊CSESS Medium 嘅Freshman。因為我當初都喺度睇其他人嘅上莊感言而我而家可以話俾你聽，加入我哋嘅member 絕對係一個唔會令你後悔嘅決定！
雖然話就話啱啱先開始上莊，但係依家已經感受到其實上莊係一件幾開心嘅事。如果我大學year 1 嘅生涯入邊冇咗上莊呢樣嘢嘅話真係會變得好dry。好開心可以認識到一班朋友，希望嚟緊可以盡我一分力服務大家！！
General Secretary — Chan Wai Chun (Cdb)
大家好，我係ChronoS 嘅Gen Sec — Cdb。
其實本身我都冇諗過上莊，因為我都係一個比較內向嘅人，唔係好識同人溝通又有啲怕羞。當初因為對CS 有興趣而參加咗個O Act， 識到一班好好嘅組爸組媽同組員，加深咗我對CSESS 嘅認識同興趣，覺得上CSESS 莊應該都幾好挽，所以就上咗莊la。
經歷過Pro P 同AGM 之後，我覺得上莊雖然係好chur，但係同班莊員一齊chur 嘅時候係開心嘅，同埋睇到chur 完之後嘅成果係會覺得係值得，並享受呢個過程。到而家諗返起，我都覺得當時決定上莊係啱嘅，上莊令我識到一班好warm 嘅莊員，並豐富左我嘅大學生活。
接下嚟嘅一年我好想認識咁多位member，同大家打成一片。大家都可以多啲嚟搵我吹下水同打機! （雖然我打機好廢 (T＿T) ）
記得要多啲參與同支持下我哋嘅活動呀！
記得要多啲參與同支持下我哋嘅活動呀！
記得要多啲參與同支持下我哋嘅活動呀！
重要嘅嘢要講三次 (*≧▽≦)
多謝大家睇到最後，希望大家會對我哋多咗了解！如果有機會，希望我哋可以喺呢一年內同大家相見啦！🥰🥰
