三項鐵人軍訓日
阿曼
源住HIGHHIGH駱駝村小路無幾耐就到達一個非常出名嘅景點 — Bimmah Sinkhole, 即係地底天然泳池，泉水同海水嘅融合，所以有小小咸扑扑脆。喺酷熱嘅天氣下踩左30公里跳落水，爽過冰紅茶。
遊完番上岸，坐喺陽光底下半個鐘啲衫已經乾哂。食個琴晚煮好嘅隔夜飯，再踩30公里到下一個又係非常出名嘅景點Wadi Shab。
Wadi阿拉伯文即係溪谷。原定計劃係喺附近過夜第二朝先去Wadi Shab，而Wadi Shab要坐程船加來回行個幾鐘山。雖然攰攰地，但係時間尚早，到左之後買杯野飲十五十六唔知要唔要當日去埋。
有個阿曼哥搭訕，佢不斷慫恿我係去就要出發喇，如果唔係就天黑無船番黎架，呢頭好多野睇，留番啲時間聽日睇啦。
佢好似好熟路咁，我決定跟住佢行，開展我三鐵嘅一日……
跟住阿曼哥快速嘅步伐，雖然唔係上山下海，但係條路都幾「天然」下，時不時要攀石。之後見到有啲人遊水，個景又靚靚地，我以為到左啦，原來唔係，阿曼哥盡地主之誼帶我行入啲，開始游水、過河、行、爬、遊水、行。
行到一半，阿曼哥話：呢度，跳！
下？跳！？
我屌……跳崖……無啦啦跳乜崖，咩心理準備都無。
我叫佢跳先，睇佢落邊個點保命呀大佬。
轟隆！ You jump I jump. 跳完，未完架。繼續游水、行……
前面有一個小窿，佢帶左我去最入嘅洞穴。洞穴入口細到只可容納一個人。陽光喺水底反射下好似經過一條綠色嘅時光隧道，慢慢游入洞穴。
Mission completed，完！
正當我以為完喇，呢度靚到喊呀，影埋相準備收檔，阿曼哥指住條繩話爬上瀑布上面……
爬繩？做乜由三鐵變左軍訓？
啲石跣到喊，唔捉實撞到頭跌落無底洞可大可小。就算完全無食奶嘅記憶，用盡食奶之力，總之就死左上去。
有上就緊係有落，落到一半阿曼哥又叫我跳。今次啲石近到視覺上覺得係會撞到，但係唔跳咁落去都驚驚地。
阿曼哥不斷話：信我！跳啦！
喺跳之前心理建設左10秒，同自己講一定要有咁遠跳得咁遠……跳完喺水中已經FEEL到體力盡耗，只靠脂肪浮上面。
然而，仲未完。
阿曼哥叫我游到瀑布底下，佢捉實我隊我落瀑布下面修行。印象中啲人係坐喺舊石比瀑布沖……水太深，我只可以捉住條繩，要用自己嘅力量同瀑布對沖先可以抖氣。但係我已經無力，個口入哂水遇溺咁款話夠喇我要出去。
唔知佢係咪聽唔撚到定係一心想我有個難忘嘅經歷，阿曼哥一路話唔洗怕一路將我個人打平咁放，話踩單車好攰，用瀑布水按摩個背……真係有心喇。
喊出黎，逃出之後我淨係識浮喺水面攬住舊石發呆。
回程時，對腳連支撐都無力，不斷跣親仆街，行到番坐船個位啱啱好天黑哂。因為啲船夫已經收哂擋，阿曼哥親自開船番對面岸，佢話求生技能……乜都要識少少。
多得阿曼哥嘅三鐵軍訓令到個旅程咁特別（地攰）……Adventure呀嘛，係咁上下啦唉。
後記
散水時我話想搵個當地人屋企留宿，因為真係攰到唔想開營……阿曼哥極力推薦我喺沙灘紮營。OMG，佢仲親自去睇邊度最安全，結果佢搵到個地方咁啱有兩個遊客紮營，佢地個導遊仲煮埋飯比我食。
夜晚睇到好靚嘅星空，朝早有最美嘅日出。自從睇日出都係因為OT到朝早而睇之後，我終於睇左一次正常嘅日出了。
Thanks for reading, it would be super grateful to follow me on other medias…
