正義撚及左膠退散：評《裝甲惡鬼村正》—思想篇

官方宣傳圖，張力十足。

［慎入］以下內容含有成人情節、或令人情緒不安，衛道之士請速退。

前言：幾前年玩咗一隻影響我至深嘅GALGAME，一路都想仔細重溫一次，順便寫低自己喺呢隻game上嘅得著，不過一路都懶得落筆......多謝武漢肺炎，令我得閒到挖返幾年前嘅坑出嚟填。我會分開思想、人物、情節三部份嚟講。

封面望落好機戰feel，到底呢隻game係咪行王道風格，賣弄動作鏡頭、機械戰鬥、熱血友情、英雄主義？官方PV片尾就開宗明義同你講：

圖源係fan後製，加咗英文字幕，因為原版啲字有啲鬆郁朦.....

「呢個唔係英雄嘅故事，立志成為英雄嘅人係無撚用嘅。」

事實上亦都係Nitro+一貫嘅「王道包裝，暗黑內容」。反英雄、反效益主義、有道德虛無主義傾向。故事嘅殼係機戰，但個餡係「探討人生與正義」，情節要幾血腥有幾血腥、要幾暗黑有幾暗黑，包括一刀批人個頭落嚟、輪姦、亂倫、酷刑......各種play都有。

故事開頭，條友成個王道熱血夢想少年咁嘅樣：

典型熱血漫男主樣.....

比某個怪叔叔救咗一命，多謝緊佢：

左面係著咗裝甲嘅怪叔叔

下一秒：

其實怪叔叔先係主角。

背景

時空背景係日本史上好多大時代mix埋一齊，但大體上可以當係幕末。戰火紛飛、政局動蕩；惡黨橫行、人命如草芥。有一個著住名為「劍胄」嘅裝甲嘅女仔（湊斗光）周圍殺人，無人打得低佢；佢阿哥，即係男主角，湊斗景明，著起另一副劍胄去追捕、制止佢。

而景明所著嘅劍胄嘅特別之處，就係著起佢嘅人，都一定要遵守「善惡相殺」嘅戒律。

善惡相殺

呢個故事由始至終都由一個concept牽動：「善惡相殺[1]」。

男主角景明陰差陽錯著住一副「受詛咒嘅」劍冑（其實係製造者特登加上去嘅......係feature唔係bug）戰鬥，逼使佢每殺一個（佢心中嘅）「惡人」，就要殺死一個「善人」；殺一個佢憎嘅人，就要殺一個愛嘅人填數。

雖然為此佢盡力避免捲入戰鬥傷害無辜，但係為咗制止佢嗰個喺外面搞到天下大亂嘅妹，又時逢亂世，一路上少不免動刀槍。於是一路殺咗唔少唔應該殺嘅人，為此自責不已。

點解劍冑個製造者要整個咁撚on9嘅設定？

理念上，係源於製造者嘅道德相對主義：「你眼中嘅惡人係某啲人眼中嘅善人。」正所謂「人地都有老豆老母」、「人地老婆仔女都等住佢養」、阿媽係女人。左膠嘅思想就係停留喺呢步，認為大愛、和平先係出路，「反對一切暴力」。但呢個故事當然唔止咁簡單，故事最後，景明喺認識到善惡相殺嘅真諦之後，依然選擇咗繼續動武，將善惡相殺發揚光大。

務實上，製造者希望「透過善惡相殺令人體會戰爭嘅醜惡，停止戰爭。」Again，停留喺呢句嘅就係左膠，但佢仲有下句：「如果人類咁都唔識停手嘅話，咁就抵佢地滅絕。仲好，用善惡相殺等佢地死快啲囉。」———攬炒派金句。

遇鬼殺鬼、遇佛殺佛

故事嘅前半段仲有個好有趣嘅對比：正義撚女（配）角一条、男主景明；一条嘅劍胄「正宗」、景明嘅劍胄「村正」。

相傳呢兩個名嚟自兩個刀匠，兩人係師兄弟，「正宗」嘅造刀哲學係只斬惡人；「村正」係有乜斬乜。遇鬼殺鬼，遇佛殺佛。

呢個「村正」當然就係遊戲標題「裝甲惡鬼村正」所指嘅「村正」。點解係「惡鬼」？乜撚都斬喎，善人都無面比喎，善惡要相殺添喎，殺咁多無辜嘅人，仲唔係一般人眼中嘅惡鬼？

結果正宗呢個正義嘅狂信徒自己都懷疑自己。

拎起武器講善惡本身就係on9，笑甚麼你也是殺人。殺人就係殺人，佢同村正嘅分別只係佢會斬嘅野少過村正。

「正義」係糖衣毒藥，經常令人自我催眠「我同佢地唔同」。「佢地係邪惡嘅，所以要殺曬佢地」對方何嘗唔係咁諗？（Again，停留喺呢步就係左膠……）「止戈為武」係一個大話，任何對武力嘅美化同「正當/不正當武力」嘅劃分本身就係粉飾太平。湊斗光講得好：「武唔係止戈，係以戈相止！」

善惡嘅盡頭

一路玩你會發覺，左膠同真理只係一線之差。大愛和平，同做一個有血有肉嘅人，只係有無喺「見善不是善，見惡不是惡」之後再踏出一步。停留喺善非善惡非惡呢啲半桶水level嘅左膠，永遠只係歷史罪人、為後人所訕笑，甚至稱唔上係真正嘅人 — — — 人唔係上帝，唔需要去審判邊個有罪，更加唔需要因為無資格審判就放棄選擇。

認識自己並唔係正義，甚至連正邪善惡嘅觀念都扭轉之後，時間繼續向前，人依然要面對種種選擇。保護你愛嘅人、事，為此消滅威脅呢啲人同埋事嘅一切，愛就係選擇[2]。無愛恨嘅唔算得上係人，只係一個未覺醒嘅衛官切嗣[3]。

景明同光打咗Ｎ咁多回合，次次都係比光打到仆街。而喺故事嘅尾聲，景明終於頓悟咗打敗佢嘅方法：殺死自己。

刀下無辜亡魂眾多、飽受良知煎熬嘅景明，自認係大惡人，最憎恨嘅人就係自己。

另一方面，光係佢最愛嘅人。

如果殺死最憎嘅人，就會觸發善惡相殺———即使自己唔想，都會殺死最愛嘅人。

於是光比景明一刀收皮。而光喺領悟到呢一刀正正係景明對自己嘅愛嘅證明之後，含笑而逝。

湊斗光搞到天下大亂，又天下布武又要成為神又要打破世俗規範乜乜乜，搞咗一大輪，其實都只係想得到景明嘅愛。

點解「善惡相殺」呢條戒律會將善惡同愛恨撈埋一齊？點解講善惡嘅故事以愛恨收尾？

注：

1. 日文嘅相殺係「相抵」咁解。
2. 感謝本土派首席先知方學能先生嘅「愛就係選擇」理論，令本人得以濃縮思想。
3. 睇嚟又要搵日重溫Fate/Zero……