其實印度會唔會係下一個新興危機市場呢?

各位,係時候要留意下印度呢個「新興市場」啦。

https://www.bloomberg.com/news/articles/2018-09-21/billionaire-bank-founder-falls-foul-of-india-bad-debt-battle

星期四印度央行(RBI)宣佈,該國嘅私營銀行Yes Bank創辦人 Rana Kapoor 只可以繼續擔任該行嘅CEO至下年一月底;雖然RBI無講明原因,但外界都明白RBI係因為Yes Bank被發現報細壞帳數字,所以決定整頓該行嘅管理層。

呢個決定令到Yes Bank 股價大跌就梗架啦 — Yes Bank係星期五股價下跌29.5% — 但更重要係佢拖累一眾印度金融股,與及成個印度股市下跌。印度Sensex指數星期五一度跌3%,收市跌0.8%。

https://www.bloomberg.com/news/articles/2018-09-21/indian-stocks-gain-as-investors-review-profit-outlook

要知道RBI近幾年都係度處理銀行體系嘅壞帳問題,但因為唔少都係國營銀行,問題一直無法根治。但今次對Yes Bank嘅整頓令市場估計RBI會係壞帳問題上愈黎愈強硬,對印度金融股帶黎壓力,亦可能對金融業嘅運作有影響。

要知道,印度貨幣盧比兌美元今年跌超過一成,並且係今個星期創左歷史低位。匯價下跌會令印度嘅經常帳赤字惡化;今年第二季印度嘅經常帳赤字相當於GDP 2.4% ,分析估計第三季會惡化至2.8%

又由於印度相當依靠石油入口,油價回升至80美元亦令印度嘅經常帳赤字壓力愈黎愈大。

同時間,下年印度又要大選,莫迪要連任可能會推出較民粹嘅經濟政策討好選民。

如果大家有留意土耳其(或者阿根廷)匯市危機,政治主導經濟政策加上經常帳惡化係危機嘅成因;印度絕對有呢個「潛質」,依家要睇嘅就係市場信唔信得過RBI嘅獨立性;但如果大家記得,兩年前Rajan離任RBI同埋上年廢鈔,都有政府行政部門向干預央行嘅陰影......

無錯,印度經濟增長仍然高達8.2%,但唔好忘記土耳其嘅GDP增長都有5.2%。