當新海誠變得罐頭—《天氣之子》短評
TLDR:《你的名字》同《天氣之子》嘅新海誠，劇情俗套、爆發過多（相比起新海誠眾多舊作）、浮誇嘅笑位，除咗精細畫面，同埋死姐控之外，幾乎同《秒速五厘米》、《言葉之庭》嘅新海誠係兩條友嚟。
信物
《言葉之庭》嘅鞋[1]、《你的名字》嘅口嚼酒，都係貫穿全劇、寄託思念嘅信物，咁到底《天氣之子》嘅信物係乜？話係戒子，似乎差咗幾皮，雖然係寄託咗對陽菜嘅思念，但係喺推進劇情同角色情感上嘅作用遠遠及唔上《言葉之庭》嘅鞋同《你的名字》嘅口嚼酒。
把槍？
其實我仲未明把失槍有乜用......一開頭射鳩皮條客果段其實可有可無，就算拖走陽菜之後無比人捉到，對劇情似乎都無乜影響。就算真係要保留比人捉到嘅情節，大不了咪改成比皮條客打一身或者踢佢下陰然後出奇不意咁帶陽菜走囉......大把方法。把槍對劇情最大影響似乎就係為咗比理由啲差佬好大陣仗咁去捉佢，但依然係格格不入。預告片仲要懶喺野咁玩槍聲......真係有嘩眾取寵之嫌。
笑位略顯浮誇
由《你的名字》開始，新海誠就開始加入好多笑位同玩梗，唔係唔好，不過幽默感呢啲野真係無得勉強。同場觀眾好似好受落，成日笑，但我就十次先笑一次。法西斯啲咁講，你班撚樣笑點咁低架。
不過，花澤同佐倉嘅聲優梗又算係唔錯嘅。
含蓄內斂不再
喺《你的名字》之前，新海誠對角色情感嘅描寫一向係深沉壓抑，無論係《秒速五厘米》嘅無力感，定係《言葉之庭》嘅似有若無，都令觀眾慢慢咁積累情緒，好似獵物咁樣一步一步接近獵人嘅陷阱，越踩越深；又好似一路吹漲嘅氣球咁，吹得越漲先爆，效果就越震撼。咁樣嘅感情先顯得深厚，亦相信係唔少觀眾對新海誠著迷嘅原因。
然而《你的名字》同《天氣之子》就一反常態，節奏走向輕快，情感表達越嚟越直接，郁啲多就爆，完全無咗過往嘅含蓄內斂，完全係浪費咗新海誠最拿手嘅「融情入景」。
配角映襯力度不足
劇中開頭收留離家出走嘅男主角帆高嘅K&A老細須賀，好明顯係男主角嘅映襯：姐系靚女夏美三番四次表示「須賀同帆高好相似」。須賀死咗老婆、成為被世道磨平棱角嘅死魚眼大人，勸帆高離開陽菜返屋企，認為係「最好」嘅結局、嘗試捉帆高係自首，「反抗係無用，唔好做on9野」[2]。結果最後被帆高打動，打鳩警犬，幫帆高去見陽菜。
用一度自暴自棄認命投降嘅配角映襯一路無放棄過嘅主角，本來係唔錯嘅安排，但係須賀嘅往事交代不足，成為敗筆。帆高面對通緝、無依無靠、無人信佢講「陽菜係祭品」呢個天方夜譚，依然堅持己見。咁相對地，須賀當年又做過啲咩？劇中淨係交代咗佢為咗同有患有哮喘嘅女見面而戒煙（失敗），力度略嫌不足，如果喺亡妻過世、女方家人百般阻撓上面再著力描寫多啲，相信效果會更加好。
反而殺必死越嚟越到肉
《你的名字》口嚼酒有目共睹，新海誠嘅殺必死真係越嚟越露骨。可能隨住年紀漸長，中佬新海誠妄想力突破天際，都唔講夏美賣肉喇，屌佢老味男女主喺酒店床上披住睡袍、著住暗淡嘅床頭燈，互相凝視......然後隔離仲訓咗個小朋友喺到。呢啲咁撚痴線嘅場景，真係得久經「歷練」、深諳意淫之道嘅死麻甩佬先寫得出。
但同一時間，以前嘅新海誠果種含蓄就煙消雲散。《言葉之庭》玩腳果種點到即止嘅誘惑，先至最襯新海誠一貫嘅優美畫面、同埋「離別」呢個新海誠一直重覆嘅主題。
越嚟越露肉同浮誇嘅情節，新海誠喺迎合「大眾口味」嘅同時，亦抹殺咗以往果個深沉內斂嘅自己。以前嘅新海誠，睇完會意猶未盡、蕩氣迴腸；而家嘅新海誠，睇完，訓醒教，道火已經消散咗大半，感覺同睇完普通王道電影差得唔遠。
注：
- 新海誠真係死姐控+死腳膠……因為同佢癖好相近，所以無可否認佢啲殺必死對我嚟講幾應棍……
- ......又係時候loop返「愛就係選擇」
