咸濕佬嘅國度
唔好一個女人喺呢個國家踩長途單車
自從喺西藏比公安摸大脾，擋住唔比你走……原來，入到穆斯林/伊斯蘭國家先係惡夢嘅開始。
由吉爾吉斯開始，對住向我打招呼嘅人以笑容回應隨時間愈黎愈少。到達外國人比本地人多嘅阿聯酋後，就好似一個已經吹漲的氣球，瞬間放走入面啲空氣。
除左第一日由關口踩30公里到第一個鎮，我無踩伊朗。
一直以為自己好高又大舊又唔係港女樣會比較安全。自從喺西藏比公安摸大脾，擋住唔比你走……原來，入到穆斯林/伊斯蘭國家先係個人女騎士（下稱獨女車友）惡夢嘅開始。
吉爾吉斯：摸大脾內側。
塔吉克：問你要唔要一齊沖涼。
烏茲別克：問你要唔要搞野。
土庫曼：握手多謝之後拉住強吻。
阿曼：用按摩做藉口不斷掂不斷輕摸，問你可唔可以錫。
阿曼已屬咁多獨女口中最安全嘅國家，路上未曾被司機騷擾，雖然交談中依然會被摸，但我同其他獨女車友一樣覺得阿曼唔會令人失望。
阿聯酋：可能太多外國人，地方太細踩得嗰3日所以咩事都無。
伊朗：獨女車友被性騷擾嘅國家第一位，我選擇唔踩車，大部分時間都有人陪行，有男人行過黎即刻西面走人所以都無事。
一個旅行，每次見到人就西面，點解要咁？
上星期，巧遇一位波蘭獨女車友，佢喺伊朗差啲比人強姦兩次，踩緊單車被開住電單車嘅當地人攇屁股一次。
佢踩左4年單車，40幾個國家都無事，喺伊朗區區十日……係．十．日，就發生3次。安全至上，佢決定唔踩伊朗。
因為佢嘅𡚒力抵抗，喺個男人逃走嗰陣影埋佢架電單車相警察先捉到佢，判佢坐監6個月同埋鞭打75下。
然而，個男人有兩個老婆，難道要發洩嘅機會仲唔夠多咩？你信唔信佢有1000個老婆都會照強姦？我信。
而我，雖然無比人強姦，第一次長一年幾旅程被騷擾一次，第二次旅程喺穆斯林/伊斯蘭國家只係5個月就被騷擾10幾次。
呢啲唔係個別例子，隨便問下獨女車友，10個有8個喺伊朗都頻頻出事，甚至係每日都會發生，喺穆斯林/伊斯蘭國家至少被言語騷擾或摸過。
根據一啲當地人嘅說法，佢地認為外國人思想比較開放，所以外國人等於性開放。甚至政府會認為係女人嘅問題，因為佢地嘅衣著打扮吸引到男人。然而外國人到伊朗雖然唔會包哂全身，但係根據法例規定，每個女人喺伊朗都要包頭，唔可以露腳裸同手臂。到底外國人衣著喺呢個規定下可以幾「吸引」，我真係好質疑。
而係咪外國人先會出事？原來唔係。
最近伊朗女權份子催促政府立法防止性騷擾。根據伊斯蘭國政府現有嘅法例，同性戀、婚姻倫理問題反而會被鞭打甚或虐待至死。
即係其實性騷擾喺呢個國家入面一直係一個問題。當然「導人向善」嘅伊斯蘭宗教政府唔係咁諗。
政治正確是種毒藥
我同波蘭女車友又或者好多女車友一樣，聽到好多好多，極度多關於伊朗嘅好人好事，有幾好客，有幾安全。好客呢樣野我有另一種感受，日後喺另一篇文再提。
的確，伊朗唔係西方國家啲新聞講到咁亂，打杖乜乜乜。的確，伊朗嘅歷史、文化同地理環境都值得一看。
然而講到伊朗有幾好嘅人唔係有J就係Couples，唔係Backpackers就係電單車手。雖然我識有Backpacker喺城市都比人摸過胸同屁股，不過相對少好多。點解佢地少啲機會比人落手，其實好簡單，Backpackers通常出現喺人多嘅城市，電單車手因為架車快，而且包到實哂戴哂頭盔睇唔到樣未必分得清係男定女。
因為一致嘅好評，好多女士都比個機會伊朗，縱使大部分獨女車友同大家講唔好一個女人踩伊朗、縱使被提醒嘅獨女車友都喺伊朗出事。
波蘭女車友將佢嘅故事打左出黎，佢收到好多打氣嘅留言，好多踩過伊朗嘅獨女車友紛紛出黎講自已嘅經歷，亦有好多人咁回應：
「其他國家都有好多強姦犯。」
呢個世界有好人有壞人，同我阿媽係女人，十二碼一係入一係唔入一樣係廢話。
左膠，大愛包容，懶係多元We are the world。為左政治正確，將世界危機降到最低，將現實存在壞嘅事情美化。
呢篇文我打左好耐好耐，我唔知點表達。當大家只係將事實講出黎，有人咁回應：
「我或者好多朋友喺呢啲國家都有美好回憶。」
「咁樣概括對佢地好唔公平。」
「呢個國家依然係美好的，要去睇好嘅一面，好嘅野你未睇到姐。」
無人話伊朗所有男人都係強姦犯，所有穆斯林/伊斯蘭國家嘅男人都係咸濕佬。親身喺呢啲國家遇過好多真心友善嘅男士，只係眼前嘅事實證明「機率」比其他地方高好多。
因為機率而保護自己，點解會變成對個別國家或者宗教嘅不公？
好啦，你要咁公平丫嘛，咁ISIS都唔係全部都係壞人都會殺人，之但係我唔會走去ISIS領域好正常姐？
日本咁安全啲人又有禮都有好多癲佬，喺地鐵非禮學生妹，謀殺案多不勝數，但係依然有一大堆港女走去日本旅行打卡Shopping。
如果你送張免費機票連住宿比啲港女，叫佢地自已去印度旅行，我諗十個有九個送都唔會去。
政治正確，其實只係用美好嘅幻像包裝黎害人。
