《迴響》粵語文學期刊第一期選（略）評
《望夫石》
睇得出作者係個中意成日扭橋嘅人。我就唔算特別睇重橋段夠唔夠「新穎」嘅（當然你玩到死亡筆記果種又另計），睇完就會覺得係：「普通嘅借題發揮」。可能我口味問題啦，我覺得中規中矩。
故事一開始由望夫石視角講當年點解會變做一舊石頭；然後又由農夫視角去講返農夫版本嘅故事，有啲羅生門嘅味道。
至於農夫、望夫石、教書先生係某啲政治勢力嘅化身、望夫石想甩身要等多「五十年」，呢啲都叫做玩下隱喻，但又唔及《去兮留兮》寫得咁到位。
（而我唔評論《去兮留兮》嘅原因係呢篇根本成篇都係影射時局，要講嘅話就變咗時事評論喇。非我所長（唔及作者咁長），從略。）
btw，有個比喻我睇到係笑咗出嚟，就係農夫話個女仔好白，「好似王伯屋企隻狗咁白」。又幾抵死喎。
《人間失字》
首先情節方面，主角努力睇字，克服強烈嘅痛楚，最後可以正常睇字，點知全世界都已經唔用文字。呢個逆轉寫得唔錯，表達到曲高和寡嘅無奈。
Generalise返少少，將「識字」呢個主體隱去，就會得出「努力逆流而上，最後被世界遺棄」呢個主線。
喺社會性提升到極致嘅現代文明裡面，人嘅價值就係「其他人有幾需要你」，即使你有幾「好」、幾「有用」，只要其他人唔係咁覺得，你就係「無用」，就會被世界遺棄。
不過至少，本文作者登到文吖。有稿費（？）吖。咪幾好。lol
《獨裁勇者勇闖魔族領地》
呢篇都寫得幾白。都係啲社運花生咁啦。
村民反對勇者挑戰魔軍之後，被女魔法師一野燒曬條村，呢啲就係真正嘅「攬炒派」！！
《阻你三分鐘左右》（上）
一路都中意塔巴用白描去寫略帶悲涼嘅故事。無花巧嘅修辭，但字裡行間就自然充滿淡淡嘅傷感。
塔巴寫女亦都有一手，本文嘅女主角，第一筆正寫外貌嘅只係簡單嘅一句：「粟子色咣短髮，喺夜晚昏黃色嘅圖書館燈光下，別有一番美態。」，但係成個畫面已經出曬嚟。
女主角出場嘅時候係教「我」溫書。喺「我」眼中，佢係平時好冷漠唔同人social嘅人，但係主動教「我」溫書，仲會露出笑容。喺呢個側寫鋪塾之下，正筆只需要輕輕一句，女主角嘅神情就躍然紙上，呢個就係塔巴高明之處。
同樣嘅感覺，喺塔巴嘅短篇《夏》裡面都有出現：「佢果種淺淺而燦爛既陽光笑容，成日令我望到，都唔知自己果下身處係邊」—＞「如果唔係，佢既深咖啡色既馬尾，佢耳邊既果個淺黃色既髮夾，佢紅色書包拉鏈掛住既ＳＮＯＯＰＹ鎖匙扣，就一定唔會咁印象深刻。」
至於字裡行間嘅傷感，就係由主角之間似有若無嘅隔膜帶出嚟嘅。《夏》定係呢篇《阻你三分鐘左右》，都係明明有野想講／覺得對方有野想講，但扭嚟扭去始終都講唔出，去寫出男女主角之間嘅隔膜。
......然後我發現塔巴都幾中意寫女仔嘅笑，我懷疑係一種性癖。
《永發茶餐廳》
我覺得佢講得有啲道理呀，all day breakfast咪即係常餐。屌。
btw，迴響老總收咗永發幾錢廣告費？
其他
有啲比較休閒嘅文章唔係好啱我口味，極速䁽咗一次，無太多感想；資訊性啲嘅例如Factfulness書評同埋《十個香港人十個都唔知嘅廣東話常識》，我幾欣賞，「多謝老師，我又學到野了」，但除咗學到野之外就無乜感想了，所以都係從略。
之於一啲無提嘅故事，就係口味問題唔想細睇，同文章質素無關。
例如《二度殺人事件》，䁽咗幾段（同個標題）之後覺得有陣懸疑推理味，不了，我麻麻；《香港亡者之書》啲段落太「重型貨櫃」，仲要意識流（咁我都粗略睇過一次嘅），我就真係唔係好食得落。從略。
