EP 1 踏話頭
逐家好，我是a姆（e̋-mù），歡迎收聽「台語tsín袂輾轉」。
頭第一集，我欲介紹我家己，「a姆」這个名是對英語的字母「m」來的，這个「m」用台灣人模仿日本話的發音，唸做「e̋-mù」（エム）。為啥物愛共家己的名號做「a姆」咧？因為我讀國校的時陣tsín愛看一个bàng-kah，內底有一隻足奅（phānn）的貓仔叫做「小m」。我誠佮意這隻貓仔，自按呢，我佇當時網路頂懸共家己號名做「小m」，嘛愈來愈濟朋友就按呢叫我。高中的時陣，有一个面看起來袂輸一隻猴，予人號做「老猴」的同學，伊用較台語氣的發音，叫我「e̋-mù」。從到今，不時有人用「e̋-mù」叫我，予我感覺tsín親切。
基本上，這个podcast的內容我嘛無限定，我就是話玲瑯，講一寡日常的543，我感覺有興趣的代誌。親像我對台灣、外國的語言文化就tsín有興趣，我可能就會較捷講這方面的代誌。若準講這个podcast做了tsín順序，我閣欲做一个用台語教日本話的節目，予台語的使用湠甲較大的方面。
另外，我做這个podcast是有一个理由的，我想欲透過這个平台訓練我的台語。我開始共台語學倒轉來成半年爾爾，猶tsín袂輾轉，但是這半年的學習效果袂䆀。有一工，我佇駁岸走標運動的時陣，一个老阿伯來共我問路。伊用台語共我問，我嘛用台語回答。我真歡喜，除了tsín細漢的時陣，我攏毋捌完全用台語講話呢！我一生學過華語、英語、法國話佮日本話，就是無斟酌聽故鄉的人講話。我感覺按呢足見笑，愛有國際觀就愛有本土觀。我拍拚共台語學倒轉來，我向望，有一工，台語會變甲較輾轉淡薄仔。
我是宜蘭人，可能有濫宜蘭的氣口，可能佮你熟似的台語有小可仔無仝款。若你聽無我咧講siànn，你會使看我的網誌「medium」內底，我有貼這集podcast的文稿。佇這个文章當中，有囥一个youtube的影片，這个影片會驗你的台語倚佗一个腔口，真趣味。而且，看文章的時陣，你會使那聽那學台文字，摸蜊仔兼洗褲，有看有趁，無看你會後悔喔。遮的漢字是照教育部的參考標準，用教育部的羅馬字去鬥台語的發音。我的書寫標準，我認為較簡單的字，攏用漢字寫；若是較罕用的字、普通的電腦無法度展出來的漢字，抑是根本猶閣毋知影佗一个漢字、無字通寫的時陣，我就會寫羅馬字。按呢漢字配羅馬字的寫法，會使表達完全的內容。嘛因為是教育部的參考寫法，學台語的人會使用教育部的教典去搜揣伊欲知影的詞。
另外，「台語tsín袂輾轉」的logo，就是彼个有畫龜的尪仔。彼个龜代表宜蘭的龜山島，是阮宜蘭人，蘭陽（Lân-iâng）平原的守護神。若是你佇面冊的迷眾頁，抑是medium頂，你會看著龜佇海頂看月娘的模樣。其實，我本來想欲畫日頭。因為，佇宜蘭，阮有一个俗語叫做「龜山朝日」（Ku-suann-tiâu-ji̍t)。毋過，畫咧畫咧顛倒變成一粒黃kím-kím的圓箍仔，姑不而將就共當做月娘。我共這个尪仔予一个法國朋友看，伊講這是一粒日頭（笑）。毋管是日頭，抑是月娘；龜山朝日，抑是龜山朝月，攏是宜蘭的媠風景。
今仔日我講到遮，若是你有啥物話，想欲聽啥物代誌，抑是我的台語有講毋著的所在，麻煩你佮我參詳。若是你佮意我的節目，莫袂記得佇我的迷眾頁、IG、Twitter、我各種的podcast平台揤讚喔。咱後擺再會～^_−☆
