مرت فترة الفاينل وانشغلت بالدراسه وما تكلمنا في ذاك الوقت وايد اقصى كلامنا كان رد على الستوريات ، في آخر فاينل لي كنت طالعه مروقة اني خلصت وافتكيت يومها كلمته اسال عنه قعدنا نتكلم عن الاختبارات وشلون انه خلصت وارتحت وبدينا شوي شوي نتعرف على بعض قلت له شنو تخصصي ومن هالكلام وهو بعد قالي وين يشتغل وقعدنا نتكلم عن الحياه بحكم انه كان اكبر مني بأربع سنين قعد ينصحني وانه شلون استثمر في نفسي ومن هالكلام مرت الايام واحنا كل مالنا نزيد في الكلام بس لين ذاك الوقت انه ما شفت شكله بس اشوف أطراف صور ما كان يطرش صوره كامله فقلت يمكن ما يحب يصور وهاي عادي يعني ما كان بينا شي رسمي عشان اهتم وايد للشكل ، في بدايه شهر اثنعش يعني عقب شهر من السوالف كان عندنا عزيمه في منطقه قريبه من منطقته ف كنت امزح وياه اقوله اليوم معزومه عندكم وهو يحسبني استعبط ف يوم كنت في الطريق صورت له انه رايحه صوبهم :

👩🏻 : ربع ساعه وانا عندكم

👨🏻: صج بتجين ما قالوا لي انه عندنا عزيمه

👩🏻 : اي يبيلنا شوي ونوصل

👨🏻: غريبه محد قالي انه في ضيوف

👩🏻: ليش يقولون لك اوردي بنقعد في صاله الحريم

👨🏻: صح بعد😂😂

👩🏻 : استعبط مب جايتكم بروح بيت وحده تصير لنا

👨🏻: الله يحفظج صرقعتيني عبالي صج بتجين🤣

👩🏻 : اكيد اذا بجي ما بقولك يعني

👨🏻: اكيد يعني 😂😂😂

وطبعًا قبلها بكم يوم أنا كنت طالبه هودي عليه شي يرمز حق وظيفته فكنت لابسته في هالعزيمه وتعمدت اصور له المكان وانعكاس الهودي يبين على الجامه ( حركات الله يحرمنا منها ماعرف شكنت افكر فيه ) طرشت له الصوره على اساس انه مصوره طاوله اللعبه الي حاطينها فهو جاف الصوره قال انتبهي ترا انعكاسج يبين ( بس اللبس كان يبين ) سويت نفسي مينونه وانه اسفه ما انتبهت وجي ، عقبها نزلت ستوري فيه ولد خالي الصغير لابس بدله عسكريه انه كيوت وجي جاف الستوري وكتب الهودي الي مساع كان احلى في هاللحظه حسيت بالوناسه على شنو بالضبط مادري بس حسيت اني قدرت اخليه يمدحني بطريقه غير مباشره وهو اصلا كان مستانس انه لابسه جي ، في هالوقت علاقتنا كانت شوي جديه مب اميه في الاميه بس كانت قويه يعني

👨🏻: انا بطلع ويا الشباب بنروح نركب خيول

👩🏻: الله يحفظكم صور لي عاد لا تنسى

👨🏻: من عيوني لا توصين

👩🏻 : فديتهم

قعدت العب ويا البنات وسولفنا وكانو يسولفون عن الستوري انه الصوره كيوت وجي ف دخلت اجوف من جاف الستوري وحصلت عدد كبير ومن بينهم كان راشد دخلت اجوف ستوريه حصلته منزل صور فيها نفس الخيول الي غانم طرشهم لي هني استوعبت انهم طالعين مع بعض فقلت بجوف باقي الستوري يمكن احصل شكل غانم ( قلت لكم وقتها ما اعرف شكله ) ماقدرت اميزه من بين الشباب لانه اغلب الصور في الظللم ومب واضحه فقدت الامل وسكرت جوالي وكملت سوالف ويا البنات

👨🏻: photo [ صورة لجام الحصان ]

