Innocent grey系列:《戀獄月狂病》———IG社奠基之作(微劇透)
本作係Innocent Grey嘅出道作,一嚟就奠定咗IG社嘅獵奇+推理+愛情定位。
本作男主高城秋五掛名係偵探,但實則根本係廢青......佢啲推理差唔多都係靠人幫,得佢自己一個果時就係碌柒,連自己(啲)女人都要靠個妹救,辣殺!!!
劇情(包括挑錯)
故事可以分成三部份:深水薰獵奇殺人事件、 千里教事件(赤尾殺人)、謎底揭曉。
先讚:
本作最精彩嘅莫過於由良呢個人物。成個遊戲裡面幾乎得最後幾分鐘先露面,但佢嘅形象就深深咁刻喺玩家腦海裡面。
後彈(小瑕疵):
一、發現有島就係千里教幕後黑手果段,有啲唐突......劇本完全無比過提示,淨係話高城秋五查到佢本姓奈良橋、有接觸過上月家,然後再查落去乜乜乜。真係有啲急就章之嫌。
二、True End 高城秋五開槍之後嘅一小段劇情(和菜向秋五道別)有啲畫蛇添足:交代返和菜出國深造唔係問題,但無乜張力,令原本高漲嘅情緒一下子跌返落嚟,及唔上直接將故事停喺秋五開槍嚟得有餘韻。
三、冬史同赤尾隻抽果段,屌,原來冬史有槍架?咁一早拎出嚟咪得囉,洗撚搞多野咩。然後拎完出嚟又居然係交比秋五,自己用鐵拐同赤尾打.......呢段真係有啲不明所以。另外可能職業病(?)發作,冬史用鐵拐同拎住刺刀嘅赤尾隻抽,大戰N回合,把刺刀居然唔崩.........可能外行人將刀具嘅耐用程度高估咗。
氣氛
故事設定喺二戰結束之後幾年嘅東京,而且幾乎由頭到尾都係喺深冬裡面發生,令故事背景略帶壓抑感。
除咗故事之外,字體(見主畫面圖)、配樂都功不可抹。霜月遙作為IG社御用歌姬,可以話係最適合人選。Innocent grey筆下有住特有嘅空靈、蕭瑟,佢嘅冬景更加係一流,唔少場面望落都寒意徹骨。
Innocent grey啲大作係我galgame生涯早期接觸嘅作品,或多或少影響我嘅口味同寫作風格,例如寒蟬,繼續睇我寫野嘅話你會發現我都一樣好中意寫冬景:)(賣廣告先)。
主題
呢個故事無非係關於受過創傷嘅人,點樣為咗尋求救贖而走火入魔。
有島(奈良橋)因為對腐敗嘅警隊感到無力、被徵召從軍但戰敗、歸國之後發現老婆同(前)千里教教主通姦,於是殺咗老婆同(前)教主,利用赤尾同由良壯大千里教,籍以斂財。
赤尾嘅自述提到從軍嘅時候殺咗好多人,相信呢段經歷為佢留低咗啲精神上嘅後遺症。佢想得到由良,不惜為佢殺死幾個無辜嘅女角(因為由良妒忌佢地同男主)。
由良就更加係全個劇本嘅精華所在。自細受到種種不公同虐待,被有島利用,捧成教主之後,用咗幾年時間反過嚟利用有島同赤尾,排除高城秋五身邊嘅女人、借高城秋五之手剷除有島同赤尾,再(幾乎)成功偽裝成和菜,重新返到高城秋五身邊、被佢所愛。
由良就係一個極可恨又極可憐嘅人。
雖然出場時間只係得最後一幕嘅幾段對白,但係謎底揭曉之際,全劇嘅各種陰謀一口氣串連喺佢身上,令佢嘅形象活靈活現。
題外
一、初音真係治癒擔當.......全劇好似得佢一個同千里案果堆命案無關係,初音線亦都係唯一一條可以見到佢同秋五組織家庭嘅路線,好幸福........
二、高城秋五同《殼之少女》嘅時坂玲人都係「喺上野一帶有啲面子」........
三、真相。