《穢翼的尤斯蒂亞》———八月社嘅轉型嘗試
八卦:本作有個花名叫「愛欲(日文同音)的尤斯蒂亞」
雖然都係近十年前嘅game,不過既然呢排重溫咗一次,咁就鳩噏兩句啦。
本作係八月社風格嘅轉捩點。《穢翼》之前嘅八月社係廢萌、日常(《夜明前》同《Fortune Arterial》應該唔少人識);但本作嘗試講述一個比較灰暗嘅故事;緊接住嘅《大圖書館的牧羊人》雖然又行返廢萌日常路線,但最近嘅《千之刃濤、桃花染之皇姬》就向返「內涵作」方向走。可以見到《穢翼》的確係八月社作品嘅分水嶺。
你諗下,點會諗到八月社出嘅game,一開波就比啲咁嘅野你睇:
本作用「中途落車」方式分離支線,支線內容大概係男主放棄ティア同其他女主一齊,然後講下後日談咁。
主線故事大概就係講一個會因為某啲超自然力量而逐漸崩塌嘅國家(本來係浮喺空中,因為地球表面已經不宜人居云云),搵方法去阻止崩塌。中途發生過一次大崩塌,造成一個損害特別嚴重嘅地區,之後直變埋貧民區(「牢獄」),裡面一堆黑社會同靠賣身維生嘅女人。
主角就係類似御用紅棍咁,幫牢獄第一黑幫做打手,保護(順便溝下)紅燈區啲女女咁……
同時,一種叫「羽化病」怪病蔓延,患者會生對翼出嚟,仲會傳染,於是偉大嘅國家就成立一隊特別部隊去捉佢地,名為治療,實際上係用佢地嘅力量去防止崩塌。不過力量始終唔夠,所以耐唔耐就會有小規模崩塌。
後來發現羽化病患者女主ティア有特別強大嘅力量,於是偉大嘅國家就想留住佢去支撐住成個國家,好似人柱力咁。已經愛上佢嘅男主梗係唔制喇,於是密謀搶返佢返嚟。最後又真係比佢成功咗,結果成個國家失去所有支撐嘅力量,跌咗落地球表面。
呢個時候,ティア確認男主嘅愛意之後,就無留遺憾咁犧牲自己,淨化咗成個世界,成為<del>圓神</del>,完。
人物形象鮮明,天真純潔,同理心強,願意為他人犧牲嘅ティア;內心脆弱但依賴男主重獲新生、痴心一片嘅エリス;死古板、用高自尊去維持自我嘅フィオネ;作為condum隨時會被處死嚟平息民憤,但依然信仰堅定,同ラヴィ互相扶持嘅聖女イレーヌ———都深入玩家腦海。
順帶一提我幾中意兩個人嘅配音,一個係男主,一個係エリス。
エリス聲優將佢配得非常誘惑,尤其喺耳邊輕聲講野嘅時候,微微沙啞略帶氣聲但又溫柔嘅聲線,真係全身酥軟。同エリス角色形象好夾。一查CV,叫淺川悠,即係Fate stay night嘅Rider……唔怪得啦。
男主嘅聲優(係,男主有CV,立繪仲有樣,不過H scene會好貼心咁幫你mute咗佢)聲線溫柔,作為男人嘅我有時都會聽到起雞皮。查一查CV,叫近藤隆,即係《果青》嘅葉山。
劇情流暢,投入感好強。
因為大崩塌而令國家分為上層、下層、牢獄三部份嘅設定亦都得以充份展現:開頭描寫牢獄,無論住民嘅舉止、街道嘅外貌、氣味都描寫得非常侷促,立繪都以偏暗色調為主;一去到上層第一張立繪就比人乾淨、明亮嘅感覺,令人精神為之一振,充滿感受到三個部份嘅分野。
大崩塌呢個設定亦都為故事提供張力嘅泉源:牢獄住民對大崩塌有PTSD、聖女命運繫於地震(關係到大崩塌嘅機率)、皇室圍繞大崩塌嘅陰謀同鬥爭,都令到每一次地震都牽動所有角色。隨住地震越嚟越密、越嚟越強,故事就越趨緊湊。
呢啲都係出色嘅情節安排。睇得出以日常將讀者帶入設定嘅世界觀之中係八月社所長。
至於故事嘅前中段,張力營造方面就有啲失色,高潮位嘅筆觸同日常位差唔多,突顯唔到節奏嘅變化。而且有啲位真係好兒戲,例如故事前段ジーク作為黑社會大佬對男主發火嘅某啲位有啲莫名其妙、ルキウス嘅副官喺提到治療院嘅時候話唔可以講負責人嘅名係因為涉及複雜嘅政治問題(DQ人都唔會講明政治原因啦)、リシア同執政公之間政治戲亦略嫌幼嫩。
始終嚴肅野非八月社所長,有待努力。
但整體嚟講,瑕不掩瑜,本作嘅story telling依然係唔差嘅,至少令玩家自然投入於故事之中、自然中意上當中角色,劇情無大破綻,已經係成功嘅故事。
本作一反八月社廢萌日常傳統,係唔錯嘅嘗試,令人期待他日有部劇情出眾嘅作品推出之時,可以見到用八月臉講嚴肅故事嘅一日。對於萌八月臉嘅玩家(例如筆者)嚟講會係喜訊。
題外1:
《穢翼》係2011年出,八月社緊接其後嘅作品係2013年嘅《大圖書館的牧羊人》,但係作畫好似《穢翼》精緻好多,上色飽滿、層次豐富咗,好似連人面都好睇啲,唔知係咪錯覺:
題外2:
本作我最中意嘅女角エリス,著名coser enako N年前係cos過架,當年佢仲有少少肥,個樣好Pure好true,同而家差好撚遠。有追開嘅朋友不妨去摷嚟睇下。