👨🏻: شرايج في اللون

👩🏻 :حبيت يعني وطنية وجي

👨🏻 : انه حق اليوم الوطني عرفتي

👩🏻: حبيت جفت الصور في ستوري راشد

👨🏻: راشد ؟

👩🏻: اي مب طالع وياك هو ؟

👨🏻: شلون تعرفينه ؟

👩🏻 : ما اعرغه بس يجوف ستورياتي ساعات

👨🏻: 😵‍💫😵‍💫

👩🏻: شفيك

👨🏻: طلعتي تجوفين ستوريات الكل

👩🏻: جفت ستوريه لانه جاف ستوريي بس لا اكثر ولااقل

👨🏻: احسن لنا ما نتكلم مره ثانيه

شعوري في اللهحظة ما ينوصف تمنيت الارض تنشق وتبلعني حسيت بشعور اني جبت العيد واني خربت كل شي بنفسي سكرت جوالي ورحت الحمام ( اكرمكم الله ) تميت قريب العشر دقايق استوعب الي صار كانت علاقتنا وايد حلوه ليش فجاءة صار جي قلت معليه يوم يومين وبيطخ وبنرجع نتكلم

مر يوم يومين اسبوع واسبوعين ولا في اي اثر لا جاف ستورياتي ولا كلمني ، كملنا شهر ولا له اثر كبريائي كان ما يسمح لي اجوف ستوريه ف كنت اجوفه من موقع عشان ما يطلع له اني جفت في يوم من الايام كنت في السياره وقاعده اقلب في تيك توك وشدتني صوره حسيت اني جايفتها من قبل لفيت على الصوره الثانيه ولا هالشخص جني اعرفه الشعر جنه شعر غانم ! دخلت الحساب حصلت فيديو نفس الفيديو الي هو منزله في انستا خذت فره في الحساب وتاكدت انه هو عقب ما جفت صوره كان مطرشها لي من قبل حسيت بشعور غريب نفس الشعور الي جاني اول ما عرفته دخلت في دوامه بيني وبين نفسي اكلمه ولا لا

عشان تفهمون اكثر يوم كنت اكلمه ما كان عنده تيك توك ويقولي انه ما عنده وقت يتابع رغم انه الي حوله كلهم يقولون له نزله بس هو كان رافض لانه ما يبي يشغل نفسه فيه

Part 3 ends here 🫣

كملت طريقي للبيت وانا مندمجه في الاغاني وحاسه بشعور يديد طبعًا نسيت الاختبار والي هببته فيه كان عقلي مشغول بهالشعور اليديد مب حب ولا إعجاب بس شعور حلو وصلت البيت صفيت سيارتي ودخلت وانا مستانسه رحت عند امي وقلت لها عن الاختبار وكانت مستغربه انه مب من عوايدي استانس إذا زفت في الاختبار هني استوعبت اني وايد عطيت الشعور اكبر من حجمه رقعت السالفه ورحت غرفتي بدلت وانسدحت على السرير قاعده افكر شلون جاتني هالجراءة وكلمته ! مشيت الموضوع وقلت عادي كلها اغنيه وسالت عنها شفيها يعني .

حطيت منبه على الساعه اربع ونص عشان اقوم اجهز ، سكرت جوالي ورقدت قمت الساعه ست عقب مليون منبه دخلت بسرعه اخذ شاور ، طلعت وقمت اجهز وانا استشور شعري وصلني مسج من انستا قلت اكيد رفيجتي ( حصة ) مطرشه ريلز وما جفت من الي مطرش وكملت شعري وتمكيجت ونسيت أصلا انه في مسج لبست وخلصت وتعرفون ما يصير اكشخ وما اصور واحلل الكشخه صورت كم فيد عقبها تذكرت انه في مسج صار له ساعه ، دخلت اجوفه والصدمه يوم اكتشفت انه من غانم مب رفيجتي حسيت بشعور اني تاخرت عليه واحنا أصلا ما بينا شي مادري من وين طلع هالشعور فتحت المحادثه ورديت عليه :