遇到呢啲人，一個都嫌多。
我已經厭惡每日要面對男人無禮地打招呼，懶係好心咁接近你之後原來都係想要搞你，咁我寧願放棄用單車去了解呢啲地方。
本來伊朗之後一直都係諗住行土耳其，從獨女車友口中聽到唔少喺土耳其遇到怪叔叔嘅經歷，自我心理建設過：踩完最後一個穆斯林國家就唔洗再西面喇！然而心入面完全抗拒自己比次機會土耳其。
喺離開伊朗最後五日，朋友突然一個提議可以去阿塞拜疆，入喬治亞再坐船去保加利亞。係喎！條條大路通挪威，總有方法避埋土耳其。
你可能會諗，為左避開越兜越遠。
旅行係為左自己開心，唔係為左要面對咸濕佬，唔係要為左每一公里都要踩車仲要放自己喺無奈之中。
而且我已經面對左好多次，唔洗再比多啲咁正嘅經歷我。
我寧願兜遠啲去享受，用真實嘅笑容回應當地人。
睇開我個PAGE, 或者識我嘅人都知我唔係正能量爆棚。我從來唔會宣揚追夢，旅行有幾好幾正去呀，做自已呀，無夢想同條咸魚有咩分別呀。
現實上，旅行可以好伏，一個女仔旅行可以更伏。出得去就要承擔有機會遇到種種唔想遇到嘅事，唔係Victim Blaming，只係就算你點樣Alert, 點保護自己都好都有可能身陷險境。
當我置身喺呢啲情況中，當下係完全比唔到一個我已經私下幻想過無數次嘅最佳反應。
有時係路上遇到嘅陌生人，有時甚至係有好多女性比左好評嘅梳化客主人。
去到咩程度可以報警？無證無據咁點算？國情唔同又會唔會反咬自己一口？啲陌生人轉眼就過點報？每次都係無去到可以出手嘅程度，喝止不成出手又會唔會變左係我嘅問題？
點都好，遇到呢種情況，都盡量出聲喝止或報警千祈唔好就咁 #METOO 就算。
伊朗，去唔去好？
講到咁危險，係咪唔去呀？可以呀，個人選擇黎姐。世界咁大，唔係個個地方都要去哂。Backpacking亦可以話係安全，所以想去伊朗就Backpack啦。
不過，如果仲係有人想一個女人喺伊朗踩單車，我真係唔建議，十萬個唔好。
一係喺呢個國家搵人一齊踩，一係就SKIP到其他地方踩。如果要堅持，係你嘅選擇，無人阻到你，只能夠祝妳好運喇。
共勉之。
最後，我想Share兩個獨女車友分別喺2017年同2018年踩伊朗時遇到嘅事。
https://trientrapt.com/2017/03/11/50-shades-of-blue-en/
No. I cried, I was empty, exhausted and felt enormously misunderstood. Because, ‘Well, in each country you do have bad people anyway’ it sounded. ‘Uh yes, but three incidents in four cycling days… Sorry, that, I never saw before.’ And ‘Iran has good people. What you say isn’t possible, you are lying, how dare you!’ and ‘Hey, rejoice, you are still alive nevertheless, look at the positive side!’.
Cycling alone in Iran does not seem to be an option, being solo woman here makes a difference. Many women on bikes confirmed that they were harrased here, men and couples have only good experience. Yes, I will get on the bus or wait for a few from Germany, which is nearby. But I am a loner. I like a tent and I do not like to tangle people. Adjusting to others just does not work in my case. Yes, that’s what to do. In the meantime, my hosts are flooding me with kindness. They do not allow me to go to the store. Iranian hospitality full option
Thanks for reading, it would be super grateful to follow me on other medias…
