經濟學BLOG事 — 23號 | 2018年7月
整合最新嘅經濟學者網誌同學術界網絡文章，幫各位讀者易啲搵到心水嘅網上經濟學術讀物之餘，亦等大家更了解經濟學者關注緊啲咩時事、學術議題。更重要嘅係，希望呢個Reading List可以鼓勵各位讀者多啲睇經濟學相關讀物，令經濟學知識更普及。
星期四Donald Trump係CNBC上講左，佢「唔係咁歡喜」聯儲局加息。 同日Tyler Cowen就係網誌上思考：「聯儲局應該點反應呢？」
佢認為聯儲局可能會扮Trump無講過呢番說話，但亦有機會聯儲局會係未來嘅Forward Guidance上更為含糊，令到Trump同白宮唔會覺得聯儲局好急住加息。但當然，呢個方法嘅代價就係貨幣政策路向嘅溝通，就會比依家更唔清楚，對經濟未來係咁好。
但Cowen提醒讀者，聯儲局唔係自古以黎就有政策獨立呢個特質，而利率政策亦未必係強調政治中立下，最好嘅政策工具......
Gabriel Zucman避稅經濟學最新嘅一篇研究嘅Voxeu版。
今次佢連同 Thomas Tørsløv及 Ludvig Wier兩位學者指，全球嘅平均企業稅率由1985年嘅49%降至2018年嘅29%，可能唔係因為各國希望以低稅率吸引企業作實際投資，而係因為成熟經濟無法同避稅天堂爭環球巨企嘅稅收，改為不停減稅黎同其他成熟經濟爭中型企業餘下嘅稅款。
點樣嘅ICO比較容易「成功」呢？專研Cryptocurrency嘅經濟學者 David Yermack聯同 Sabrina Howell及 Marina Niessner就係呢個研究，檢視一啲ICO案例，試以搵出一啲成功嘅特質。