👨🏻: وصلتي ؟

👩🏻: اكيد وصلت😂😂

👨🏻: ست ساعات لو في الحدود وصلتي

👩🏻 : 😂😂😂

👩🏻: رديت البيت تغديت ونمت وما انتبهت على الجوال الا توه

👨🏻: الامور طيبه وبالعافيه

👩🏻: يعافيك

👨🏻: شنو جدولج اليوم

👩🏻 : بروح بيت بابا عود وانت ؟

👨🏻: مادري يمكن اطلع ويا الي يصيرون لي

👩🏻: حلو

👨🏻: خلاص مابي ازعجج شكلج مشغوله

👩🏻 : لا عادي قاعده انطر اختي تجهز

👨🏻: الله يعنيج بتنطرين وايد شكلج 😂😂

👩🏻: انا الي اخرتهم اصلا 🤣🤣

👨🏻: 🤣🤣🤣

👨🏻: شكله راحت عليج نومه

👩🏻: يا شدراك🤣

👨🏻: سحر

👩🏻: ضحكتنييي

👨🏻: دوم ان شاء الله

👩🏻: وياك

👨🏻 : انزين انا بروح اكلمج عقب

👩🏻: تمام

الشعور قاعد يزيد مادري شنو اسميه معقولة إعجاب ؟ ما احس إعجاب على شنو وانا ما اعرف عنه غير اسمه ، قطع تفكيري صوت امي وهي تتصل رديت عليها خذت لي تهزيء خفيف ليش للحين ما طلعنا توني بجذب وبقول اني في الطريق وتذكرت انه البيت في كاميرات وامي تشوفهم خذت اسرع تصريفه وقلت بنطلع عقب شوي وفعليًا اختي للحين ما لبست ، طلعنا من البيت عقب نص ساعه ، بعد عشرين اتصال من الوالده وهي معصبه واختي معصبه لانه ليش مستعيلين وانا في النص مشغوله بهالشعور اليديد ومب معاهم أبدا .

وصلنا بيت بابا عود ومشت اليمعه مثل كل مره بس الفرق الوحيد انه هالمره كل شوي اجيك جوالي يمكن في مسج يديد وهاي مب من طبعي أنا بالعادة اخلي الجوال واقعد ويا البنات ولا انتبه له بس اليوم الوضع كان غير كنت خايفه يوصل مسج وما ادري عنه إلا متاخر ، وفعليًا وانا مع البنات قاعدين نلعب اونو اهتز جوالي جفت المسج كان من انستا على طول رفعت الجوال فتحته وطلع فيديو قطو يرقص مطرشته حصوه رفيجتي حسيت ودي اعطيها بلوك لانه خلتني اتحمس على الفاضي سكرت جوالي وكملت لعب وطبعًا فزت — بالغش — بعد لعب وضحك حطوا العشا ورحنا ناكل واحنا ناكل وصلني مسج دعيت بيني وبين نفسي انه ما يكون حصوه وريلزاتها ، طلع غانم مطرش صوره فكرت لثواني شنو ممكن تكون الصوره معقوله صورته! ل مستحيل ما احس يمكن مصور المكان الي رايحين له مادري مادري قعدت افكر شوي افتحها ولا اسوي نفسي ثقيله وانطر شوي ، وطبعًا قررت اصير ثقيله ونطرت خمس دقايق — وايد عليج — وفتحت الصوره :

👨🏻: ( الصوره كانت طرف غترته وكاتب [ بنروح ايتالي نتعشى ] )

👩🏻: الله يحفظكم وبالعافيه

👨🏻: ويحفظج

👨🏻: الله يعافيج تعشيتو ؟

👩🏻 : اي توه مخلصين

👨🏻: عليج بالعافيه

👩🏻 : يعافيك

Part 2 ends here 😗

هني بروي لكم القصه الي عشتها بالتفصيل وعشان تعيشون اللحظة معاي لازم اعطيكم نبذة بسيطة عني وعن حياتي بس قبل ما نبدا حابة اقولكم انه القصة راح تكون باللهجه العاميه بحاول اخليها واضحه قد ما اقدر عشان الكل يقدر يفهمها وبس والله يلا نبدا ، انا شيخه عمري 20 سنه قطرية وادرس في الجامعه عندي اخوين واخت وحده واهلي ناس لا هم المتشددين ولا هم المتفتحين يعني في الوسط مثل اغلب العائلات القطريه .

