連小啲着鞋都係多啲學習？！ Less Shoes is More Learning?!
Published in
3 min readMay 30, 2016
早前由赫爾辛基大學來港，Playful Learning Center 嘅科學主任 Prof. Kristiina Kumpulainen 喺教育學院嘅演講上提到，點解芬蘭嘅教育係國際上嘅排名係咁高？佢舉咗幾個聽落頗為荒謬嘅假設，例如話因為芬蘭人係全世界飲最多咖啡嘅人，又或者因為佢哋真係相信有聖誕老人！好明顯係喺度搞笑搞吓氣氛。估唔到上個禮拜出咗一份研究報告指出，小朋友上堂唔着鞋對佢哋學習上有幫助！而北歐國家，包括芬蘭在內就係因為落雪嘅關係，幾十年來都有除鞋入課室嘅習慣。
呢份長達十年嘅研究報告指出，上課時唔着鞋嘅學童有較大可能得到更佳嘅成績，更好嘅行為表現。研究員於25個國家，超過100間學校，觀察過萬個學童，指出喺課室外除鞋嘅小朋友比較早返學，遲離開學校，睇多啲書，更加投入上課，所以成績更佳！
同樣係聽落有啲荒謬嘅感覺，但係諗深一層其實又好有道理。專家相信學童喺課室內唔着鞋令學習變得更佳嘅原因就係因為佢哋有屋企嘅感覺，可以更輕鬆地學習。
「95%嘅學童喺屋企係唔會坐喺張凳度睇書嘅，佢哋係會攤係地下。喺課室除鞋可以令到佢哋更加放鬆。」
更微妙嘅係，上個星期五睇到呢份報告嘅時候，正係啱啱同合作夥伴喺觀塘一間津貼學校為將於下學年啟動嘅「在做中學習」（簡稱「做中學」）方案開咗一個下午會。我哋教育大同好想香港嘅公立教育可以做到真正以人為本，學童每個都又開心，又投入咁上課！呢份研究報告咁啱提醒我哋，條路雖然難行，但係其實有好多好微細，好簡單嘅事，大家只要肯嘗試就唔無論係咩學校都可以作出轉變！少啲着鞋，多啲學習。做少少野，多多轉變。
