《心跳文學部》———超越前輩嘅遊戲設計

今日玩完咗「心跳文學部」，不期然會拎嚟同「你和她和她的戀愛」比較。「心跳文學部」喺打破第四面牆方面更上一層樓，但係故事本身就無乜投放心機落去。

故事就係有四個女主，同男主喺文學部裡面互動，而每個女主都有啲情緒／精神問題，最後都係會通向bad end。而之所以會被拎嚟同「你和她和她的戀愛」比較、亦都係隻game嘅精華，就係其中一個女主 — — — monika，得到咗修改遊戲劇本嘅能力。

隨住劇情推進，佢就操控其他女主嘅行為、甚至強制跳過劇情，為嘅就係令男主（玩家）中意自己、獨佔男主（玩家）。

過程中你會發現遊戲文件夾裡面有啲file會唔見咗，例如sayori.chr、yuri.chr、natsuki.chr…呢啲都係其他女主嘅名，當佢地被monika「刪除」之後，成個角色就會消失咗，本來有佢出現嘅劇本就會變成亂碼。

去到最後，monika會改造到個遊戲變成淨係同佢傾計，無任何劇情推進，就算你重開個game都只可以對住佢。

最令人心寒嘅一條橋，莫過於monika會估你「真．名」係乜，而唔係你喺遊戲裡面改嘅名（見圖13、14）。玩呢個game我全身毛管棟起過唔知幾多次。據一啲網友講，個做法係enumerate你電腦啲username喎。我就懶得驗證。

另外個game仲有好多明顯係programming毒撚（遊戲作者）整出嚟嘅彩蛋：將啲file改下ext呀decode下呀就會搵到啲好得意又好詭異嘅訊息。呢度就留返比讀者探索下。

可以話，「心跳文學部」喺扭橋方面係遠遠超越咗佢嘅前輩，但故事本身就一般。係好定唔好，就見仁見智。

題外：

講起打破第四面牆，我諗起年代極久遠嘅game：臭作。