تبتدي قصتي في ثاني سنه لي في الجامعه كنت قاعده في احد ممرات الكلية اتابع ستوريات البنات في انستا يعني احاول اشغل نفسي على ما يصير دوري لتقديم البرزنتيشن ، كنت منزله ستوري في اليوم الي قبله ودخلت اشوف من الي شاف الستوري ومن بين الحسابات كان في حساب جديد علي اول مره اشوفه دخلت عليه وكان حساب شخص من نفس عايلتي بس ما يقرب لي خل نسمي هالشخص (راشد ) لانه بنحتاج انه نتذكره بعدين ، راشد كان منزل ستوري دخلت اشوفه من باب الفضول ولقيته مسوي منشن حق شخص ولعل الفضول تملكني ودخلت حساب الشخص الي في المنشن ، الحساب كان شبه غامض مافيه اسم ولا صوره تدل من هالشخص بس كان في بوستات وهايلايت والي عرفته من الحساب انه الشخص هذا ما يحب يبين من هو حتى اسمه ما كان موجود ، وطبعا بحكم لقافتي دخلت الستوري وشفت شنو منزل الستوري كان صوره راشد مع مجموعه من الشباب توقعت انه صاحب الحساب موجود من بين الشباب الي في الصوره لكن اكتشفت بعدين انه مب معاهم .

من هالستوري ابتدت فقره المتابعه يعني انا اشوف ستورياته وهو يشوف ستورياتي وتمينا على هالحال قريب الشهر هذا الكلام كان في شهر تسعه تقريبا ، مرت الايام واحنا على هالوضع واذا تحمسنا نحط لايك على الستوري وطبعًا بحكم بيئتنا كنت اجوف هالشي انه وايد كبير رغم انه شي عادي ، جاء شهر عشره ومثل ما تعرفون في هالوقت تبتدي فاينلات الجامعه كنت طالعه من فاينل احد اصعب المواد في الكورس ومتضايقه لانه احس اني ما قدمت عدل طلعت من الاختبار دقيت على اختي وقلت لها خل نروح نتقهوى ابي اغير جو شوي مريت اخذ اختي من كليتها ورحنا نتقهوى في فاندوم صورت صوره ونزلتها ستوري في انستا وسكرت جوالي وقعدت اسولف ويا اختي كان يوم الخميس والمتعارف عليه انه نروح لاهل ابوي ف كنت اشكي لاختي اني مب في المود ومالي خلق اروح لهم رغم اني احبهم بس كان مزاجي وايد متعكر يومها من الفاينل الي خبصت فيه ، طلعنا من فاندوم ورديت البيت وانا واقفه عند الاشاره قلت اشوف من شاف ستوري لقيته شايف الستوري وحاط لايك من نص ساعه يعني بعد ما نزل الستوري بخمس دقايق دخلت اشوف ستوريه وكان منزل اغنيه الاغنيه عجبتني وقلت ليش ما اساله عن اسمها رغم انه كان يمديني اطلعها بنفسي بس مادري ليش قررت انه اساله عنها وفعلا سالته عنها والموضوع مشى بهالطريقه :

👩🏻: شسم الاغنيه

👨🏻 : الاغنيه الفلانيه عجبتج ؟

👩🏻: اي

👨🏻: شكثر
👩🏻: 🤨

👨🏻 : السموحه

👩🏻: 🤣🤣 امزح عادي

👩🏻 : عجبتني وايد

👨🏻: حاضرين لج يا ؟

👩🏻: شيخه

👨🏻: حاضرين لج يا شيخه

👩🏻: وانت

👨🏻:شتتوقعين

👩🏻: من يوزرك اتوقع غانم؟

👨🏻: صح

👩🏻: ونعم

👨🏻: ما عليج زود

👩🏻: انزين غانم انا بكلمك عقب قاعده اسوق ومابي اتخالف

👨🏻: حتى انا قاعد اسوق 🤣🤣

👩🏻: يلا عيل انتبه للطريق

👨🏻: ان شاء الله

part 1 ends here 🤭